Мк 12 - У Согонь

12 ГЛАВА 1 Виноград ӓнгӓм кычышы эдемвлӓ гишӓн. 13 Лӹм окса кесарьлан. 18 Колымаш гӹц ӹлӹжмӹ гишӓн. 28 Сек кого шӱдӹмӓш. 35 Христос – Тӹдӹ кӱн эргӹжӹ? 38 Иисус законым тымдышывлӓ гишӓн шижтӓрӓ. 41 Тылык ӹдӹрӓмӓшӹн пумы жертвӹжӹ.

¹ Иисус нӹнӹлӓн тыштен попаш тӹнгӓлӹн. «Ик эдем ӓнгӓэшӹжӹ виноградым шӹнден. Тӹдӹн йӹр пичӹм пичен, виноград вӹдӹм пӹзӹрен лыкмы вӓрӹм капаен кынештӓрен, башньым ӹштен. Вара ӓнгӓжӹм виноградым куштышывлӓлӓн анжаш пуэн дӓ ӹшкежӹ кен.

² Жеп шомыкы, виноград куштышывлӓ докы виноградым нӓлӓш тӓрзӹжӹм колтен.

³ Нӹнӹ тӓрзӹжӹм кыченӹт, тӹдӹм шинӹт дӓ нимадеок мӹнгеш колтенӹт.

⁴ Тӹнӓм хоза нӹнӹ докы вес тӓрзӹм колтен, но тӹдӹн вӹкӹ кӱвлӓм кӹшкенӹт, вуйжым шушыртенӹт дӓ, мыскылен, токыжы колтенӹт.

⁵ Хоза эче вес тӓрзӹм колтен. Тӹдӹжӹм пуштыныт. Хоза шукы весӹвлӓмӓт колтен, но нӹнӹ цилӓштӹмӓт то шинӹт, то пуштыныт.

⁶ Хозан эче иктӹжӹ кодын: яратымы эргӹжӹ. Остаткаэш нӹнӹ докы эргӹжӹм колта. ”Эргӹм анзылны нӹнӹ намысланат”, – попен тӹдӹ.

⁷ Но виноградым анжышывлӓ иктӹ-весӹштӹлӓн попенӹт: ”Тӹдӹ наследник ылеш. Ӓлдӓ кенӓ дӓ тӹдӹм пуштына, тӹнӓм цилӓ мӓмнӓн лиэш”.

⁸ Нӹнӹ тӹдӹм роалтен кыченӹт, пуштыныт дӓ виноград ӓнгӓ гӹц шуэн колтенӹт.

⁹ Ӓнгӓ хоза ӹнде мам ӹштӓ? Тӹдӹ толеш, виноград анжышывлӓм пуштеш, а виноград ӓнгӓжӹм весӹвлӓлӓн пуа.

¹⁰ Писаништӹ тидӹм тӓ лыдделда ма? ”Пӧрт ӹштӹшӹвлӓн ярдымеш лыкмы кӱ негӹц огол кӱ лин,

¹¹ тидӹжӹ Господь гӹц, мӓмнӓн сӹнзӓ анзылны ӧрӹктӓрӹшӹ”.»

¹² Иудейвлӓн вуйлатышывлӓ Иисусын тыштен попымыжы нӹнӹ гишӓн ылмым ынгыленӹт, седӹндон Иисусым тӹнӓмок роалтен кычаш йӧнӹм кӹчӓлӹнӹт. Но нӹнӹ халык гӹц лӱдӹнӹт дӓ Иисусым коден кенӹт.

¹³ Иисусым шамакеш кычаш манын, Тӹдӹн докы икманяр фарисей дон Ирод велкӹ ылшывлӓм колтенӹт.

