Лк 1 - У Согонь

1 ГЛАВА 1 Анзыл шамак. 5 Крестӹшӹ Иоаннын шачмыжы гишӓн анзыцок келесӹмӓш. 26 Иисус шачмы гишӓн анзыцок келесӹмӓш. 39 Елисавета докы Мария ужаш кеӓ. 57 Крестӹшӹ Иоаннын шачмыжы. 67 Захарий пророкла попа.

¹ Мӓ лоштына лишӹ дӓ яжон пӓлӹмӹ пӓшӓвлӓ гишӓн шукын сирӓш тӹнгӓлӹнӹт.

² Тӹнгӓлтӹш гӹцок цилӓ тидӹм ужшывлӓн дӓ Шамаклан служышывлӓн мӓлӓннӓ увертӓрӹмӹштӹм сирӓт.

³ Седӹндон мӹнят, тӹнгӓлтӹш гӹцок цилӓ ланзылен лӓкмӹкӹ, тидӹм тӹлӓнет, шотеш пиштӹмӹ Феофил, рӓдӹ доно сирӓш шанен пиштӹшӹм.

⁴ Тӹлӓнет тымдымы тӧр ылмым пӓлӹ манын, тидӹм сирем.

⁵ Иудейӹн Ирод кугижӓжӹ годым Авийӹн партьыштыжы служышы Захарий лӹмӓн священник ылын. Тӹдӹн вӓтӹжӓт Аарон йых гӹц ылын, лӹмжӹ Елисавета.

⁶ Нӹнӹ коктынат Йымы анзылны тӧр ӹштӹшӹ ылыныт, Господьын шӱдӹмӹжӹм дӓ законжым цилӓ ӹштенӹт, йӓтлӓш вирӹм пуделыт.

⁷ Но Елисавета тетям ӹштен керддӹмӹ ылын, седӹндон нӹнӹн тетяштӹ ылде. Нӹнӹ коктынат кого иӓшӓн ылыныт.

⁸ Икӓнӓ, ӹшке партьыштыжы пӓшӓ церотшы толын шомыкы, Захарий Йымы анзылны служен.

⁹ Священниквлӓн овуцашты семӹнь шӹвӓм лыкмыкы, тӹдӹлӓн Господьын пӧртӹшкӹжӹ тӹтӹрӓш пыраш вӓрештӹн,

¹⁰ а ладыным тӹтӹрӹмӹ годым улы халык тӱнӹ йымыдылын.

¹¹ Тӹнӓм Захарийлӓн Господьын Ангелжӹ кайын, тӹдӹ тотлы пышым тӹтӹрӹмӹ стӧлӹн вургымла велнӹжӹ шалген.

¹² Тӹдӹм ужмыкы, Захарий когон ӧрӹн, тӹдӹм лӱдмӓш нӓлӹн.

¹³ Но Ангел тӹдӹлӓн келесен: «Захарий, ит лӱд. Тӹньӹн йымыдылметӹм колмы. Елисавета вӓтет тӹлӓт эргӹм ӹштӓ, дӓ тӹнь тӹдӹлӓн Иоанн лӹмӹм пуэт.

¹⁴ Тӹлӓнет сусу дӓ ӹвӹртӹмӓш лиэш, тӹдӹн шачмыжылан шукын сусу лит.

¹⁵ Господь анзылны тӹдӹ пиш кого лиэш. Тӹдӹ якшар ӓрӓкӓмӓт, ош ӓрӓкӓмӓт йӱӓш ак тӹнгӓл, ӓвӓ кӧргӹштӹ ылмыжы годымок Святой Шӱлӹш доно темеш,

¹⁶ Израиль эргӹвлӓ логӹц шукыштым нӹнӹн Господь Йымышты докы сӓрӓлеш.

¹⁷ Господь анзыкы йӓмдӹлӹмӹ халыкым лыкташ манын, Илиян гань сила дӓ шӱлӹш доно тӹдӹ Господь гӹц анзылны каштеш, ӓтявлӓн йӓнгӹштӹм тетявлӓштӹ докы сӓрӓ, тӧр ӹштӹшӹвлӓ семӹнь шанаш шамак колыштдымывлӓм пӧртӹлтӓ».

