Мф 28 - У Согонь

28 ГЛАВА 1 Ӹлӹж кӹньӹлмӓш. 11 Салтаквлӓн попымышты. 16 Тыменьшӹвлӓжӹлӓн Иисусын шӱдӹмӹжӹ.

¹ Кукшыгечӹ эртӹмӹкӹ, ӓрнян пӹтӓриш кечӹ валгалташ тӹнгӓлмӹ годым, Мария Магдалина дон вес Мария шӹгерӹм анжалаш толыныт.

² Теве мӱлӓндӹ когон цӹтӹрнӓлтӹн: Господьын Ангелжӹ пӹлгом гӹц вален, шӹгер докы миэн дӓ ӓнгӹштӹшӹ кӱм карангден, вӹкӹжӹ шӹнзӹн.

³ Вӹлецӹн анжаш Ангел валгынзыш гань ылын, выргемжӹ лым гань ошы.

⁴ Тӹдӹ гӹц лӱдӹн, оролвлӓ цӹтӹрӓш тӹнгӓлӹнӹт дӓ колышы гань линӹт.

⁵ А Ангел ӹдӹрӓмӓшвлӓлӓн попен: «Тӓ идӓ лӱд. Пӓлем, тӓ пыдален сӓкӹмӹ Иисусым кӹчӓлӹдӓ.

⁶ Тӹдӹ тиштӹ уке, попымыжы семӹньок Тӹдӹ ӹлӹжӹн, лишкӹрӓк толда дӓ Господьын кимӹ вӓржӹм анжалда.

⁷ Вара пӹсӹн кедӓ дӓ Тӹдӹн тыменьшӹвлӓжӹлӓн келесӹдӓ: Тӹдӹ колымаш гӹц ӹлӹжӹн дӓ тӓмдӓм Галилейӹштӹ вӓшлиэш. Тӹштӹ Тӹдӹм ужыда. Теве мӹнь тӓлӓндӓ попышашлыкем келесӹшӹм».

⁸ Ӹдӹрӓмӓшвлӓ шӹгер гӹц пӹсӹн карангыныт, лӱдӹн дӓ когон сусу лин, Иисусын тыменьшӹвлӓжӹлӓн увертӓрӓш кыргыжыныт.

⁹ Теве тыменьшӹвлӓжӹлӓн увертӓрӓш кемӹштӹ годым Иисус нӹнӹм вӓшлин дӓ келесен: «Сусу лидӓ!» Нӹнӹ лишемӹнӹт, анзыланжы кымалын, ялжым элтӓленӹт.

¹⁰ Иисус попен: «Идӓ лӱд, кедӓ дӓ шӱмбелемвлӓлӓн Галилейӹш кеӓш келесӹдӓ. Нӹнӹ Мӹньӹм тӹштӹ ужыт».

¹¹ Ӹдӹрӓмӓшвлӓ кемӹкӹ, оролвлӓ логӹц южышты халашкы пыренӹт, архиерейвлӓлӓн ма лимӹм цилӓ увертӓренӹт.

¹² А нӹнӹжӹ, халыкын когоракшывлӓ доно погынен кӓнгӓшен нӓлмӹкӹ, оролвлӓлӓн шукы оксам пуэнӹт

¹³ дӓ попенӹт: «Тӹдӹн тыменьшӹвлӓжӹ йыдым толыныт дӓ амалымына годым кӓпшӹм шолышт кенӹт манын келесӹдӓ.

¹⁴ Вуйлатышы докы тидӹ гишӓн увер миэн шоэш гӹнь, мӓ тӹдӹм ӹняндӓренӓ, дӓ тӓлӓндӓ нима гишӓнӓт шытырланаш ак кел».

¹⁵ Оролвлӓ, оксам нӓлӹн, келесӹмӹ семӹньок ӹштенӹт. Нӹнӹн попымыштым иудейвлӓ лошты тагачшы кечӹ яктеӓт шӓркӓлӓт.

¹⁶ А луатик тыменьшӹжӹ Галилейӹш Иисусын шӱдӹмӹ кырык вӹкӹ кенӹт.

¹⁷ Иисусым ужмыкы, анзыланжы кымал вазыныт, а южышты коктешлӓненӹт.

¹⁸ Иисус лишемӹн дӓ нӹнӹлӓн келесен: «Мӹлӓм пӹлгомышты дӓ мӱлӓндӹ вӹлнӹ цилӓ власть пуалтын.

¹⁹ Седӹндон кедӓ дӓ цилӓ халыквлӓм тымдыда. Ӓтя, Эргӹ дӓ Святой Шӱлӹш лӹмеш нӹнӹм крестӹдӓ,

²⁰ тӓлӓндӓ цилӓ шӱдӹмем ӹштен шалгаш нӹнӹлӓн тымдыда. Сӓндӓлӹк пӹтӹмешкӹ, Мӹнь кечӹнь тӓ сагада лиӓм. Аминь».