Еф 6 - У Согонь

6 ГЛАВА 1 Тетя дӓ ӓтя-ӓвӓ. 5 Рабвлӓ дӓ нӹнӹн хозашты. 10 Йымын пумы вырсы хӓдӹржӹ. 21 Цеверӹн кодаш согоньлымаш.

¹ Тетявлӓ, Господь доно ушнен, ӓтя-ӓвӓдӓн шамакыштым колыштда, вет тенге ӹштӹмӓш тӧр ылеш.

² «Ӹшке ӓтят дон ӓвӓтӹм шотеш пиштӹ», – тидӹ пӹтӓришӹ шӱдӹмӓш, тӹдӹн доно иквӓреш сӧрӹмӓш пуалтын:

³ тӹнӓм «тӹлӓнет яжо лиэш, дӓ мӱлӓндӹ вӹлнӹ кужы курыман лиӓт».

⁴ Тӓ, ӓтявлӓ, тетявлӓдӓм шӹдӹшкӹ идӓ йышкыры, а Господьын тымдымыжы дӓ тӧрлӓтӹмӹжӹ семӹнь нӹнӹм анжен куштыда.

⁵ Рабвлӓ, мӱлӓндӹ вӹлнӹшӹ хозавлӓдӓм Христосым колыштмы семӹнь, лӱдӹн дӓ цӹтӹрен, ире шӱм доно колыштда.

⁶ Эдемлӓн ярал лиӓш цацен, хозавлӓ ужмы годым веле агыл шамакыштым колыштда, а Йымын ирӹкшӹм йӓнг вашт ӹштен, Христосын цоражы семӹнь пӓшӓлӹдӓ.

⁷ Эдемлӓн агыл, а Господьлан служымы семӹнь улы кымылын пӓшӓлӹдӓ.

⁸ Пӓлен лидӓ: каждыйжы иктӓ-махань пурым ӹштӹмӹжӹ семӹнь, хоть раб, хоть ирӹкӓн лижӹ, Господь гӹц пурым нӓлеш.

⁹ Тӓӓт, хозавлӓ, лӱдӹктӹлмӓшӹм коден, рабвлӓдӓ доно тенгеок ӹштӹдӓ. Пӓлен лидӓ: пӹлгомышты нӹнӹнӓт, тӓмдӓнӓт Господь улы, Тӹдӹ цилӓ эдемӹм ик семӹнь анжа.

¹⁰ Шӱмбелемвлӓ, остаткаэш келесӹнем: Господь доно дӓ Тӹдӹн кого силажы доно пингӹдемдӓ.

¹¹ Диаволын йойланымыжы ваштареш шалген керддӓ манын, Йымын улы вырсы хӓдӹржӹ доно вӹдӹлӓлтдӓ.

¹² Вет кредӓлмӓшнӓ эдемвлӓ ваштареш агыл, а ти курымыштышы пӹцкемӹшӹн начальствыжы, властьшы дон улы сӓндӓлӹкӹм вуйлатышы тӧрӓвлӓжӹ ваштареш, пӹлгом лӹвӓлнӹшӹ худа шӱлӹшвлӓ ваштареш ылеш.

¹³ Тенгежӹ Йымын улы вырсы хӓдӹржӹм нӓлдӓ. Тӹнӓм тӓ худа кечӹн ваштареш кӹньӹлӹн дӓ, цилӓ ӹштӹмӹкӹ, пингӹдӹн шалген кердӹдӓ.

¹⁴ Тенгежӹ йӓмдӹ лидӓ: кӹдӓлешдӓ лачокым ӹштӓлдӓ, тӧр ӹштӹмӓшӹм кӹртни тыгыр семӹнь чидӓ,

¹⁵ тыр гишӓн пуры уверӹм шайышташ йӓмдӹ ылмым ялешдӓ чидӓ.

¹⁶ А сек когонжок ӹнянӹмӓшӹм ӓрӹк семӹнь нӓлдӓ, тӹдӹн доно тӓ худан цилӓ йылышы пикшӹжӹм йӧртен кердӹдӓ.

¹⁷ Ытарымашым шлем семӹнь чидӓ, Шӱлӹшӹн мечшӹм, вес семӹньжӹ Йымын шамакым, нӓлдӓ.

¹⁸ Соок сарвалыда дӓ ядда, цилӓ годымат Шӱлӹш доно ыдылда, идӓ амалы, кого цӹтӹмӓш доно цилӓ святойвлӓ верц Йымым сарвалыда.

¹⁹ Попымем годым мӹлӓнем керӓл шамакым Йымы пужы дӓ Пуры Уверӹн тайныжым лӱдде пӓлдӓрӓш палшыжы манын, мӹнь верцемӓт ыдылда.

²⁰ Пуры Увер гишӓн мӹньӹм колтымы дӓ кычен питӹрӹмӹ. Тӹдӹм керӓл семӹнь лӱдде шайышташ мӹлӓнем Йымы палшыжы манын, сарвалыда.

²¹ Мӹньӹн пӓшӓэм кыце кемӹ дӓ кыце ӹлӹмем гишӓн тӓӓт пӓлӹдӓ манын, Господьын ӹнян служышыжы, яратымы Тихик шӱмбел тӓлӓндӓ цилӓ шайышт пуа.

²² Мӓ гишӓннӓ цилӓ пӓлдӓрӓш дӓ тӓмдӓн йӓнгдӓм кымылангдаш манын, мӹнь тӹдӹм тӓ докыда колтенӓм.

²³ Шӱмбелвлӓлӓн Йымы Ӓтя дӓ Иисус Христос Господь гӹц тыр, яратымаш дӓ ӹнянӹмӓш лижӹ.

²⁴ Мӓмнӓн Господьна Иисус Христосым вашталтдымы яратымаш доно яратышы цилӓ эдем сага благодать лижӹ. Аминь.