Мк 6 - У Согонь

6 ГЛАВА 1 Назаретӹштӹ ӹлӹшӹвлӓ Иисуслан ак ӹнянеп. 7 Иисус луаткок Апостолжым колта. 14 Крестӹшӹ Иоаннын колымыжы. 30 Вӹц тӹжем эдемӹм пукшымаш. 45 Иисус вӹд вӹлец кеӓ. 53 Геннисаретӹштӹ церӓнвлӓм паремдӹмӓш.

¹ Иисус тӹшецӹн лӓктӹн дӓ кушмы кымдемӹшкӹжӹ толын. Тыменьшӹвлӓжӓт сагажы ылыныт.

² Кукшыгечӹ шомыкы, Тӹдӹ синагогышты тымдаш тӹнгӓлӹн. Иисусым колыштшывлӓ лошты шукынжы ӧрӹн ядыштыныт: «Кышецӹн Тӹдӹн цилӓ тидӹ? Махань кого ыш Тӹдӹлӓн пуалтын? Махань цӱдӓвлӓ Тӹдӹн кид доно ӹштӓлтӹт!

³ Тӹдӹжӹ плотник, Мариян эргӹжӹ, Иаковын, Иосийӹн, Иудан дӓ Симонын шӱмбелӹштӹ агыл ма? Тӹдӹн ӓкӓжӹвлӓӓт мӓ лоштынаок тиштӹ ылыт». Нӹнӹ Тӹдӹлӓн ӹнянӹделыт.

⁴ Но Иисус нӹнӹлӓн келесен: «Ӹшке кушмы кымдемӹштӹжӹ, ӹшке йыхыштыжы дӓ тонышывлӓ лошты веле пророкым ак шотлеп».

⁵ Тӹштӹ Тӹдӹ нимахань цӱдӓм ӹштен кердде. Икманяр эдемӹм веле, кидшӹм вӹкӹштӹ пиштен, паремден.

⁶ Ти эдемвлӓн ӹнянӹмӓшӹштӹ уке гишӓн Иисус ӧрӹн. Иисус вара йӹр ылшы солавлӓштӹ каштын дӓ тымден.

⁷ Тӹдӹ луаткок тыменьшӹжӹм ӱжӹн дӓ коктын-коктын колташ тӹнгӓлӹн. Тӹдӹ нӹнӹлӓн худа шӱлӹшӹм поктен лыкташ властьым пуэн

⁸ дӓ корнышкы панды гӹц пасна нимамат нӓлӓш шӱдӹде: киндӹмӓт, тӓпнӓкӹмӓт, ӹштӹшкӹ оксамат,

⁹ но ялышкы ялеш чимӹ хӓдӹрӹм чиӓш, а кок выргемӹм чиӓш агыл.

¹⁰ Иисус нӹнӹлӓн попен: «Кыды пӧртӹш пыредӓ, вес вӓре кемешкӹдӓ, тӹшток ӹлӹдӓ.

¹¹ Кышты тӓмдӓм ак пыртеп ӓли ӹнештӹ колыштеп гӹнь, тӹшец кедӓ дӓ ял пыракдам пачкалтыда. Тидӹжӹ нӹнӹлӓн анзыцок шижтӓрӹмӓш лиэш. Тӓлӓндӓ лачок попем: суд кечӹн Содом дон Гоморралан ти хала гӹц куштылгырак лиэш».

¹² Тыменьшӹвлӓжӹ кенӹт дӓ халыклан сулык гӹц карангаш дӓ Йымы докы мелӹн лиӓш келмӹм увертӓрен тымденӹт.

¹³ Нӹнӹ шукы иӓм поктен лыктыныт дӓ шукы церлӹм ӱ доно шӹренӹт, паремденӹт.

¹⁴ Ирод кугижӓӓт Иисус гишӓн колын, вет Тӹдӹн лӹмжӹ цилӓ вӓре пӓлӹмӹ лин. Ирод попен: «Тидӹ Крестӹшӹ Иоанн колымаш гӹц ӹлӹжӹн, седӹндон цӱдӓвлӓм ӹштӓ».

¹⁵ Весӹвлӓжӹ – Илия маныныт. А кымшывлӓжӹ – пророк, ӓли молнамшы пророквлӓ логӹц иктӹжӹ гань, маныныт.

¹⁶ Тидӹ гишӓн колмыкы, Ирод келесен: «Тидӹ Иоанн, кыдын вуйжым мӹнь роалыктенӓм. Тӹдӹ колымаш гӹц ӹлӹжӹн».

