Мк 2 - У Согонь

2 ГЛАВА 1 Иисус пларичӓн эдемӹм паремдӓ. 13 Иисус Левийӹм ӱжеш. 18 Постьымы гишӓн ядмаш. 23 Иисус дӓ кукшыгечӹ.

¹ Икманяр кечӹштӹ Иисус угӹц Капернаумыш толын, дӓ эдемвлӓ пӧртӹштӹ ылмыжы гишӓн колыныт.

² Тӹнӓмок тӹнӓр халык погынен, амасадӹрешӓт вӓр кодде. Иисус нӹнӹлӓн Йымын шамакым попен.

³ Тӹдӹн докы нӹл пӱэргӹ пларичӓн эдемӹм намал канденӹт.

⁴ Халык шукы ылынат, Иисус докы лишем кердделыт дӓ, Тӹдӹн туре пӧрт левӓшӹм пачын, шӓрӹшӹштӹ кишӹ церлӹ эдемӹм ыраж гӹц валтенӹт.

⁵ Иисус нӹнӹн ӹнянӹмӹштӹм ужын дӓ пларичӓн эдемлӓн келесен: «Эргӹм, тӹньӹн сулыкет простялтеш!»

⁶ Законым тымдышы икманяр эдем тӹштӹ шӹнзенӹт дӓ ӹшке йӓнгӹштӹштӹ шаналтенӹт:

⁷ «Кыце Тӹдӹ тенге Йымым мыскылен попа? Йымы гӹц пасна кӱ сулыкым простен кердеш?»

⁸ Нӹнӹн тенге шанымыштым Иисус ӹшке шӱлӹшӹжӹ доно тӹнӓмок шижӹн дӓ келесен: «Малын тӓ йӓнгӹштӹдӓ тенге шанедӓ?

⁹ Мажы куштылгырак? Пларичӓн эдемлӓн ”Тӹньӹн сулыкет простялтеш” ӓли ”Кӹньӹл, шӓрӹшетӹм погы дӓ ашкед” манмыжы?

¹⁰ Но тӓ пӓлен лидӓ: Эдем Эргӹн мӱлӓндӹ вӹлнӹ сулыкым простяш властьшы улы». Иисус пларичӓн эдемлӓн келесен:

¹¹ «Мӹнь тӹлӓнет попем: кӹньӹл, шӓрӹшетӹм погы дӓ токет ке».

¹² Цилӓн сӹнзӓ анзылны тӹдӹ тӹнӓмок кӹньӹлӹн, шӓрӹшӹжӹм погалтен дӓ лӓктӹн кен. Цилӓн когон ӧрӹнӹт, Йымым лӹмлештӓренӹт дӓ попенӹт: «Техеньӹм мӓ нигынамат ужделна!»

¹³ Иисус угӹц тангыж тӹрӹш лӓктӹн. Улы халык Тӹдӹн докы толын, дӓ Иисус нӹнӹм тымден.

¹⁴ Лӹм оксам погымы вӓр дорц эртӹмӹжӹ годым Иисус тӹштӹ Алфейӹн Левий эргӹжӹн шӹнзӹмӹм ужын дӓ тӹдӹлӓн манын: «Паштекем ке». Левий кӹньӹлӹн дӓ Тӹдӹн паштек кен.

¹⁵ Вара Иисус Левийӹн пӧртӹштӹжӹ качкын. Иисус дон тыменьшӹвлӓжӹ сага лӹм оксам погышывлӓ дӓ сулыканвлӓ шукын качкыныт. Тӹдӹн паштек каштшывлӓ лошты техеньвлӓжӹ шукын ылыныт.

¹⁶ Нӹнӹн доно иквӓреш Иисусын качмыжым ужмыкышты, законым тымдышывлӓ дон фарисейвлӓ Тӹдӹн тыменьшӹвлӓжӹлӓн попенӹт: «Кыце Тӹдӹ лӹм оксам погышывлӓ дӓ сулыканвлӓ доно иквӓреш качкеш дӓ йӱэш?»

¹⁷ Иисус тидӹм колын дӓ нӹнӹлӓн келесен: «Шулыкан эдемлӓн агыл паремдӹшӹ келеш, а церлӹлӓн. Мӹнь тӧр ӹштӹшӹвлӓм агыл, сулыканвлӓм сулык гӹц карангаш ӱжӓш толынам».

¹⁸ Иоаннын дӓ фарисейвлӓн тыменьшӹвлӓштӹ постенӹт. Иисус докы толыныт дӓ попенӹт: «Малын Иоаннын дӓ фарисейвлӓн тыменьшӹвлӓштӹ постят, а Тӹньӹн тыменьшӹвлӓэт агеп?»

¹⁹ Иисус нӹнӹлӓн келесен: «Армары сагашты ылмы годым сӱӓнӹш толшы хынавлӓ постен кердӹт ма? Нӹнӹ сага армары ылмы годым постен ак кердеп.

²⁰ Но техень жеп толын шоэш, кынам армарым нӹнӹ дорц нӓлӹт, тӹнӓм, тӹ кечӹвлӓн, постяш тӹнгӓлӹт.

²¹ Тошты выргемӹм ошемдӹдӹмӹ мӹнер доно иктӓт ак тумышты. Техень тумыш шӹнзеш, выргемӹм кышкедеш, дӓ ыраж утларак когоэмеш.

²² Шун шоктыдымы якшар ӓрӓкӓм иктӓт тошты шувышыш ак темӹ, техень ӓрӓкӓ тошты шувышым кышкедеш. Ӓрӓкӓжӓт йоген пӹтӓ, шувышыжат нималан ярдымы лиэш. Шун шоктыдымы ӓрӓкӓм у шувышыш оптат».

²³ Икӓнӓ кукшыгечӹн Иисус шурны ныр гач эртен. Тыменьшӹвлӓжӹ, кешӹлӓштӹ, пӹрцӹ вуйвлӓм кӹрӓш тӹнгӓлӹнӹт.

²⁴ Фарисейвлӓ Иисуслан попенӹт: «Анжы, малын нӹнӹ кукшыгечӹн ӹштӓш шӱдӹдӹмӹм ӹштӓт?»

²⁵ Иисус келесен: «Кынам Давид дӓ сагажы ылшывлӓ шуженӹт дӓ качкашышты нимат ылде, тӹнӓм мам ӹштӹмӹжӹ гишӓн тӓ лыдделда ма?

²⁶ Жертвӹш кандымы киндӹм священниквлӓ гӹц молылан иктӹлӓнӓт качкаш ак яры ылын гӹнят, Авиафар архиерей годым Давид Йымын пӧртӹш пырен дӓ ти киндӹм качкын, сагажы ылшывлӓлӓнӓт пуэн».

²⁷ Вара Иисус келесен: «Кукшыгечӹ эдемлӓн, а эдем кукшыгечӹлӓн агыл.

²⁸ Седӹндон Эдем Эргӹ кукшыгечӹлӓнӓт хоза ылеш».