Мк 8 - У Согонь

8 ГЛАВА 1 Нӹл тӹжем эдемӹм пукшымаш. 11 Пӓлӹм анжыкташ ядмаш. 14 Иродын дӓ фарисейвлӓн руашышты. 22 Вифсаидӹштӹ слӧпӧйӹм паремдӹмӓш. 27 Петр Иисусым Христос манеш. 31 Иисус ӹшке колышашлыкшы дӓ ӹлӹжшӓшлыкшы гишӓн шайыштеш.

¹ Ти кечӹвлӓнок когон шукы эдем погынен. Нӹнӹн нимат качкашышты уке ылын. Иисус тыменьшӹвлӓжӹм Ӹшке докыжы ӱжӹн дӓ нӹнӹлӓн келесен:

² «Ти эдемвлӓм ӹжӓлӓем. Нӹнӹ ӹнде кым кечӹ Мӹнь донем ылыт, а качкашышты нимат уке.

³ Мӹнь нӹнӹм токышты шужышым колтем гӹнь, корнышты когон янгылат. Вет южшы мӹндӹрц толшы ылыт».

⁴ Тыменьшӹвлӓжӹ Тӹдӹлӓн келесенӹт: «Цилӓм пукшаш манын, тиштӹ, пустыньышты, кышец тинӓр киндӹм нӓлӓш лиэш?»

⁵ Иисус нӹнӹ гӹц ядын: «Тӓмдӓн маняр сыкырда улы?» Нӹнӹ келесенӹт: «Шӹмӹт».

⁶ Иисус халыклан мӱлӓндӹ вӹлӓн вӓрлӓнӓш шӱден. Вара Тӹдӹ шӹм сыкырым нӓлӹн, Йымылан таум ӹштен, сыкырым тодылын дӓ, тыменьшӹвлӓжӹ шӓлӓтӹштӹ манын, нӹнӹлӓн пуэн. Нӹнӹжӹ киндӹм халыклан шӓлӓтенӹт.

⁷ Нӹнӹн таманяр изи колыштат ылын. Иисус тидӹмӓт благословаен дӓ колымат пайылен пуаш шӱден.

⁸ Цилӓн качкыныт дӓ темӹнӹт. Вара шӹм корзин кодшы киндӹ лаштыкым погенӹт.

⁹ Качшывлӓжӹ нӹл тӹжем нӓрӹн ылыныт. Иисус халыкым ыжатен колтен,

¹⁰ тӹнӓмок тыменьшӹвлӓжӹ доно иквӓреш пышыш шӹнзӹн дӓ Далмануф кымдемӹш кен.

¹¹ Иисус докы фарисейвлӓ толыныт дӓ кӹрмӓшӓш тӹнгӓлӹнӹт. Тӹдӹм тергӓш шанен, пӹлгом гӹц пӓлӹкӹм анжыкташ ядыныт.

¹² Иисус келгӹн шӱлӓлтен дӓ пелештен: «Малын ти шачыш пӓлӹкӹм ядеш? Тӓлӓндӓ лачок попем, ти шачышлан пӓлӹк ак пуалт».

¹³ Нӹнӹм коден, Иисус угӹц пышыш шӹнзӹн дӓ вес сирӹш кен.

¹⁴ Тыменьшӹвлӓжӹ сагашты киндӹм нӓлӓш монденӹт. Пышышты нӹнӹн ик сыкыр веле ылын.

¹⁵ Иисус нӹнӹлӓн шӱден: «Анжыда, фарисейвлӓн руаш гӹц дӓ Иродын руаш гӹц перегӓлтдӓ».

¹⁶ Но тыменьшӹвлӓжӹ ӹшке лоштышты попенӹт: «Мӓмнӓн киндӹнӓ уке».

¹⁷ Тидӹм пӓлен, Иисус келесен: «Тӓ малын киндӹнӓ уке манын попедӓ? Тӓ эчеӓт ада уж дӓ ада ынгылы ма? Шӱмдӓ эчеӓт кӱӓнгӹн ма?

¹⁸ Тӓмдӓн сӹнзӓдӓ улы, ада уж? Пӹлӹшдӓ улы, ада кол? Ада ӓшӹндӓрӹ?

¹⁹ Мӹнь вӹц тӹжем эдемлӓн вӹц сыкырым тодыл пумем паштек тӓ кодшы сыкыр лаштыкшы доно маняр комдым темендӓ?» «Луаткоктым», – пелештенӹт тыменьшӹвлӓжӹ.

²⁰ «А кынам Мӹнь нӹл тӹжем эдемлӓн шӹм сыкырым тодын шӓлӓтенӓм, маняр комды кодшы сыкыр лаштыкшым погендӓ?» «Шӹмӹтӹм», – келесенӹт нӹнӹ.

