Мк 9 - У Согонь

9 ГЛАВА 1 Валгалт вашталтмаш. 14 Худа шӱлӹш доно орланышы ӹрвезӹм паремдӹмӓш. 30 Иисус колышашлыкшы дӓ ӹлӹжшӓшлыкшы гишӓн угӹц шайыштеш. 33 Кӱ когорак? 38 Кӱ мӓ ваштарешнӓ агыл, тӹдӹ мӓ верцнӓ. 42 Аздарымы гишӓн.

¹ Тӹдӹ нӹнӹлӓн келесен: «Тӓлӓндӓ лачок попем: Йымын Кугижӓншӹн цилӓ сила доно толмыжым ужмешкӹ, тиштӹ шалгышы логӹц южшы ак колы».

² Куд кечӹ эртӹмӹкӹ, Иисус Петрӹм, Иаковым, Иоанным сагажы нӓлӹн дӓ нӹнӹм кӱкшӹ кырык вӹкӹ ӹшкетӹштӹм нӓнген. Тӹштӹ нӹнӹ анзылны валгалт вашталтын.

³ Тӹдӹн выргемжӹ йӹлгӹжшӹ, лым ганьы когон ошы лин. Мӱлӓндӹ вӹлнӹшӹ ик ошемдӹшӓт тенге ошемден ак керд.

⁴ Нӹнӹлӓн Илия доно Моисей кайыныт дӓ Иисус доно попенӹт.

⁵ Петр Иисуслан келесен: «Равви! Тиштӹ ылмына пиш яжо. Ӓлдӓ кым амашым ӹштенӓ: иктӹм Тӹлӓнет, иктӹм Моисейлӓн дӓ Илиялан иктӹм».

⁶ Тыменьшӹвлӓжӹ когон лӱдӹнӹт, седӹндон Петр мам попымыжымат пӓлӹде.

⁷ Ти жепӹштӹ пӹл толын дӓ нӹнӹм леведӹн. А пӹл гӹц юк шактен: «Тидӹ Мӹньӹн яратымы Эргем, Тӹдӹм колыштда».

⁸ Тӹнӓмок, йӹрвӓш анжалмыкышты, Иисус гӹц пасна сагашты ӹнде иктӹмӓт ужделыт.

⁹ Кырык гӹц валымышты годым Иисус келесен: «Эдем Эргӹ колымаш гӹц ӹлӹжмешкӹжӹ, мам ужмыдам иктӹлӓнӓт идӓ попы».

¹⁰ Нӹнӹ Иисусын шамакшым колыштыныт дӓ, колымаш гӹц ӹлӹж кӹньӹлмӓш мам анжыкта манын, иктӹ-весӹштӹ гӹц ядыштыныт.

¹¹ Тыменьшӹвлӓжӹ Иисус гӹц ядыныт: «Но кыце законым тымдышывлӓ сек анзыц Илия толшашлык маныт?»

¹² «Лачокат, – пелештен Иисус, – Илия анзыцрак толеш дӓ цилӓ тӧрлен йӓмдӹлӓ. А сирӹмӹ семӹнь Эдем Эргӹ шукы орланышашлык дӓ шотеш пиштӹдӹмӹ лишӓшлык.

¹³ Тӓлӓндӓ попем: Илияат ӹнде толын, тӹдӹн доно, мам шаненӹт, тидӹм ӹштенӹт. Тӹдӹн гишӓн тенге сирӹмӹ».

¹⁴ Молы тыменьшӹвлӓжӹ докы мӹнгеш толмыкыжы, Иисус йӹрӹштӹ шукы халыкым ужын. Законым тымдышывлӓ нӹнӹ доно кӹрмӓшенӹт.

¹⁵ Иисусым ужмыкы, цилӓ халык когон ӧрӹн, эдемвлӓ Тӹдӹн докы тӧрӧк кыргыж миэнӹт дӓ пуры шамаквлӓ доно вӓшлинӹт.

¹⁶ Иисус закон тымдышывлӓ гӹц ядын: «Ма гишӓн нӹнӹ доно кӹрмӓшедӓ?»

