Мк 3 - У Согонь

3 ГЛАВА 1 Иисус кошкышы кидӓн эдемӹм паремдӓ. 7 Галилей тангыж тӹрӹштӹ. 13 Иисус луаткок Апостолжым айырен нӓлеш. 20 Иӓвлӓн вуйлатышыштын силажым кычылтеш манын, Иисусым йӓтлӓт. 31 Иисусын ӓвӓжӹ дӓ шӱмбелвлӓжӹ.

¹ Иисус эчеӓт синагогыш толын. Тӹштӹ эдемӹн ик кидшӹ кошкышы ылын.

² Кукшыгечӹн Иисус ти эдемӹм паремдӓ ма манын, Тӹдӹм йӓтлӓш вирӹм кӹчӓлшӹвлӓ тӹшленӹт.

³ Иисус кошкышы кидӓн эдемлӓн келесен: «Кӹньӹл дӓ анзыкы лӓк».

⁴ Вара Иисус йӓл гӹц ядын: «Кукшыгечӹн мам ӹштӓш лиэш, пурым ӓли худам? Йӓнгӹм ытараш ӓли пӹтӓрӓш?» Нӹнӹ нимат келесӹделыт.

⁵ Йӓнгӹштӹ кӱӓнгмӹ гишӓн ойхырен, Иисус вӹкӹштӹ шӹдӹн анжалын дӓ тӹ эдемлӓн келесен: «Кидетӹм виктӓлтӹ». Тӹдӹ виктӓлтен, дӓ тӹ кидшӹ паремӹн, весӹ ганьок лин.

⁶ Фарисейвлӓ лӓктӹнӹт дӓ тӹнӓмок Ирод велкӹ ылшывлӓ доно иквӓреш Иисус ваштареш кӓнгӓшӓш тӹнгӓлӹнӹт. Нӹнӹ Тӹдӹм пӹтӓрӹнештӹ ылын.

^7-8 Иисус тыменьшӹвлӓжӹ доно иквӓреш тангыж тӹрӹш кен. Паштекшӹ Галилей, Иудей, Иерусалим, Идумей дӓ Иордан рекӓ вес монгыр гӹц, Тир доно Сидон вӓрвлӓ гӹц когон шукы халык толын. Иисусын мам ӹштӹмӹжӹ гишӓн колын, Тӹдӹн докы когон шукын погыненӹт.

⁹ Тӹдӹм халык ӹнжӹ пӹзӹрӹ манын, тыменьшӹвлӓжӹлӓн пышым йӓмдӹлӓш шӱден.

¹⁰ Иисус шукы эдемӹм паремден, седӹндон, Тӹдӹн тервен тӹкнӓш манын, церӓнвлӓ цилӓн анзыкы шӹшкӹлтӹнӹт.

¹¹ Худа шӱлӹшвлӓ, Тӹдӹм ужын, анзыланжы шынгалт вазыныт дӓ сасленӹт: «Тӹнь Йымын Эргӹ ылат!»

¹² Кӱ ылмыжы гишӓн ӹнжӹштӹ попеп манын, Иисус нӹнӹлӓн пачкатан келесен.

¹³ Иисус кырык вӹкӹ кузен дӓ, кӱм айырен нӓлӹн, Ӹшке докыжы ӱжӹн. Нӹнӹ Тӹдӹн докы толыныт.

¹⁴ Луаткоктыжым сагажы лиӓш шагалтен. Тӹдӹ нӹнӹм увертӓрен тымдаш колтынежӹ ылын,

¹⁵ нӹнӹлӓн церлӹвлӓм паремдӓш дӓ иӓвлӓм поктен лыкташ властьым пуэн.