²¹ Иисус нӹнӹлӓн келесен: «Тӓ кыце ада ынгылы?»

²² Вифсаидӹш толмыкыжы, Иисус докы слӧпӧйӹм канденӹт дӓ тервенжӹ тӹкнӓш сарвален ядыныт.

²³ Иисус слӧпӧй эдемӹм кидшӹ гӹц кычен, сола гӹц виден лыктын. Вара тӹдӹн сӹнзӓшкӹжӹ шӹвӓлӹн, вӹкӹжӹ кидшӹм пиштен дӓ ядын: «Иктӓ-мам ужат?»

²⁴ Слӧпӧй эдем анжалын дӓ келесен: «Эртен кешӹ эдемвлӓм ужам, нӹнӹ пушӓнгӹлӓ кайыт».

²⁵ Иисус тӹдӹн сӹнзӓшкӹжӹ угӹц кидшӹм пиштен. Иисус тӹдӹлӓн анжалаш шӱден, дӓ тӹдӹ паремӹн, цилӓ яжон ужаш тӹнгӓлӹн.

²⁶ Иисус тӹдӹм токыжы колтен дӓ келесен: «Солаш ит пыры дӓ тӹштӹ тидӹ гишӓн иктӹлӓнӓт ит попы».

²⁷ Иисус тыменьшӹвлӓжӹ доно иквӓреш Филипп-Кесари сагашы солавлӓшкӹ кен. Корнышты Иисус нӹнӹ гӹц ядын: «Мӹньӹм эдемвлӓ кӱэш шотлат?»

²⁸ Тыменьшӹвлӓжӹ келесенӹт: «Иктӹвлӓжӹ – Крестӹшӹ Иоаннеш, весӹвлӓжӹ – Илияэш, кымшывлӓжӹ – пророквлӓ логӹц иктешӹжӹ».

²⁹ Тӹдӹ нӹнӹ гӹц ядын: «А тӓжӹ Мӹньӹм кӱэш шотледӓ?» Петр Тӹдӹлӓн келесен: «Тӹнь Христос ылат».

³⁰ Ӹшке гишӓнжӹ Иисус нӹнӹлӓн иктӹлӓнӓт шайышташ шӱдӹде.

³¹ Вара Иисус Эдем Эргӹн шукы орлыкым ужшашлыкшы гишӓн тыменьшӹвлӓжӹлӓн тымдаш тӹнгӓлӹн. Халыкын когоракшывлӓ, архиерейвлӓ дӓ закон тымдышывлӓ Тӹдӹм ярдымеш лыктыт. Тӹдӹм пуштыт, но кымшы кечӹн Тӹдӹ ӹлӹжеш.

³² Тидӹ гишӓн Тӹдӹ тӧрӧк попен. А Петр Иисусым ӧрдӹжӹш ӱжӹн нӓнген дӓ Тӹдӹн ваштареш попаш тӹнгӓлӹн.

³³ Но Иисус сӓрнӓлӹн, тыменьшӹвлӓжӹ вӹкӹ анжалын дӓ Петрлӓн пингӹдӹн келесен: «Каранг Мӹнь дорцем, сатана! Тӹньӹн шанымет эдемӹн, а Йымын агыл».

³⁴ Вара Иисус халыкым дӓ тыменьшӹвлӓжӹм Ӹшке докыжы ӱжӹн дӓ келесен: «Кӱ Мӹнь паштекем кенежӹ, ӹшке гӹцшӹ карангжы, ӹшке крестӹжӹм нӓлжӹ дӓ Мӹнь паштекем ашкедшӹ.

³⁵ Вет кӱ ӹшке йӓнгжӹм ытарынежӹ, тӹдӹ ямда, а кӱ йӓнгжӹм Мӹнь верцем дӓ Пуры Увер верц ямда, тӹдӹ йӓнгжӹм ытара.

³⁶ Сӓндӓлӹк хӓлӓ ӹшкӹлӓнжӹ сӹнген нӓлеш дӓ йӓнгжӹм локтылеш гӹнь, эдемлӓн махань пайда?

³⁷ Ӹшке йӓнгжӹм сылен нӓлӓш эдем мам пуа?

³⁸ Шӓхӓр дӓ сулыкан ти шачыш лошты кӱ Мӹнь гӹцем дӓ Мӹньӹн шамакем гӹц важылеш, Эдем Эргӓт Ӓтяжӹн лӹмлештӓрӓлтмӓшӹштӹ святой Ангелвлӓ сага иквӓреш толмыжы годым тӹдӹ гӹц важылеш».