¹⁷ Халык логӹц ик эдем пелештен: «Тымдышы, мӹнь Тӹнь докет йӹлмӹдӹмӹ шӱлӹш доно мутьымы эргем канденӓм.

¹⁸ Хоть-кышты худа шӱлӹш тӹдӹм кыча, мӱлӓндӹ вӹкӹ кенвацта. Эргемӹн ышма гӹцшӹ шонг лӓктеш, тӹдӹ пӱм пыреш, сепнен вазеш. Мӹнь тыменьшӹвлӓэт гӹц худа шӱлӹшӹм поктен лыкташ ядынам, но нӹнӹ кердделыт».

¹⁹ Иисус нӹнӹлӓн келесен: «О, ӹнянӹдӹмӹ шачыш! Кышкевек Мӹнь тӓ сагада лиӓм? Кышкевек Мӹнь тӓмдӓм тырхем? Ӹрвезӹм Мӹнь докем кандыда».

²⁰ Тӹдӹм Иисус докы канденӹт. Иисусым ужын, худа шӱлӹш тӹнӓмок ӹрвезӹм цӹтӹрӹктен. Ӹрвезӹ рокыш кенвазын, пӓрдӓлӹн, дӓ ышмажы гӹц шонг лӓктӓш тӹнгӓлӹн.

²¹ Ӹрвезӹн ӓтяжӹ гӹц Иисус ядын: «Кынамшен тӹдӹн доно тенге лин?» Тӹдӹ келесен: «Изижӹ годшенок.

²² Худа шӱлӹш тӹдӹм, пӹтӓрӓш манын, шукы гӓнӓ тылышкат, вӹдӹшкӓт шуэн. Но иктӓ-мам ӹштен кердӓт гӹнь, мӓмнӓм ӹжӓлӓйӹ, мӓлӓннӓ палшы!»

²³ Иисус тӹдӹлӓн келесен: «Иктӓ-маняры ӹнянен кердӓт гӹнь – ӹнянӹшӹ цилӓ ӹштен кердеш».

²⁴ Ӹрвезӹн ӓтяжӹ тӹнӓмок сӹнзӓвӹд яре сӹгӹрӓл колтен: «Господь, мӹнь ӹнянем! Ӹнянен моштыдымемлӓн палшы!»

²⁵ Шукы халык погынымым ужын, Иисус худа шӱлӹшлӓн шӱден: «Апай дӓ клухой шӱлӹш, Мӹнь тӹлӓнет шӱдем: тӹдӹн кӧргӹжӹ гӹц лӓк дӓ мӹнгеш ит тол!»

²⁶ Худа шӱлӹш сӹгӹрӓл колтен, ӹрвезӹм когон цӹтӹрӹктен дӓ вӹкӹ лӓктӹн. Ӹрвезӹ колышы гань лин. «Колыш», – шукынжы попенӹт.

²⁷ Но Иисус тӹдӹм кидшӹ гӹц кычен, кӹньӹлӓшӹжӹ палшен. Ӹрвезӹ кӹньӹл шагалын.

²⁸ Кынам Иисус пӧртӹшкӹ пырен, тыменьшӹвлӓжӹ ӹшкетӹшток Тӹдӹ гӹц ядыныт: «Малын мӓ ти шӱлӹшӹм поктен лыктын кердделна?»

²⁹ Иисус келесен: «Ти йыхым ыдылмы дӓ постьымы доно веле поктен лыкташ лиэш».

³⁰ Иисус дон тыменьшӹвлӓжӹ, ти вӓрӹм коден, Галилей гач кенӹт. Нӹнӹ кышты ылмыштым Иисус халыклан ӹнежӹ пӓлдӹртӹ ылын.

³¹ Тӹдӹ тыменьшӹвлӓм тымден дӓ нӹнӹлӓн попен: «Эдем Эргӹ эдем кидӹш пумы лиэш, дӓ Тӹдӹм пуштыт. Пуштмыкы, кымшы кечӹн Тӹдӹ ӹлӹж кӹньӹлеш».

³² Но ти шамакым нӹнӹ ынгылыделыт, а Тӹдӹ гӹц ядаш лӱдӹнӹт.

³³ Иисус Капернаумыш толын. Пӧртӹш пырымыкы, Тӹдӹ тыменьшӹвлӓжӹ гӹц ядын: «Тӓ корнышты ма гишӓн попышда?»

