Мк 11 - У Согонь

11 ГЛАВА 1 Иисус Иерусалимӹш пыра. 12 Кӹцкӹдӹмӹ смоква пушӓнгӹ. 15 Иисус Йымын пӧрт гӹц выжалышывлӓм поктен лыктеш. 20 Кошкышы смоква пушӓнгӹ. 27 Иисус гӹц Тӹдӹн властьшы гишӓн ядыштыт.

¹ Иерусалимӹш лишеммӹштӹ годым нӹнӹ Елеон кырыкыштышы Виффаги дӓ Вифани докы толыныт. Иисус кок тыменьшӹжӹм анзык колтен

² дӓ нӹнӹлӓн келесен: «Анзылныда кайшы солаш кедӓ. Тӹшкӹ пырымыкыда, ялштен шагалтымы сӓмӹрӹк оселым тӓ тӹнӓмок ужыда. Тишкевек тӹдӹн доно иктӓт кыдалыштде. Тӹдӹм шӱтӹдӓ дӓ тишкӹ виден кандыда.

³ Малын тидӹм ӹштедӓ манын ядыт гӹнь, осел Господьлан келеш, шукышты агыл тӹдӹм мӹнгеш колта, манын келесӹдӓ».

⁴ Тыменьшӹвлӓжӹ кенӹт, ӧлицӓштӹ капка сага ялштен шагалтымы сӓмӹрӹк оселым ужыныт дӓ тӹдӹм шӱтенӹт.

⁵ Тӹштӹ шалгышывлӓ логӹц кыдыжы нӹнӹлӓн попенӹт: «Мам тӓ ӹштедӓ? Малын сӓмӹрӹк оселым шӱтедӓ?»

⁶ Тыменьшӹвлӓжӹ Иисус шӱдӹмӹ семӹньок попенӹт. Эдемвлӓ нӹнӹм колтенӹт.

⁷ Нӹнӹ сӓмӹрӹк оселым Иисус докы канденӹт, осел вӹкӹ выргемӹштӹм пиштенӹт. Иисус осел вӹкӹ шӹнзӹн.

⁸ Шукынжы корнеш выргемвлӓштӹм шӓренӹт, молыжы – пушӓнгӹ гӹц пӹчкедӹмӹ укшвлӓм.

⁹ Анзыц кешӹ халыкат, паштек ашкедшӹвлӓӓт сасленӹт: «Осанна! Господьын лӹмжӹ доно Толшы хвальымы лижӹ!

¹⁰ Мӓмнӓн Давид ӓтянӓн Господь лӹм доно лишемшӹ Кугижӓншӹжӹ хвальымы лижӹ! Осанна кӱшнӹ йонгалтшы!»

¹¹ Иерусалимӹш мимӹкӹ, Иисус Йымын пӧртӹш пырен. Цилӓ анжен сӓрнен, но вады линӓт, луаткок тыменьшӹжӹ доно иквӓреш Вифанишкӹ кен.

¹² Вес кечӹн, Вифани гӹц лӓктӹн кемӹштӹ годым, Иисусын качмыжы шон.

¹³ Тӹдӹ мӹндӹрцок ӹлӹштӓш доно леведӓлтшӹ смоква пушӓнгӹм ужын. Кӹцкӹжӹ ӓнят улы манын, лишкӹрӓк анжалаш миэн. Но пушӓнгӹ докы лишеммӹкӹ, ӹлӹштӓшвлӓ гӹц пасна, нимамат моде. Кӹцкӹ кӱмӹ жеп эче шоде ылын.

¹⁴ Тӹнӓм Иисус смоква пушӓнгӹлӓн келесен: «Тӹньӹн кӹцкетӹм ӹнде иктӓт нигынамат ӹнжӹ кач!» Тыменьшӹвлӓжӹ Тӹдӹн шамакшым колыныт.

¹⁵ Иерусалимӹш толмыкышты, Иисус Йымын пӧртӹш пырен дӓ выжалышывлӓм, нӓлшӹвлӓм тӹшец покташ тӹнгӓлӹн. Тӹдӹ окса вашталтышывлӓн стӧлвлӓштӹм дӓ кӓдӹ выжалышывлӓн тӧнгӹлвлӓштӹм кымыктен шуэн,

¹⁶ Йымын пӧрт мычкы хӓдӹрӹм намал кеӓш иктӹлӓнӓт йӧнӹм пуде.