¹⁸ Захарий Ангеллӓн келесен: «Тидӹ лачокок тенге лимӹм мӹнь кышец пӓлем? Мӹнь шонгы ылам, вӓтемӓт иӓшӹжӹ доно кого».

¹⁹ Ангел тӹдӹлӓн вӓшештен: «Мӹнь Гавриил ылам, Йымы анзылны шалгем, тӹлӓнет попаш дӓ ти сусу уверӹм келесӓш колтымы ылам.

²⁰ Теве тӹнь йӹлмӹдӹмӹ лиӓт, цилӓ тидӹ шокталтмы кечӹ якте попен ат керд. Ӹшке жепӹштӹжӹ шокталтшашлык шамакемлӓн тӹнь ӹнянӹделат, седӹндон тенге лиэш».

²¹ Захарийӹм халык вычен дӓ тӹдӹн Йымын пӧртӹштӹ шукы жеп ылмыжылан ӧрӹн.

²² Захарий лӓктӹн, но нӹнӹлӓн нимат попен кердде. Эдемвлӓ ынгыленӹт: Йымын пӧртӹштӹ тӹдӹ каймашым ужын. Захарий кидшӹ доно анжыктылын дӓ йӹлмӹдӹмок кодын.

²³ А служымы кечӹвлӓжӹ эртӹмӹкӹ, Захарий токыжы пӧртӹлӹн.

²⁴ Икманяр жепӹштӹ Елисавета вӓтӹжӹ мӹшкӹрӓн лин дӓ вӹц тӹлзӹ шӹлӹн ӹлен. Тӹдӹ попен:

²⁵ «Тидӹм мӹлӓм Господь ӹштен! Ти кечӹвлӓн Тӹдӹ вӹкем анжалын, эдемвлӓ гӹц тырхен ӹлӹмӹ намысем мӹнь вӹлецем карангден».

²⁶ Кудымшы тӹлзӹн Йымы Гавриил Ангелӹм Галилейӹштӹшӹ Назарет манмы халашкы

²⁷ Давид йыхын Иосифлӓн сӧрӹмӹ ӹдӹр докы колтен. Ӹдӹрӹн лӹмжӹ Мария ылын.

²⁸ Ангел Тӹдӹн докы толын дӓ келесен: «Пурым нӓлшӹ ӹдӹр, сусу ли! Господь Тӹнь сагаэт. Ӹдӹрӓмӓшвлӓ лошты Тӹнь благословайымы ылат».

²⁹ Но тӹдӹм ужмыкыжы, Мария техень шамаквлӓ гӹц ӧрӹн, лӱдӹн колтен дӓ шанаш тӹнгӓлӹн: здоровайымыжы мам анжыкта.

³⁰ Ангел Тӹдӹлӓн келесен: «Мария, ит лӱд. Тӹнь Йымы гӹц пурым нӓлӹнӓт.

³¹ Тӹнь нелемӓт дӓ Эргӹм ӹштет. Тӹдӹлӓн Иисус лӹмӹм пуэт.

³² Тӹдӹ пиш кого лиэш, Кӱшнӹшӹ Йымын Эргӹ манын лӹмдӓлтеш. Господь Йымы Тӹдӹлӓн Давид ӓтяжӹн престолжым пуа.

³³ Тӹдӹ курымеш Иаков родын кугижӓжӹ лиэш, Тӹдӹн кугижӓлӓнӹмӹжӹлӓн мычаш ак ли».

³⁴ Ангеллӓн Мария келесен: «Кыце тидӹ лин кердеш, Мӹнь пӱэргӹм ам пӓлӹ?»

³⁵ Ангел Тӹдӹлӓн келесен: «Вӹкет Святой Шӱлӹш вала, Кӱшнӹшӹ Йымын силажы Тӹньӹм леведеш. Седӹндон ти шачшашлык Ӓзӓ святой ылеш, Тӹдӹм Йымын Эргӹ манын лӹмдӓт.

