СВЯТОЙ АПОСТОЛ ПАВЕЛӸН РИМЛЯНВЛӒЛӒН КОЛТЫМЫ СИРМӒШӸЖӸ 5 - У Согонь

5 ГЛАВА 1 Йымын пурыжы гишӓн сусу лимӓш. 12 Адам дон Христос.

¹ Тенгежӹ, ӹнянӹмӓш доно тӧрӹш лӓкмӹкӹ, мӓмнӓн Господь Иисус Христос гач Йымы дон мӓ лоштына тыр улы.

² Ӹнянӹмӹнӓ гишӓн Христос мӓлӓннӓ благодать докы корным пачын, мӓ благодатьышты ылына дӓ, Йымы сага лӹмлештӓрӓлтмӹлӓн уанен, ӹвӹртенӓ.

³ Тидӹ гишӓн веле агыл, парвалымына гишӓнӓт ӹвӹртенӓ. Мӓ пӓленӓ, парвалымы гӹц цӹтӹмӓш лӓктеш,

⁴ цӹтӹмӓш гӹц – тергӹмӹм эртен кердмӓш, тергӹмӹм эртен кердмӹ гӹц – уанымаш.

⁵ Уанымаш намысыш ак пырты, вет Йымын яратымашыжы мӓлӓннӓ пумы Святой Шӱлӹш гач шӱмӹшкӹнӓ опталалтын.

⁶ Кынам мӓ эче силадымы ылынна, пӓлдӹртӹмӹ жепӹн Христос мӓ верцнӓ, сулыканвлӓ верц, колен.

⁷ Тӧр ӹштӹшӹ верц иктӓжӹ колынежӹ ма. Пуры эдем верц, ӓнят, иктӓжӹ колаш смеен кердеш.

⁸ Но Христос эче сулыкан ылмына годымок мӓ верцнӓ колен, тенге Йымы мӓ докына яратымашыжым анжыкта.

⁹ Христосын Вӹржӹ доно мӓ тӧрӹш лӓктӹннӓ гӹнь, кӹзӹт Тӹдӹ Йымын шӹдӹжӹ гӹц лачокок мӓмнӓм ытара.

¹⁰ Эче Йымын тышманжы ылмына годымок Эргӹжӹн колымыжы Тӹдӹн доно мӓмнӓм пуремден гӹнь, ӹнде, пуреммӹ паштек, Эргӹжӹн ӹлӹмӓшӹжӹ гач ытаралтына.

¹¹ Тидӹ веле агыл, мӓмнӓм кӹзӹт пуремдӹшӹ Иисус Христос Господьна гач мӓ Йымы доно когоэшненӓ.

¹² Тенгежӹ, сулык ик эдем гач сӓндӓлӹкӹш толын, а сулык гач – колымаш, дӓ колымаш цилӓ эдем йыхыш ванжен, вет цилӓнок сулыкым ӹштенӹт.

¹³ Закон лӓкмешкӓт, сӓндӓлӹкӹштӹ сулык ылын, но закон уке гӹнь, сулык шотыш ак нӓлӓлт.

¹⁴ Тенге гӹнят, Адамын гань сулыкым ӹштӹдӹмӹвлӓ вӹлнӓт колымаш хозаланен. Адам гӹц тӹнгӓлӹн Моисей якте тенге ылын. Толшашлык Эдемӹн сӹнжӹ Адам ылын.

¹⁵ Но Йымын подаркажым Адамын сулыкшы доно тӓнгӓштӓрӓшӓт ак ли. Вет ик эдемӹн сулыкшы гишӓн шукын коленӹт гӹнят, ик Эдемӹн, Иисус Христосын, благодатьшы гишӓн Йымын благодатьшы дӓ подаркажы шукы эдемлӓн эчеӓт утларак линӹт.

¹⁶ А Йымын пумы подаркажым тӹ ик эдемӹн сулыкшы кышкы шоктымы доно тӓнгӓштӓрӓш ак ли: ик сулык гишӓн суд дӓ вуйнаматыш лыкмаш лиэш, а Йымын подаркажы верц шукы сулык гӹц тӧрӹш лыкмаш лиэш.

¹⁷ Иктӹн сулыкшы гишӓн колымаш тӹ ик эдем гач хозаланаш тӹнгӓлӹн гӹнь, Йымын кого благодатьшым дӓ тӧрӹш лыкмаш подаркажым нӓлшӹвлӓ лачокок ик Эдем, Иисус Христос, гач ӹлӹмӓшӹштӹ кугижӓлӓнӓш тӹнгӓлӹт.

¹⁸ Тенге, кыце ик эдемӹн сулыкшы гишӓн цилӓ эдем вуйнаматыш лӓктеш, тенгеок ик Эдемӹн тӧр пӓшӓжӹ цилӓ эдемӹм тӧрӹш лыктеш дӓ ӹлӹмӓшӹм пуа.

¹⁹ Кыце ик эдемӹн шамак колыштдымыжы шукым сулыканым ӹштен, тенгеок Иктӹн шамак колыштмыжы шукым тӧрӹш лыктеш.

²⁰ Сулык шукемжӹ манын, закон лӓктӹн. А кышты сулык шукемӹн, тӹштӹ Йымын благодатьшат пиш шукы лин.

²¹ Кыце сулык хозаланен дӓ колымашкы канден, тенгеок Йымын благодатьшат тӧр ӹштӹмӓш гач хозаланаш тӹнгӓлеш дӓ мӓмнӓн Господьна Иисус Христос гач курымаш ӹлӹмӓшӹш нӓнгеӓ.