СВЯТОЙ АПОСТОЛ ПАВЕЛӸН ГАЛАТВЛӒЛӒН КОЛТЫМЫ СИРМӒШӸЖӸ 1 - У Согонь

1 ГЛАВА 1 Вӓшлимӹ шамакым келесӹмӓш. 6 Вес Пуры Увер уке. 11 Кыце Павел Апостол лин.

¹ Эдемвлӓнӓт, эдемвлӓ гачат агыл, а Иисус Христосын дӓ Тӹдӹм колымаш гӹц ӹлӹжтӹшӹ Йымы Ӓтян айырымы Апостол Павел гӹц

² дӓ сагаэм ылшы цилӓ шӱмбелвлӓ гӹц Галатиштӹшӹ церкӹвлӓлӓн.

³ Йымы Ӓтя дӓ мӓмнӓн Господь Иисус Христос гӹц тӓлӓндӓ благодать дӓ тыр лижӹ.

⁴ Тӹдӹ, кӹзӹтшӹ худа веремӓ гӹцӹн мӓмнӓм ытараш манын, Йымы Ӓтянӓн ирӹкшӹ семӹнь мӓмнӓн сулыквлӓнӓ гишӓн Ӹшке Ӹшкӹмжӹм пуэн.

⁵ Йымылан курым-курымеш лӹмлештӓрӓлтмӓш лижӹ. Аминь.

⁶ Тӓмдӓм Христосын благодатьшы доно Ӱжшӹ гӹц тенге пӹсӹн карангмыланда дӓ вес пуры увер докы сӓрнӓлмӹлӓндӓ ӧрӓм.

⁷ Тенге гӹнят тидӹ вес увер агыл, а тӓмдӓм пыдыратышы дӓ Христосын Пуры Увержӹм локтыл весемдӓш шанышы эдемвлӓ веле ылыт.

⁸ Но мӓмнӓн шайыштмы Пуры Увернӓ гӹц молым тӓлӓндӓ мӓ ӹшкежӓт шайыштына ӓль пӹлгом гӹц Ангел шайыштеш гӹнят, техень уверӹм шӓрӹшӹжӹ проклятайымы лижӹ.

⁹ Кыце мӓ молнам попеннӓ, кӹзӹтӓт тенгеок келесем: йӓнгӹшкӹдӓ пиштӹмӹ Пуры Увер гӹц молым тӓлӓндӓ иктӓжӹ шайыштеш гӹнь, тӹдӹ проклятайымы лижӹ.

¹⁰ Кӹзӹт мӹнь эдемвлӓн кымылыштым ӹшке векем сӓрӓлнем ӓль Йымыным? Эдемвлӓлӓн ма ярал лиӓш цацем? Мӹнь кӹзӹт яктеӓт эдемвлӓлӓн ярал лиӓш цацем ыльы гӹнь, Христосын цоражы ам ли ыльы.

¹¹ Шӱмбелвлӓ, пӓлен лидӓ: мӹньӹн шайыштмы Пуры Увер эдемӹн агыл.

¹² Тӹдӹм мӹнь эдем гӹц нӓлделам, тӹдӹлӓн мӹньӹм тымдыделыт, тӹдӹм мӹнь Иисус Христосын пачын анжыктымыжы гач нӓлӹнӓм.

¹³ Иудей овуца семӹнь перви кыце ӹлӹмем гишӓн тӓ колында, тӹнӓм мӹнь Йымын Церкӹм пишок поктылынам дӓ тӹдӹм пӹтӓрӓш цаценӓм.

¹⁴ Иудей овуцам кычымашты мӹнь ӹшке халыкемӹн шукы ик иӓшӓнемвлӓ гӹц утларак сӹнгӹмӓшкӹ шонам, ӓтянӓвлӓн овуцашты верц пишок пингӹдӹн шалгенӓм.

^15-16 Но ӓвӓмӹн кӧргӹштӹжӹ ылмем годымок мӹньӹм айырен нӓлшӹ дӓ благодатьшы доно ӱжшӹ Йымы ӹшке Эргӹжӹм мӹнь гачем пӓлдӓрӓш яжоэш шотлен. Тӹдӹ гишӓн Пуры Уверӹм язычниквлӓ лошты шайыштшашлык ылам. Мӹнь тӹнӓмок эдем гӹц кӓнгӓшӹм ядделам

¹⁷ дӓ мӹнь гӹцем анзыц Апостол ылшывлӓ докы Иерусалимӹш кеделам, а Аравиш кенӓм дӓ угӹц Дамаскыш пӧртӹлӹнӓм.

¹⁸ Вара, кым и эртӹмӹкӹ, Петр доно вӓшлин шайышташ Иерусалимӹш кенӓм дӓ тӹдӹн доны луатвӹц кечӹ линӓм,

¹⁹ но Господьын ӹзӓжӹ Иаков гӹц молы вес Апостолым ужделам.

²⁰ Мӹньӹн ти сирӹмем алталымаш агыл манын, тӓмдӓм Йымы анзылны ӹняндӓрем.

²¹ Тидӹ паштек мӹнь Сири дӓ Килики мӱлӓндӹвлӓшкӹ кенӓм.

²² Иудейӹштӹшӹ христианвлӓн церкӹвлӓштӹ мӹньӹм цӹреэм гӹц пӓлӹделыт.

²³ Нӹнӹ колыныт веле: «Пӹтӓри мӓмнӓм поктылшы ти эдем ӹнянӹмӓшнӓм тилец анзыц пӹтӓрӓш цацен, но кӹзӹт тӹдӹм ӹшке увертӓрӓ».

²⁴ Седӹндон мӹнь верцем Йымым лӹмлештӓренӹт.