Святой Апостол Иоанн и Святой Апостол Иаков 4 - У Согонь

4 ГЛАВА 1 Йымым колыштда. 11 Весӹм суйымы гӹц шижтӓрӹмӓш. 13 Ӹшкӹмдӓм хвальымаш гӹц шижтӓрӹмӓш.

¹ Кышец тӓ лоштыда кредӓлмӓш дӓ вӓшпижмӓш лӓктеш? Тӓмдӓн кӓпӹштӹдӓ кредӓлшӹ кымыл шыпшмашда гӹц агыл ма?

² Нӓлнедӓ – но тӓмдӓн уке; пуштыда дӓ йӓнгдӓм йылатаредӓ – но шанымашкыда шон ада керд; вӓшпижӹдӓ дӓ кредӓлӹдӓ, а тӓмдӓн нимат уке, вет Йымы гӹц ада яд.

³ Ядыда дӓ ада нӓл, вет тӓ пурылан агыл, а ӹшке кымыл шыпшмашда семӹнь кычылт пӹтӓрӓш ядыда.

⁴ Йымы гӹц карангшывлӓ, шӓхӓрвлӓ! Сӓндӓлӹкӹн тӓнгжӹ лимӓш Йымылан тышман лимӹм ада пӓлӹ ма? Седӹндон, кӱ сӓндӓлӹкӹн тӓнг линежӹ гӹнь, тӹдӹ Йымын тышманжы лиэш.

⁵ «Кӧргӹшкӹнӓ ӹлӓш пырышы шӱлӹш йӓнг йылымы якте ярата» манын, Писани такеш попа шанедӓ ма?

⁶ Но Йымы утларак кого благодатьым пуа, седӹндонок келесӹмӹ: «Йымы когоэшнӹшӹвлӓлӓн тореш ылеш, а смирнӓвлӓлӓн благодатьым пуа».

⁷ Седӹндон Йымым колыштда, диаволлан тореш шагалда, дӓ тӹдӹ тӓ гӹцдӓ шӹлӹн кыргыжеш.

⁸ Йымы докы лишемдӓ, дӓ Тӹдӹ тӓ докыда лишемеш, сулыканвлӓ, киддӓм мышда, кок семӹнь шанышывлӓ, йӓнгдӓм ирӹктӹдӓ.

⁹ Ойхырыда, сӹнзӓвӹддӓм йоктарыда дӓ ӱрлен мӓгӹрӹдӓ; тӓмдӓн ваштылмашда мӓгӹрӹмӓшкӹ сӓрнӓлтшӹ дӓ сусуда – ойхышкы.

¹⁰ Господь анзылны ӹшкӹмдӓм лапемдӹдӓ, дӓ Тӹдӹ тӓмдӓм лӱктӓлеш.

¹¹ Шӱмбелвлӓ, икӓнӓ-иктӹдӓ вӹкӹ худам идӓ попы: кӱ шӱмбелжӹ вӹкӹ худан попа ӓль ӹшке шӱмбелжӹм суя, тӹдӹ закон вӹкӹ худан попа дӓ законым суя, а тӹнь законым сует гӹнь, тӹнь законым айышы ат ыл, а судья ылат.

¹² Закон пушы дӓ Судья иктӹ ылеш, Тӹдӹ, Кӱ ытарен дӓ ямден кердеш; а тӹнь, весӹм суйышы, кӱ ылат?

¹³ Ӹнде колыштда тӓ, тенге попышывлӓ: «Тагачы ӓль иргодым техень халашкы кенӓ, тӹштӹ ик и ӹленӓ, торгейӓш дӓ парышым нӓлӓш тӹнгӓлӹнӓ».

¹⁴ Тӓ иргодым ма лишӓшлыкым ада пӓлӹ: вет ма техень тӓмдӓн ӹлӹмӓшдӓ? Кӹтӹк веремӓэш кайшы, а вара шӓлӓнӹшӹ тӹтӹрӓ.

¹⁵ Тидӹ вӓреш тӓлӓндӓ попаш келнежӹ: «Господьлан яра гӹнь, ӹленӓ, тӹдӹмӓт-тидӹмӓт ӹштенӓ».

¹⁶ Но кӹзӹт тӓ когоэшнӹмӹдӓ доно ӹшкӹмдӓм хваледӓ. Цилӓ техень хвальымаш худа ылеш.

¹⁷ Тенге, кӱ пурым ӹштӓш пӓлӓ, дӓ ак ӹштӹ, тӹдӹлӓн сулык лиэш.