³⁶ Теве Тӹньӹн Елисавета родетӓт, шонгы гӹнят, мӹшкӹрӓн, тӹдӹн эргӹ шачеш. Тӹдӹм цилӓн тетям ӹштен керддӹмеш шотленӹт, ӹнде кудымшы тӹлзӹ Елисавета нелемшӹ.

³⁷ Йымын ик шамакшат ӹштен керддӹмӹ ак ли».

³⁸ Мария келесен: «Мӹнь Господьын Цоражы ылам. Мӹлӓнем попымет семӹньок лижӹ». Ангел Тӹдӹн дорц карангын.

³⁹ Ти кечӹвлӓн Мария тӓрвӓнен дӓ кырыкан кымдемӹштӹшӹ Иудан халашкы талашен кен.

⁴⁰ Тӹдӹ Захарийӹн пӧртӹшкӹжӹ пырен дӓ Елисаветалан вӓшлимӹ шамаквлӓм келесен.

⁴¹ Мариян здоровайымым Елисавета колмыкыжы, мӹшкӹрӹштӹшӹ ӓзӓжӹ силан тӓрвӓнен, дӓ Елисавета Святой Шӱлӹш доно темӹн.

⁴² Тӹдӹ когон сӹгӹрӓл колтен: «Ӹдӹрӓмӓшвлӓ лошты Тӹнь благославайымы ылат! Йӓнг лӹвӓлнӹ намалмы Тетяэтӓт благословайымы.

⁴³ Мӹнь докем Господемӹн Ӓвӓжӹ толын. Мӹлӓнем кышец техень цӓш?

⁴⁴ Кынам мӹнь здоровайымы юкетӹм кольым, кӧргӹштем ӓзӓэм сусу лимӹжӹ доно силан тӓрвӓнӹш.

⁴⁵ Ӹнянӹшӹ – пуры цӓшӓн, вет Тӹдӹлӓн Господьын келесӹмӹжӹ шокталтеш».

⁴⁶ Мария келесен: «Мӹньӹн йӓнгем Господьым хваля

⁴⁷ дӓ Йымылан, Мӹньӹн Ытарышылан, кӧргӹ шӱлӹшем ӹвӹртӓ.

⁴⁸ Тӹдӹ изи цора Ӹдӹржӹ вӹкӹ анжалын, тилец вара цилӓ йых Мӹньӹм цӓшӓн манаш тӹнгӓлеш:

⁴⁹ Силан Йымы Мӹлӓм когон кого пурым ӹштен. Тӹдӹн лӹмжӹ святой ылеш.

⁵⁰ Тӹдӹлӓн лӱдӹн ыдылшывлӓлӓн Тӹдӹ йых гӹц йыхыш ӹшке пурыжым анжыкта.

⁵¹ Тӹдӹ ӹшке кидшӹ доно силан пӓшӓвлӓм ӹштен, йӓнгӹштӹштӹ когоэшнӹшӹ шанымашым кычышывлӓм шӓлӓтен колтен.

⁵² Силанвлӓм престол гӹц сӹмӹрен, смирнӓвлӓм лӱктӓлӹн,

⁵³ шужышывлӓм пуры доно темен, пайышывлӓм нима гӹц пасна колтен.

^54-55 Мӓмнӓн ӓтявлӓлӓннӓ попымыжы семӹнь, Авраамлан дӓ тӹдӹн йыхшылан пурыжым курым ӓшӹндӓрен, Тӹдӹ ӹшкӹмжӹн Израиль шачшыжым яратен нӓлӹн».

⁵⁶ Елисавета доны Мария кым тӹлзӹ нӓрӹ ылын, вара мӹнгеш токыжы толын.

⁵⁷ Елисаветалан ӓзӓм ӹштӓш жеп шон, тӹдӹ эргӹм ӹштен.

⁵⁸ Господьын Елисавета докы когон пуры ылмы гишӓн пашкудывлӓ дӓ роднявлӓжӹ колыныт дӓ тӹдӹн доно иквӓреш сусу линӹт.

