СВЯТОЙ АПОСТОЛ ПАВЕЛӸН ТИТЛӒН КОЛТЫМЫ СИРМӒШӸЖӸ 2 - У Согонь

2 ГЛАВА Тӧр тымдымын ядмыжы семӹнь ӹлӹмӓш.

¹ А тӹнь шотан тымдымаш семӹнь попы.

² Ӹлӓлшӹ пӱэргӹвлӓм ары вуян, жеплӹмӹ, ышан-шотан, ӹнянӹмӓштӹ, яратымашты, тырхымашты толкан лиӓш тымды.

³ Тенгеок ӹлӓлшӹ ӹдӹрӓмӓшвлӓӓт, святойвлӓлӓн кыце олмыдеш, тенге чиштӹ, ӓляклен каштшы, ӓрӓкӓн цоражы ӹнжӹштӹ лиэп, пуреш веле тымдышты.

^4-5 Нӹнӹ сӓмӹрӹк ӹдӹрӓмӓшвлӓм марыштым, тетяштӹм яраташ, ышан-шотан, ире, тонышы пӓшӓм яжон ӹштӹшӹ, пуры, ӹшке марыштым колыштшы лиӓш тымдышты. Йымын шамакшы ӹнжӹ мыскылалт.

⁶ Тенгеок ӹрвезӹвлӓм ышан-шотан лиӓш кымылангды,

⁷ ӹшке пуры пӓшӓэт доно цилӓ шотыштат кыце тӧр ӹлӓш келмӹм анжыкты. Тымдымет ире, шотеш пиштӹмӓшӹм лыкшы, локтылалтдымы лижӹ.

⁸ Попымет кынан лижӹ, вырсаш вирӹм ӹнжӹ пу, тӹнӓм ваштареш шалгышывлӓ мӓ гишӓннӓ нимамат худам келесен ак кердеп, намысыш пырат.

⁹ Рабвлӓм хозаштым цилӓ шотыштат колышташ, ярал лиӓш тымды, ваштареш ӹнжӹштӹ попеп,

¹⁰ ӹнжӹштӹ шолыштеп, со пуры дӓ ӹнян лиштӹ, тенге нӹнӹ Ытарышынан, Йымынан, тымдымыжым цилӓ шотыштат кӱшкӹ лӱктӓт.

¹¹ Йымын ытарышы благодатьшы цилӓ эдемлӓн пачылтын.

^12-13 Ӹнянӹмӹ пуры цӓшӹм – Кого Йымын, мӓмнӓм Ытарышы Иисус Христосын лӹмлештӓрӓлтмӹжӹ толмым – вычымына годым благодать мӓмнӓм, Йымым шотлыдымаш дӓ сӓндӓлӹкӹштӹшӹ сулыкан шыкланымаш гӹц карангын, кӹзӹтшӹ курымышты ире ыш доно, тӧр, Йымым шотеш пиштен ӹлӓш тымда.

¹⁴ Мӓмнӓм цилӓ худа пӓшӓ гӹц ытараш, Ӹшкӹлӓнжӹ халыкым ирӹктӓш манын, Иисус Христос Ӹшкӹмжӹм мӓ верцнӓ пуэн. Ти халык пуры пӓшӓм пиш цацен ӹштӓ.

¹⁵ Тидӹм попы, кӓнгӓшӹм пу, улы властетӹм кычылтын пелештӹ. Иктӓт тӹньӹм шотлыдымы ӹнжӹ ли.