¹⁶ Тидӹ Симон – Иисус тӹдӹм Петр манын лӹмден,

¹⁷ Зеведейӹн Иаковшы дон Иаковын Иоанн шоляжы – Иисус нӹнӹм Воанергес манын лӹмден, тӹдӹ «хӹдӹртӹшӹн эргӹвлӓжӹ» манмым анжыкта,

¹⁸ Андрей, Филипп, Варфоломей, Матфей, Фома, Иаков – Алфейӹн эргӹжӹ, Фаддей, Симон Кананит

¹⁹ дӓ Искариот Иуда, тӹдӹ варарак Иисусым выжален.

²⁰ Нӹнӹ пӧртӹш пыренӹт, тӹшкӹ эчеӓт когон шукы халык погынен. Седӹндон Иисус дӓ тыменьшӹвлӓжӹ киндӹм качкашат йӓрсӹделыт.

²¹ Тидӹ гишӓн колмыкы, Иисусын лишӹлвлӓжӹ, Тӹдӹм сагашты нӓнгеӓш манын, тӹшкӹ кенӹт. Тӹдӹ ышыжым ямден манын, эдемвлӓ попенӹт.

²² Иерусалим гӹц толшы закон тымдышывлӓ попенӹт: «Тӹдӹн кӧргӹштӹжӹ веельзевул улы. Иӓвлӓн вуйлатышыштын силажы доно иӓвлӓм поктен лыктеш».

²³ Тӹнӓм Иисус, нӹнӹм Ӹшке докыжы ӱжӹнӓт, нӹнӹлӓн тыштен келесен: «Кыце сатана ӹшкӹмжӹм ӹшке поктен лыктын кердеш?

²⁴ Кугижӓншӹ ӹшке кӧргӹштӹжӹ кредӓлеш гӹнь, тӹдӹ кодын ак керд,

²⁵ дӓ пӧртӹштӹ икӹжӓк-иктӹ ваштареш кредӓлӹт гӹнь, иквӓреш лин ак кердеп.

²⁶ Сатана ӹшке ваштарешӹжӹ кӹньӹлеш дӓ коктеш шелӓлтеш гӹнь, тӹдӹ кодын ак керд. Тӹдӹ пӹтӓ.

²⁷ Силан эдемӹм пидӹн пиштӹде, тӹдӹн пӧртӹшкӹжӹ иктӓт пырен дӓ товыражым кравен ак керд. Пидӹн пиштӹмӹкӹ веле, пӧртшӹм краваш лиэш.

²⁸ Тӓлӓндӓ лачок попем: хоть-маняры мыскыла гӹнят, эдемӹн шачшыжын цилӓ сулыкшат, мыскылымыжат простялтеш,

²⁹ но кӱ Святой Шӱлӹшӹм мыскыла, тӹдӹ нигынамат ак простялт. Тӹдӹ курымешлӓн вуйнаматанеш лыкмы лиэш».

³⁰ Кӧргӹштӹжӹ худа шӱлӹш улы манмылан Иисус тенге келесен.

³¹ Иисусын Ӓвӓжӹ дӓ шӱмбелвлӓжӹ толыныт. Нӹнӹ тӱнӹ шалгенӹт, Иисусым ӱжӓш колтенӹт.

³² Тӹдӹн йӹр эдемвлӓ шӹнзенӹт. Иисуслан келесенӹт: «Тӱнӹ Ӓвӓт, шӱмбелвлӓэт дон ӓкӓвлӓэт Тӹньӹм ядыт».

³³ А Иисус нӹнӹлӓн пелештен: «Кӱ Мӹньӹн ӓвӓм дӓ кӱ мӹньӹн шӱмбелвлӓэм ылыт?»

³⁴ Тӹдӹ йӹржӹ шӹнзӹшӹвлӓ вӹкӹ анжалын дӓ келесен: «Теве Мӹньӹн ӓвӓм дон шӱмбелвлӓэм.

³⁵ Кӱ Йымын ирӹкшӹм ӹштӓ, тӹдӹ Мӹньӹн шӱмбелем, ӓкӓ-шыжарем дӓ ӓвӓм».