¹⁴ Нӹнӹ толыныт дӓ Тӹдӹлӓн попенӹт: «Тымдышы! Мӓ пӓленӓ: Тӹнь тӧр Эдем ылат. Тӹнь эдемлӓн ярал лиӓш цацымы гишӓн ат шаны, Тӹлӓнет цилӓн икань ылыт, а Йымын корныжылан тӧрӹм попен тымдет. Кесарьлан лӹм оксам тӱлӓш лиэш ӓли уке? Тӹдӹм мӓ тӱлӹшӓшлык ылына ӓли уке?»

¹⁵ Иисус нӹнӹн яжола каяш цацымыштым пӓлен дӓ келесен: «Малын Мӹньӹм тергедӓ? Мӹлӓм анжалаш динарим кандыда».

¹⁶ Тӹдӹлӓн оксам канденӹт. Иисус ядын: «Кӱм тиштӹ анжыктымы дӓ кӱн тиштӹ лӹмжӹ?» Нӹнӹ пелештенӹт: «Кесарьын».

¹⁷ Тӹнӓм Иисус нӹнӹлӓн келесен: «Тенгежӹ кесарьлан кесарьыным, Йымылан Йымыным пуда». Нӹнӹ Тӹдӹлӓн когон ӧрӹнӹт.

¹⁸ Ӹлӹж кӹньӹлмӓш уке маншы саддукейвлӓ вара Иисус докы толыныт. Нӹнӹ ядыныт:

¹⁹ «Тымдышы! Моисей мӓлӓннӓ тенге сирен: вӓтӓн тетядӹмӹ шӱмбелжӹ иктӓжӹн кола гӹнь, тӹдӹн вӓтӹжӹм ӹзӓжӹ ӓли шоляжы марлан нӓлшӓшлык дӓ колышын вырлыкшым пакыла шӓрӹшӓшлык.

²⁰ Шӹм шӱмбел ылыныт. Пӹтӓришӹжӹ ӹдӹрӹм нӓлӹн, тетяжӹ лидеок колен.

²¹ Седӹндон тылыкеш кодшы вӓтӹжӹм кокшыжы марлан нӓлӹн. Но тӹдӓт колен, тетяжӹ ылде. Кымшы донат тенгеок лин.

²² Цилӓн шӹмӹтӹнӓт тӹдӹм нӓлӹнӹт, иктӹштӹнӓт тетяштӹ кодде. Цилӓштӹ паштек ӹдӹрӓмӓшӓт колен.

²³ Ӹлӹжмӹкӹштӹ, кыце лиэш? Тӹдӹм шӹмӹтӹнӓт нӓлӹнӹт. Колымаш гӹц ӹлӹж кӹньӹлмӹкӹ, кӱн вӓтӹжӹ лиэш?»

²⁴ Иисус келесен: «Тӓ Писанимӓт, Йымын силажымат ада пӓлӹ, седӹндон ямын каштыда.

²⁵ Колымаш гӹц ӹлӹж кӹньӹлмӹкӹштӹ, эдемвлӓ ӹдӹрӹмӓт ак нӓлеп, марланат ак кеп. Нӹнӹ пӹлгомышты Ангелвлӓ гань лит.

²⁶ Колышывлӓн ӹлӹжмӹштӹ гишӓн Моисейӹн книгӓштӹжӹ тӓ лыдделда ма? Йылышы тӹшкӓ гӹц Моисейлӓн Йымы попен: ”Мӹнь Авраамын Йымыжы, Исаакын Йымыжы, Иаковын Йымыжы ылам.”

²⁷ Йымы колышывлӓн Йымышты агыл, Тӹдӹ ӹлӹшӹвлӓн Йымышты! Тӓ когонок самынь шанедӓ».

²⁸ Законым тымдышывлӓ логӹц иктӹжӹ, нӹнӹн соредӓлмӹштӹм колмыкы дӓ Иисусын яжон попымыжым ужмыкы, Тӹдӹн докы толын дӓ ядын: «Шӱдӹмӓш логӹц сек тӹнгжӹ кыды ылеш?»

²⁹ Иисус келесен: «Сек тӹнг шӱдӹмӓш тидӹ: ”Израиль, колышт! Мӓмнӓн Господь Йымына – ик Господь веле.

