Святой Апостол Иоанн и Святой Апостол Иаков 5 - У Согонь

5 ГЛАВА 1 Паянвлӓм шижтӓрӹмӓш. 7 Тырхымаш дӓ ыдылмаш.

¹ Паянвлӓ, кӹзӹт колыштда: тӓ вӹкӹдӓ эксӹк лишеммӹ гишӓн сӹнзӓвӹддӓм йоктарыда дӓ ӱрлен мӓгӹрӹдӓ.

² Тӓмдӓн пайдада шӱн кен, дӓ тӓмдӓн выргемдӓм когершӹ качкын колтен.

³ Тӓмдӓн шӧртньӹдӓ дӓ шидӓ ӹрдӓнгӹнӹт, нӹнӹн ӹрдӓнгмӹштӹ тӓ ваштарешдӓ пӓлдӹртӹмӓш лиэш дӓ тӓмдӓн кӓпдӓм тыл гань качкын колта: кодшы кечӹвлӓэш тӓ пайдам погендӓ.

⁴ Теве тӓмдӓн нырвлӓдӓм тӹредшӹвлӓлӓн тӱлӹдӹмӹ пӓшӓдӓр сасла, дӓ тӹредшӹвлӓн ӧпкӓлен саслымышты Господь Саваофын пӹлӹш якте шон.

⁵ Мӱлӓндӹ вӹлнӹ тӓ улан ӹлендӓ дӓ мындырланендӓ; шӹшкӹлмӹ кечӹлӓн йӓмдӹлӹмӹ гань ӹшке йӓнгдӓм ӧрдӹктендӓ.

⁶ Тӓ тӧр ӹштӹшӹм суендӓ, пуштында, тӹдӹ тӓлӓндӓ торешлӓнӹде.

⁷ Тенге, шӱмбелвлӓ, Господь толмешкӹ, кужын тырхышы лидӓ. Теве ныр пӓшӓзӹ мӱлӓндӹ гӹц шергӓкӓн кӹцкӹм выча, ӱдӹмӹ жеп гӹц тӹредмӹ жеп якте кужын тырха.

⁸ Тӓӓт кужын тырхыда, ӹшке йӓнгдӓм пингӹдемдӹдӓ, вет Господьын толмыжы лишемеш.

⁹ Шӱмбелвлӓ, икӓнӓ-иктӹдӓ вӹкӹ вуйым идӓ ши, уке гӹнь, тӓ ӹшке суйымы лидӓ: теве Судья амаса анзылны шалга.

¹⁰ Шӱмбелвлӓэм, Господьын лӹмжӹ доно попышы пророквлӓн цӹтен парвалымыштым дӓ кужын тырхымыштым анжыда дӓ нӹнӹ семӹнь ӹштӹдӓ.

¹¹ Теве мӓ цӹтен лӓкшӹвлӓм пуры цӓшӓн ылыт манын хваленӓ. Тӓ Иовын тырхымыжы гишӓн колында дӓ остаткаэш Господь тӹдӹлӓн мам ӹштӹмӹм ужында, вет Господь пиш пуры дӓ жӓлӓйӹшӹ.

¹² Пӹтӓриок, шӱмбелвлӓэм, ни пӹлгом доно, ни мӱлӓндӹ доно, нимахань вес цуратлымаш доно идӓ цуратлы, но тӓмдӓн «Ане, ане» ӓль «Уке, уке» лижӹ. Тенге агыл гӹнь, тӓ суйымы лидӓ.

¹³ Тӓ логӹцдӓ иктӓжӹ парвала гӹнь, ыдылжы. Иктӓжӹ сусу ылеш гӹнь, Йымым хвален мырыжы.

¹⁴ Тӓ логӹцдӓ иктӓжӹ ясы ылеш гӹнь, Церкӹн пресвитервлӓжӹм ӱжшӹ, дӓ нӹнӹ, тӹдӹм Господь лӹмеш елей доно шӹрен, тӹдӹ верц ыдылышты.

¹⁵ Ӹнянен ыдылмаш ясыланышым паремдӓ, Господь тӹдӹм кӹньӹлтӓ, дӓ тӹдӹ сулыквлӓм ӹштен гӹнь, тӹдӹлӓн нӹнӹ простялтыт.

¹⁶ Паремӓш манын, икӓнӓ-иктӹдӓ анзылны сулыквлӓдӓм келесӹдӓ дӓ икӓнӓ-иктӹдӓ верц ыдылда: тӧр ӹштӹшӹн силан ыдылмыжы шукым ӹштен кердеш.

¹⁷ Илия мӓ ганьнаок эдем ылын, юр ӹнжӹ ли манын, сарвален ыдылын, дӓ мӱлӓндӹ вӹлнӹ кым и дӓ куд тӹлзӹ юр ылде.

¹⁸ Эчеӓт ыдылын, дӓ пӹлгом юрым пуэн, дӓ мӱлӓндӹ ӹшке кӹцкӹжӹм куштен.

¹⁹ Шӱмбелвлӓ, кӱ-гӹнят тӓ логӹцдӓ лачок гӹц карангеш, дӓ иктӓжӹ тӹдӹм мӹнгеш пӧртӹлтӓ гӹнь,

²⁰ тӹдӹ пӓлӹжӹ: сулыканым самынь корныжы гӹц сӓрӓлшӹ тӹдӹн йӓнгжӹм колымаш гӹц ытара дӓ шукы сулыкым леведеш.