¹⁷ Вет Ирод ӹшкежӹ Иоанным кычаш колтен дӓ тӹдӹм кызаматыш питӹрӓш шӱден ылын. Тенге тӹдӹ Филипп шӱмбелжӹн Иродиада вӓтӹжӹ гишӓн ӹштен. Ирод Иродиадам марлан нӓлӹн.

¹⁸ Седӹндон Иоанн тӹдӹлӓн попен: «Туан шӱмбелетӹн вӓтӹжӹ доно ӹлӓш ак яры».

¹⁹ Иоанн вӹкӹ шӹдӹжӹм Иродиада кӧргӹштӹжӹ кычен, тӹдӹм пушташ шанен, но кердде.

²⁰ Ирод пӓлен: Иоанн тӧр ӹштӹшӹ дӓ святой эдем, седӹндон тӹдӹ гӹц лӱдӹн дӓ тӹдӹм переген. Иоаннын попымыжым колыштын, Ирод шукы ӹштен, тӹдӹм колышташ яратен.

²¹ Иродиадалан ярал йӧн Иродын шачмы кечӹн лин. Цилӓ тӧрӓжӹлӓн, салтак вуйлатышыжылан дӓ Галилейӹштӹшӹ сек кого эдемвлӓлӓн Ирод празныкым ӹштен.

²² Тӹшкӹ Иродиадан ӹдӹржӹ толын дӓ куштен, Иродланат, тӹдӹн сага качшы хынавлӓжӹлӓнӓт когон келшен. Ӹдӹрлӓн кугижӓ келесен: «Мам шанет, яд, мӹнь цилӓ пуэм».

²³ Тӹдӹлӓн эче цуратлен: «Хоть-мам ядат гӹнят, цилӓ пуэм, пел кугижӓншемӓт».

²⁴ Ӹдӹр лӓктӹн дӓ ӓвӓжӹ гӹц ядын: «Мам ядаш?» Ӓвӓжӹ келесен: «Крестӹшӹ Иоаннын вуйжым».

²⁵ Ӹдӹр тӹнӓмок кугижӓ докы пӹсӹн пырен дӓ келесен: «Крестӹшӹ Иоаннын вуйжым тарелкӓэш мӹлӓнем кӹзӹток пу!»

²⁶ Кугижӓ когон сылыкангын, но цилӓ хына анзылны цуратленӓт, тореш ӹнежӹ келесӹ ылын.

²⁷ Иоаннын вуйжым кандаш шӱден, тӹнӓмок тӹдӹ оролым колтен.

²⁸ Оролы кен, Иоаннын вуйжым кызаматышты роал шуэн дӓ, тарелкӓэш пиштен, ӹдӹрлӓн канден пуэн. А ӹдӹр ӓвӓжӹлӓн пуэн.

²⁹ Тидӹ гишӓн колмыкышты, Иоаннын тыменьшӹвлӓжӹ толыныт. Нӹнӹ тӹдӹн кӓпшӹм нӓлӹнӹт дӓ шӹгерӹш пиштенӹт.

³⁰ Апостолвлӓ Иисус докы погыненӹт дӓ цилӓ Тӹдӹлӓн шайыштыныт: мам ӹштенӹт, халыкым малан тымденӹт.

³¹ Иисус нӹнӹлӓн келесен: «Ӓлмӓдӓ йӓрӓ вӓрӹш ӹшкетнӓок кенӓ, тӹштӹ тӓ изиш кӓнӓлтедӓ». Кешӹ дӓ толшы эдем пиш шукы ылын, седӹндон нӹнӹн качкашат жепӹштӹ ылде.

³² Нӹнӹ, пышыш шӹнзӹн, йӓрӓ вӓрӹш ӹшкетӹшток кенӹт.

³³ Но шукынжы кемӹштӹм ужыныт дӓ нӹнӹм пӓленӹт, паштекӹштӹ цилӓ халавлӓ гӹц кыргыжыныт, тӹшкӹ нӹнӹ гӹц анзыц миэн шоныт дӓ Тӹдӹн докы погыненӹт.

³⁴ Сирӹш лӓкмӹкӹжӹ, пиш шукы халыкым ужынат, Иисус нӹнӹм ӹжӓлӓен. Эдемвлӓ кӹтӧзӹ гӹц пасна кодшы шарыквлӓ гань ылыныт. Иисус нӹнӹм шукылан тымдаш тӹнгӓлӹн.

³⁵ Шукы веремӓ эртӹмӹкӹ, тыменьшӹвлӓжӹ Иисус докы толыныт дӓ келесенӹт: «Тидӹ халык ӹлӹдӹмӹ вӓр, ӹнде жепӓт шукы эртен.