¹⁷ Тӹдӹ нӹнӹм тенге тымден: «”Мӹньӹн пӧртем цилӓ халыквлӓн йымыдылмы пӧртӹштӹ лиэш” манын сирӹмӹ агыл ма? А тӓжӹ тӹдӹм разбойниквлӓн пӹжӓшӹшкӹ сӓртендӓ».

¹⁸ Архиерейвлӓ дӓ законым тымдышывлӓ тидӹм колыныт. Иисусын тымдымыжы халыкым когон ӧрӹктӓрен, седӹндон нӹнӹ Тӹдӹ гӹц лӱдӹнӹт дӓ, Тӹдӹм кыце пушташ, йӧнӹм кӹчӓлӓш тӹнгӓлӹнӹт.

¹⁹ Вадеш Иисус хала гӹц кен.

²⁰ Иргодешӹжӹ ирок ирӹ, эртен кешӹлӓштӹ, нӹнӹ смоква пушӓнгӹм важ яктеок кошкен шагалшым ужыныт.

²¹ Ма лимӹм ӓшӹндӓрен, Петр Иисуслан попен: «Равви, анжы! Тӹньӹн шудалмы смоква пушӓнгет кошкен!»

²² Иисус нӹнӹлӓн келесен:

²³ «Йымылан ӹнянен ӹлӹдӓ. Тӓлӓндӓ лачок попем: ти кырыкланат кӱ ”Кӹньӹл дӓ тангыжыш шынгалт” манын шӱдӓ дӓ, коктешлӓнен шаныде, шӱдӹмӹжӹ семӹнь лиэш манын ӹнянӓ гӹнь, тенгеок лиэш.

²⁴ Седӹндон тӓлӓндӓ попем: ыдылмыда годым мам ядыда, цилӓок нӓлӹнӓ манын ӹнянӹдӓ, тӹнӓм ядмыда шокталтеш.

²⁵ Кынам йымыдыл шалгедӓ, тӓмдӓн иктӓжӹ ваштареш иктӓ-ма улы гӹнь, сулыкшым простьыда, тӹнӓм Пӹлгомыштышы Ӓтядӓӓт сулыкдам простя.

²⁶ Ада простьы гӹнь, Пӹлгомыштышы Ӓтядӓӓт тӓмдӓн сулыкдам ак простьы».

²⁷ Иисус тыменьшӹвлӓжӹ доно иквӓреш эчеӓт Иерусалимӹш толын. А кынам Иисус Йымын пӧртӹштӹ каштын, Тӹдӹн докы архиерейвлӓ, законым тымдышывлӓ, халыкын когораквлӓжӹ толыныт.

²⁸ Нӹнӹ ядыныт: «Махань власть доно цилӓ тидӹм ӹштӹлӓт? Кӱ Тӹлӓнет тидӹм ӹштӓш властьым пуэн?»

²⁹ Иисус нӹнӹлӓн келесен: «Мӹнят тӓ гӹцдӓ иктӹ гишӓн ядам. Мӹньӹн ядмашешем келесӹдӓ, тӹнӓм Мӹнят махань власть доно цилӓ тидӹм ӹштӹмем гишӓн келесем.

³⁰ Иоаннын крестӹмӹжӹ Пӹлгом гӹц ӓли эдемвлӓ гӹц ылын? Мӹлӓнем вӓшештӹдӓ».

³¹ Нӹнӹ ӹшке лоштышты хытыренӹт: «Пӹлгом гӹц манына гӹнь, Тӹдӹ келесӓ: ”Вара малын тӓ тӹдӹлӓн ӹнянӹделда?”

³² А эдемвлӓ гӹц манына гӹнь...» Нӹнӹ халык гӹц лӱдӹнӹт, Иоанным цилӓн лачок пророкеш шотленӹт.

³³ Седӹндон нӹнӹ Иисуслан келесенӹт: «Ана пӓлӹ». Иисус келесен: «Тенгежӹ Мӹнят махань власть доно тидӹм ӹштӹмем ам келесӹ».