Пачм 1 - У Согонь

1 ГЛАВА 1 Анзыл шамак. 4 Вӓшлимӹ шамаквлӓ. 9 Иоаннын Христосым ужмыжы.

¹ Иисус Христосын пачмашыжы; шукышты агыл ма лишӓшлыкым ӹшке цоравлӓжӹлӓн анжыкташ манын, ти пачмашым Йымы Иисус Христослан пуэн. Тӹдӹжӹ цилӓ тидӹм Иоанн цоражы докы колтымы Ангелжӹ гач анжыктен.

² Йымын шамакшы дӓ Иисус Христосын пӓлдӹртен попымыжы гишӓн – цилӓ мам ужмыжы гишӓн Иоанн пӓлдӹртен попа.

³ Пророкла попымы ти шамакым лыдшы дӓ колыштшывлӓ, тӹшӓкен сирӹмӹм шоктышывлӓ цӓшӓн ылыт, вет шокталтмы жеп лишемӹн.

^4-5 Иоанн дорц Асиштӹшӹ шӹм церкӹлӓн. Кӱ улы, Кӱ ылын дӓ Кӱ толеш, Тӹдӹ дорц, Тӹдӹн престолжы анзылнышы шӹм шӱлӹш дорц дӓ ӹнян свидетель, колышывлӓ логӹц сек пӹтӓри ӹлӹжшӹ, сӓндӓлӹк вӹлнӹшӹ кугижӓвлӓн вуйлатышышты Иисус Христос дорц тӓлӓндӓ благодать дӓ тыр лижӹ. Тӹдӹ мӓмнӓм яратен дӓ ӹшке Вӹржӹ доно сулыквлӓнӓ гӹц мышкын ирӹктен,

⁶ Йымын, ӹшке Ӓтяжӹн, кугижӓ дон священниквлӓжӹм мӓмнӓм ӹштен. Тӹдӹлӓн курым-курымеш лӹмлештӓрӓлтмӓш дӓ сила лижӹ! Аминь.

⁷ Теве Тӹдӹ пӹлвлӓ лошты толеш, Тӹдӹм цилӓн ӹшке сӹнзӓштӹ доно ужыт, ужыт Тӹдӹм шыралшывлӓӓт, сӓндӓлӹк вӹлнӹшӹ цилӓ йых Тӹдӹ анзылны мӓгӹрӓш тӹнгӓлеш. Тенгеок лиэш, аминь.

⁸ «Мӹнь Альфа дӓ Омега, Тӹнгӓлтӹш дӓ Мычаш ылам», – манеш Господь, Тӹдӹ, Кӱ улы, Кӱ ылын дӓ Кӱ толеш, Цилӓ Кычышы.

⁹ Мӹнь, Иоанн, Иисус Христосын орлыкшым, Кугижӓншӹжӹм дӓ цӹтӹмӓшӹжӹм тӓ донда иквӓреш нӓлшӹ шӱмбелдӓ, Йымын шамакшы верц дӓ Иисус Христос гишӓн пӓлдӹртен попымем верц Патмос лӹмӓн островышты ылынам.

¹⁰ Господьын кечӹнжӹ мӹньӹм Шӱлӹш ӓвӓлтен, дӓ пыч гӹц лӓкшӹ гань кого юкым шайыцем колынам. Тӹдӹ попен: «Мӹнь Альфа дӓ Омега, Пӹтӓришӹ дӓ Остатка ылам.

¹¹ Мам ужметӹм книгӓш сирӹ дӓ Асиштӹ ылшы церкӹвлӓлӓн колты: Ефесӹш, Смирнаш, Пергамыш, Фиатираш, Сардисӹш, Филадельфиш дӓ Лаодикиш».

^12-13 Мӹнь донем попышы юк кӱн ылеш, пӓлӓш манын, сӓрнӓл анжальым. Сӓрнӓлмӹкем, шӹм шӧртньӹ светильникӹм дӓ нӹнӹ лошты Эдем Эргӹлӓ кайшым ужым. Тӹдӹ кужы выргемӹм чишӹ дӓ онгжы йӹр шӧртньӹ ӹштӹм ӹштӓлшӹ ылын.

¹⁴ Тӹдӹн вуйжы дӓ ӱпшӹ ош миж гань, лым гань ошы, а сӹнзӓжӹ тыл салым ганьы,

¹⁵ ялжы йӹлгӹжшӹ той ганьы, вуйта камакаэш кальымы, а юкшы кого вӹд ружгымы ганьы ылыныт.

¹⁶ Вургымла кидешӹжӹ Тӹдӹ шӹм шӹдӹрӹм кычен, ышмажы гӹц кок тӹрге пӹсӹ меч лӓктӹн, а шӹргӹвӹлӹшӹжӹ – кечӹвӓл ӹрдӹн валгалтшы кечӹ гань.

¹⁷ Тӹдӹм ужмыкем, ялышкыжы мӹнь колышы ганьы кенвазынам. Тӹдӹ вургымла кидшӹм вӹкем пиштен дӓ келесен: «Ит лӱд. Мӹнь Пӹтӓришӹ дӓ Остатка

¹⁸ дӓ Ӹлӹшӹ ылам; Мӹнь колышы ылынам, а теве Мӹнь курым-курымеш ӹлӹшӹ ылам, аминь, дӓ колымаш дон адын сыравачышты Мӹнь донем.

¹⁹ Тенгежӹ, мам ужметӹм – ма улым дӓ тилец вара ма лишӓшлыкым – сирӹ.

²⁰ Вургымла кидӹштем тӹньӹн ужмы шӹм шӹдӹр дӓ шӹм шӧртньӹ светильник теве тидӹм анжыктат: шӹм шӹдӹр – шӹм церкӹн Ангелвлӓжӹ, тӹньӹн ужмы шӹм светильникшӹ – шӹм церкӹ».