³⁶ Халыкым колты. Нӹнӹ лишӹл солавлӓшкӹ дӓ ӹлемвлӓшкӹ кештӹ дӓ ӹшкӹлӓнӹштӹ киндӹм нӓлӹштӹ, вет качкаш нимаштат уке».

³⁷ Но Иисус попен: «Тӓ нӹнӹлӓн качкаш пуда». Тыменьшӹвлӓжӹ келесенӹт: «Мӓ кокшӱдӹ динариэш киндӹм нӓлӓш кешӓшлык дӓ нӹнӹлӓн пукшышашлык ылына ма?»

³⁸ Иисус ядын: «Тӓмдӓн маняр киндӹдӓ улы? Кедӓ, анжалда». Пӓлен нӓлмӹкӹштӹ, нӹнӹ келесенӹт: «Вӹц сыкыр дӓ эче кок кол».

³⁹ Иисус халыкым ыжар шудыш цуцан-цуцан шӹндӓш шӱден.

⁴⁰ Вӹцлӹ, шӱдӹ эдем доно цуцан-цуцан шӹнзӹнӹт.

⁴¹ Вара Иисус вӹц сыкыр дон кок колым нӓлӹн дӓ, пӹлгомыш анжалын, благословаен. Вара сыкырым тодылын, тыменьшӹвлӓжӹлӓн пуэден, а нӹнӹжӹ халыклан шӓлӓтенӹт. Кок колымат цилӓлӓн пайылен.

⁴² Цилӓн качкыныт дӓ темӹнӹт.

⁴³ Кодшы киндӹ лаштыквлӓ дӓ кол доно эче луаткок корзинӹм теменӹт.

⁴⁴ Качшы пӱэргӹвлӓ вӹц тӹжем нӓрӹн ылыныт.

⁴⁵ Тӹнӓмок Иисус тыменьшӹвлӓжӹлӓн, тӧрӧк пышыш шӹнзӹн, вес сирӹш, Вифсаида велкӹ, Ӹшкежӹ гӹц анзыцрак ванжаш шӱден. А Ӹшкежӹ халыкым ыжатен колташ кодын.

⁴⁶ Халыкым ыжатымыкы, Иисус кырыкыш ыдылаш кен.

⁴⁷ Вады лин. Пыш тангыж покшалны, а Иисус ӹшкетшок сирӹштӹ ылын.

⁴⁸ Тыменьшӹвлӓжӹн мардеж ваштареш пыш доно ясыланен кемӹштӹм ужынат, йыдым, нӹлӹмшӹ орол годым, Иисус тангыж вӹлец нӹнӹ докы ашкед толын дӓ нӹнӹм эртен кенежӹ ылын.

⁴⁹ Тӹдӹн тангыж вӹлец ашкед толмыжым ужын, сӹнзӓштӹлӓн каеш, машаненӹт, саслаш тӹнгӓлӹнӹт.

⁵⁰ Цилӓн Тӹдӹм ужыныт дӓ лӱдӹнӹт, но Иисус тӹнӓмок нӹнӹ доно попаш тӹнгӓлӹн дӓ келесен: «Тырлыда, идӓ лӱд, тидӹ Мӹнь ылам».

⁵¹ Иисус нӹнӹ докы пышыш шӹнзӹн. Мардеж цӓрнен. Тыменьшӹвлӓжӹ ӧрӹнӹт дӓ когон цӱдеенӹт.

⁵² Нӹнӹн шӱмӹштӹ кӱӓнгшӹ ылын, седӹндон нӹнӹ киндӹ доно ма лимӹмӓт кӹзӹт якте эче ынгылен шоктыделыт.

⁵³ Тангыжым ванжымыкышты, Геннисарет мӱлӓндӹш толыныт дӓ сирӹшкӹ лӓктӹнӹт.

⁵⁴ Пыш гӹц лӓкмӹкӹштӹ, тӹштӹшӹ халык Иисусым тӧрӧк пӓлен

⁵⁵ дӓ йӹрвӓш цилӓ вӓре кыргыжтал сӓрнен. Иисус кышты ылмым пӓлен нӓлмӹкӹ, церӓнвлӓм тӹшкӹ вӓрге намалаш тӹнгӓлӹнӹт.

⁵⁶ Кышкы Тӹдӹ толын, – халашкы, солашкы ӓли ӹлемӹшкӹ, – церлӹвлӓм ӧлицӓш намал лыктыныт дӓ Иисусын хоть выргем пачышкыжы веле тӹкнӓш церлӹвлӓлӓн ирӹкӹм пуаш Иисус гӹц ядыныт. Тӹдӹн тервен тӹкнӹшӹвлӓ цилӓн паремӹнӹт.