³⁴ Но тыменьшӹвлӓжӹ нимат попыделыт, вет корнышты нӹнӹ ӹшке лоштышты кӱ сек кого ылеш манын хытыренӹт.

³⁵ Тӹнӓм Иисус шӹнзӹн, Ӹшке йӹржӹ луаткок тыменьшӹжӹм поген дӓ келесен: «Кӱ сек анзылны линежӹ, тӹдӹ сек шайылны, цилӓлӓн тӓрзӹ лижӹ».

³⁶ Иисус тетям нӓлӹн, лошкышты шагалтен, элтӓлен дӓ попен:

³⁷ «Кӱ тидӹ гань ик тетям Мӹньӹн лӹмем верц нӓлеш – тӹдӹ Мӹньӹм нӓлеш. А кӱ Мӹньӹм нӓлеш, тӹдӹ Мӹньӹм веле агыл, Мӹньӹм Колтышымат нӓлеш».

³⁸ Иисуслан Иоанн келесен: «Тымдышы! Тӹньӹн лӹмет доно иӓвлӓм поктен лыкшы эдемӹм ужынна. Тӹдӹ мӓ сагана агыл, седӹндон мӓ тӹдӹм цӓрӹшнӓ».

³⁹ Но Иисус келесен: «Тӹдӹм идӓ цӓрӹ. Кӱ Мӹньӹн лӹм доно цӱдӓм ӹштӓ, тӹдӹ Мӹнь гишӓнем тӧрӧк худам попен ак керд.

⁴⁰ Кӱ тӓ ваштарешдӓ агыл, тӹдӹ тӓ верцдӓ ылеш.

⁴¹ Тӓлӓндӓ лачок попем: кӱ Мӹньӹн лӹмем верц дӓ Христосын ылмыда гишӓн тӓлӓндӓ карка вӹдӹм йӱӓш пуа гӹнь, тӹдӹ наградым нӓлде ак код.

⁴² А Мӹлӓнем ӹнянӹшӹ техень изирӓквлӓ логӹц иктӹжӹм тӧр корны гӹц кӱ аздарен карангда гӹнь, шӱшкӹжӹ вӓкш кӱм сӓкен, тӹдӹм тангыжыш шуат гӹнь, тӹдӹлӓн яжорак лиэш ыльы.

⁴³ Кидет тӹньӹм аздарынежӹ гӹнь, тӹдӹм роал шу. Йӧртӓш лидӹмӹ тылыш, тылан адыш кок кидӓн вӓрештмешкӹ, ӹлӹмӓшӹш пел кидӓн пыраш тӹлӓнет яжорак.

⁴⁴ Тылан адышты ”нӹнӹн шукшыштат ак колы, тылат ак йӧрӹ”.

⁴⁵ Ялет тӹньӹм аздарынежӹ гӹнь, тӹдӹм роал шу. Йӧртӓш лидӹмӹ тылыш, тылан адыш кок ялан шуэн колтымы лимешкӹ, ӹлӹмӓшӹш пел ялан пыраш тӹлӓнет яжорак.

⁴⁶ Тылан адышты ”нӹнӹн шукшыштат ак колы, тылат ак йӧрӹ”.

⁴⁷ Сӹнзӓэт тӹньӹм аздарынежӹ гӹнь, тӹдӹм лыктын шу. Тылан адыш кок сӹнзӓӓн шумы лимешкӹ, Йымын Кугижӓншӹш пел сӹнзӓӓн пыраш тӹлӓнет яжорак.

⁴⁸ Тылан адышты ”нӹнӹн шукшыштат ак колы, тылат ак йӧрӹ”.

⁴⁹ Цилӓ эдем тыл доно санзалтымы лиэш, дӓ цилӓ жертва санзал доно санзалтымы лиэш.

⁵⁰ Санзал яжо. Но санзал санзалан ак ли гӹнь, ма доно тӹдӹм угӹц санзаланым ӹштен кердӹдӓ? Кӧргӹштӹдӓ санзал лижӹ, дӓ иктӹ-весӹдӓ доно тырын ӹлӹдӓ».