Мк 7 - У Согонь

7 ГЛАВА 1 Когораквлӓн овуцашты. 24 Финики ӹдӹрӓмӓшӹн ӹнянӹмӓшӹжӹ. 31 Клухойым паремдӹмӓш.

¹ Иисус докы Иерусалим гӹц фарисей дӓ законым тымдышы икманяр эдем погынен,

² дӓ Тӹдӹн тыменьшӹвлӓжӹ логӹц кыдыжы лявӹрӓн кид доно, кидӹм мышде, киндӹм качмыштым ужмыкы, нӹнӹм вырсенӹт.

³ Вет фарисейвлӓ дӓ молы цилӓ иудейвлӓ, когораквлӓн овуцам шоктен, кидӹм яжон мышде, качделыт.

⁴ Пазар гӹц толмыкышты, нӹнӹ мышкылтде ак качеп. Тилец пасна молы шукы овуцамат шоктат, шамак толшеш, каркам, коршокым, вӹргеньӹ падым, олмангам мышмы овуцаат ылын.

⁵ Седӹндон фарисейвлӓ дӓ законым тымдышывлӓ Иисус гӹц ядыныт: «Малын Тӹньӹн тыменьшӹвлӓэт когораквлӓн овуцашты семӹнь ак ӹштеп? Малын нӹнӹ мышдымы кид доно киндӹм качкыт?»

⁶ Иисус нӹнӹлӓн келесен: «Яжон каяш цацышывлӓ, кынам Исаия тӓ гишӓндӓ пророкла попен, лачок ылын. Сирӹмӹ: ”Ти халык Мӹньӹм шамак доно шотеш пиштӓ, но нӹнӹн шӱмӹштӹ Мӹнь гӹцем мӹндӹрнӹ.

⁷ Такеш нӹнӹ Мӹньӹм шотеш пиштӓт: нӹнӹн тымдымышты эдемӹн шӱдӹмӹжӹ веле”.

⁸ Тӓ Йымын шӱдӹмӹжӹ гӹц карангында, эдемвлӓн овуцам веле шоктедӓ. Тӓ кружкам дӓ каркам мышкыда дӓ техеньӹм эче шукы молым ӹштедӓ».

⁹ Тӹдӹ пакыла попен: «Ӹшкӹмдӓн овуцадам шокташ манын, тӓ Йымын шӱдӹмӹжӹм моштен карангдедӓ.

¹⁰ Моисей келесен: ”Ӓтя-ӓвӓтӹм шотеш пиштӹ”, тенгеок ”Кӱ ӹшке ӓтяжӹ ӓли ӓвӓжӹ гишӓн худа шамакын попа, тӹдӹм пуштышты”.

¹¹ А тӓ вес семӹнь попедӓ. Кӱ ӓтяжӹлӓн ӓли ӓвӓжӹлӓн ”Тӹлӓнет пушашлыкем – тидӹ корван, тидӹм Йымылан пуэнӓм” манеш гӹнь,

¹² тилец вара тӓ тӹдӹм ӹшке ӓтя-ӓвӓжӹлӓн палшаш цӓредӓ.

¹³ Тенге тӓ Йымын шамакшым ӹшкӹмдӓн овуца доно ӧрдӹжӹш карангдедӓ. Техеньӹм тӓ шукым ӹштедӓ».

¹⁴ Иисус цилӓ халыкым Ӹшке докыжы ӱжӹн дӓ келесен: «Мӹньӹм цилӓнӓт колыштда дӓ ынгылыда.

¹⁵ Эдемӹн кӧргӹш вӹлец пырышы нимат тӹдӹм лявӹртен ак керд. Ма тӹдӹн кӧргӹжӹ гӹц лӓктеш, тидӹ эдемӹм лявӹртӓ.

¹⁶ Кӱн пӹлӹшӹжӹ колышташ улы – колжы!»

¹⁷ Кынам Иисус халык логӹц пӧртӹш пырен, тыменьшӹвлӓжӹ Тӹдӹ гӹц тыштен келесӹмӹжӹ гишӓн ядыныт.

¹⁸ Тӹдӹ келесен: «Тӓӓт ада ынгылы ма? Эдем кӧргӹш вӹлец пырышы нимат тӹдӹм лявӹртен ак керд. Тидӹм ада ынгылы ма?