³⁰ Господь Йыметӹм шӱм вашт, йӓнг вашт, улы ынгылымашет доно, улы силаэт доно яраты”. Тидӹ сек кого шӱдӹмӓш.

³¹ Кокшы шӱдӹмӓш техеньок кого: ”Лишӹлетӹмӓт ӹшкӹметӹм яратымы семӹньок яраты”. Ти кок шӱдӹмӓш гӹц когоракшы укеӓт».

³² Закон тымдышы Тӹдӹлӓн келесен: «Когон яжо, Тымдышы! Тӹнь лачокым келесӹшӹц. Йымы иктӹ веле, Тӹдӹн гӹц пасна вес Йымы уке.

³³ Йымым шӱм вашт, улы ынгылымаш доно, улы йӓнг доно, улы сила доно яраташ, лишӹл эдемӹм ӹшкӹмӹм яратымы гань яраташ – тидӹ цилӓ пӹтӹмеш йылатымы дӓ мол жертва гӹцӓт шергӹрӓк».

³⁴ Закон тымдышын шот донок попымыжым ужын, Иисус тӹдӹлӓн келесен: «Тӹнь Йымын Кугижӓншӹ гӹц мӹндӹрнӹ ат ыл». Тидӹн паштек Иисуслан иктӓт ядмашым пуаш смейӹде.

³⁵ Йымын пӧртӹштӹ тымден попымыжы годым Иисус ядын: «Законым тымдышывлӓ кыце Христосым Давидӹн эргӹжӹ маныт?

³⁶ Святой Шӱлӹш кымылангдымы доно Давид ӹшкежӓт попен: ”Господь Господемлӓн келесен: Тӹньӹн тышманвлӓэтӹм ял лӹвӓкет пиштӹмешкем, Мӹньӹн вургымла велнем шӹнзӹ”.

³⁷ Давид ӹшкежӓт Тӹдӹм Господь манеш гӹнь, кыце Тӹдӹ Давидӹн Эргӹжӹ лин кердеш?» Шукы халык Иисусым улы кымылын колыштын.

³⁸ Иисус тымдымаштыжы попен: «Закон тымдышывлӓ гӹц ӹшкӹмдӓм перегӹдӓ. Нӹнӹ сӹлнӹ кужы выргемӹм чиӓш, халык погынымы вӓрвлӓштӹ эдемвлӓн жеплен вӓшлимӹштӹм яратат.

³⁹ Синагогвлӓштӹ сек анзылны шӹнзӹнештӹ дӓ празныкышты сек шотан вӓрӹм нӓлнештӹ.

⁴⁰ Нӹнӹ тылык ӹдӹрӓмӓшвлӓн пӧртӹштӹм незеремдӓт дӓ, йӓллӓн яжола каяш манын, шукы ыдылыт. Техеньвлӓм паснаок нелӹ суд выча».

⁴¹ Иисус жертва оксам пиштӹмӹ вӓр ваштареш шӹнзӹн дӓ халык тӹшкӹ оксам пиштӹмӹм анжен. Шукы паян шукы оксам пиштен.

⁴² Вара ик незер тылык ӹдӹрӓмӓш толын дӓ цилӓжӓт кок лептам, вес семӹньжӹ кодрантым пиштен.

⁴³ Иисус тыменьшӹвлӓжӹм Ӹшке докыжы ӱжӹн дӓ келесен: «Тӓлӓндӓ лачок попем: ти незер тылык ӹдӹрӓмӓшӹн жертва оксам пиштӹмӹ вӓрӹш жертвӹм пиштӹмӹжӹ молын пиштӹмӹштӹ гӹц шукырак.

⁴⁴ Нӹнӹ пайдашты гӹц утыжым пиштенӹт, а тӹдӹ, незер гӹнят, ма улыжым, ӹлӓшӹжӹ ма келмӹм, цилӓ пуэн».