⁵⁹ Кӓндӓкшӹмшӹ кечӹн ӓзӓлӓн пӹчмӹ овуцам эртӓрӓш толыныт дӓ тӹдӹм ӓтяжӹн лӹмжӹ доно Захарий манын лӹмдӹнештӹ ылын.

⁶⁰ Но тетян ӓвӓжӹ келесен: «Уке. Тӹдӹм Иоанн манын лӹмденӓ».

⁶¹ Елисаветалан келесенӹт: «Но техень лӹмӓнжӹ тӹньӹн йыхыштет иктӓт уке».

⁶² Ӓзӓм кыце лӹмдӹнежӹ манын, ӓтяжӹ гӹц кид доно анжыктыл ядыныт.

⁶³ Захарий изи хангам ядын дӓ сирен: «Тӹдӹн лӹмжӹ Иоанн». Цилӓн ӧрӹнӹт.

⁶⁴ Ти жепӹнок Захарийӹн йӹлмӹжӹ пачылтын, тӹдӹ попаш дӓ Йымым хваляш тӹнгӓлӹн.

⁶⁵ Нӹнӹ йӹр ӹлӹшӹвлӓ цилӓн когон лӱдӹнӹт. Цилӓ тидӹ гишӓн Иудейӹн кырыкан вӓржӹ мычкы попенӹт.

⁶⁶ Кӱ тидӹ гишӓн колын, цилӓн йӓнгӹшкӹштӹ пиштенӹт дӓ попенӹт: «Ти тетя ма лиэш?» Вет тӹдӹн сага Господьын кидшӹ ылын.

⁶⁷ Захарий, Иоаннын ӓтяжӹ, Святой Шӱлӹш доно темӹн дӓ пророкла попен:

⁶⁸ «Израильӹн Господь Йымыжы хвальымы лижӹ! Тӹдӹ ӹшке халыкшы докы лишемӹн дӓ тӹдӹлӓн ирӹкӹш лӓкмӓшӹм йӓмдӹлен.

^69-70 Ӓкрет годымок святой пророквлӓжӹн келесӹмӹштӹ гач сӧрӹмӹжӹм ӹштен: Давид шачшыжын йыхшы гӹц Тӹдӹ мӓлӓннӓ силан Ытарышым лыктын.

⁷¹ Тышманвлӓнӓ гӹц, мӓмнӓм ужын керддӹмӹвлӓн цилӓн кидӹштӹ гӹц Господь ытара.

⁷² Тенге Тӹдӹ ӓтянӓвлӓлӓн пурыжым анжыкта дӓ ӹшке святой согоньжым ӓшӹндӓрӓ,

^73-75 Авраам ӓтялӓннӓ цуратлымыжым мондыде: мӓмнӓм тышман кид лӹвец ирӹкӹш лыктеш, дӓ, анзылныжы святой семӹнь дӓ тӧр ӹштен, ӹлӹшӓш кечӹвлӓнӓ мычкы Тӹдӹлӓн лӱдде служен кердӹнӓ.

⁷⁶ А тӹнь, тетя, Кӱшнӹшӹ Йымын пророкшы манын лӹмдӓлтӓт, Господь гӹц анзыц кет, Тӹдӹлӓн корным йӓмдӹлет дӓ

⁷⁷ Тӹдӹн халыкшылан пӓлдӓрет: ти халыкын ытаралтмашыжы сулыквлӓштӹм простьымашты.

⁷⁸ Тенге Йымына шӱм пурыжы доно мӓлӓннӓ кӱшӹц Ир Сотым колтен –

⁷⁹ Тӹдӹжӹ пӹцкемӹшӹштӹ дӓ колымаш ӹмӹлӹштӹ шӹнзӹшӹвлӓм сотемдӓрӓ дӓ тыр корныш мӓмнӓн ашкылнам виктӓрӓ».

⁸⁰ А тетя кушкын дӓ кӧргӹ шӱлӹшӹжӹ цаткыдемӹн. Израиль халык анзыкы лӓктӓш жеп шомешкӹ, тӹдӹ пустыньышты ӹлен.