¹⁹ Тӹдӹ эдемӹн йӓнгӹшкӹжӹ агыл, а кӧргӹшкӹжӹ вӓрештӹн, тӹдӹ вашт лӓктеш веле». Тенге хоть-махань качкышым ире манын.

²⁰ Тӹдӹ пакылажы попен: «Эдемӹн кӧргӹжӹ гӹц лӓкшӹ тӹдӹм лявӹртӓ.

²¹ Кӧргӹ гӹц, эдемӹн йӓнгжӹ гӹц худа шанымаш, шӓхӓрлӓнӹмӓш, йӓл вӓтӹ доно каштмаш, пуштмаш,

²² шолыштмаш, шыкланымаш, худам ӹштӹмӓш, алталымаш, важылдымаш, завидуйымаш, мыскылымаш, когоэшнӹмӓш, ышдымын ӹлӹмӓш –

²³ цилӓ ти худажы эдемӹн кӧргӹ гӹц лӓктеш дӓ тӹдӹм лявӹртӓ».

²⁴ Иисус тӹшецӹн Тир дӓ Сидон мӱлӓндӹш кен. Тӹдӹ ик пӧртӹшкӹ пырен дӓ тидӹ гишӓн иктӓт ӹнжӹ пӓлӹ манын шанен, но пӓлдӹрнӹде кодын кердде.

²⁵ Иисусын толмыжы гишӓн ик ӹдӹрӓмӓш колын. Тӹдӹн ӹдӹржӹ худа шӱлӹш доно мутьымы ылын. Иисус докы ӹдӹрӓмӓш толын дӓ ял анзыланжы кымал вазын.

²⁶ Ӹдӹрӓмӓш язычник ылын, тӹдӹ Сириштӹшӹ Финикиштӹ шачын. Тӹдӹ Иисусым ӹдӹржӹн кӧргӹжӹ гӹц иӓм поктен лыкташ сарвален.

²⁷ Иисус тӹдӹлӓн келесен: «Сек анзыц тетявлӓ теммешкӹштӹ качкышты. Нӹнӹ гӹц киндӹм шыпшын нӓлӹн, пивлӓлӓн шуаш яжо агыл».

²⁸ Ӹдӹрӓмӓш келесен: «Тенге, Господь, но пивлӓӓт тетя вилӹмӹ сыкыр пыдыргывлӓм стӧл лӹвӓлнӹ качкыт».

²⁹ Иисус тӹдӹлӓн манын: «Тенге келесӹмет гишӓн ке, ӹдӹретӹн кӧргӹжӹ гӹцӹн иӓ лӓктӹн».

³⁰ Ӹдӹрӓмӓш токыжы толын дӓ тетяжӹм вӓрӹштӹ кишӹм ужын. Иӓ тӹдӹн кӧргӹжӹ гӹцӹн лӓктӹн.

³¹ Иисус Тир дӓ Сидон кымдем гӹц лӓктӹн дӓ Декаполис вӓрвлӓ гач эчеӓт Галилей тангыж докы толын.

³² Иисус докы раскыдын попен керддӹмӹ клухойым канденӹт дӓ тӹдӹн вӹкӹ кидӹм пиштӓш ядыныт.

³³ Иисус ти эдемӹм халык гӹц ӧрдӹжӹш нӓнген, парнявлӓжӹм тӹдӹн пӹлӹшӹшкӹжӹ цикӓлӹн, вара шӹвӓлӹн дӓ тӹдӹн йӹлмӹжӹм тӹкӓлӹн,

³⁴ пӹлгомыш анжалын, кужын шӱлӓлтен дӓ тӹдӹлӓн келесен: «Еффафа!» Ти шамакшы «пачылт» манмы лиэш.

³⁵ Ти эдемӹн пӹлӹшӹжӹ дӓ йӹлмӹжӹ тӹнӓмок пачылтыныт. Тӹдӹ раскыдын попаш тӹнгӓлӹн.

³⁶ Тидӹ гишӓн Иисус иктӹлӓнӓт попаш шӱдӹде, но Тӹдӹ маняры утларак цӓрен, эдемвлӓ тӹнӓрӹ шукырак увертӓренӹт.

³⁷ Эдемвлӓ когон ӧрӹн попенӹт: «Тӹдӹн цилӓ ӹштӹмӹжӓт яжо: клухойвлӓм колын кердшӹм ӹштӓ, апайвлӓм попышым ӹштӓ!»