Еф 5 - У Согонь

5 ГЛАВА 1 Сотын тетяжӹ семӹнь ӹлӹдӓ. 21 Мары дон вӓтӹ.

¹ Тӓ Йымын яратымы тетяжӹ ылыда гӹнь, тенгежӹ Тӹдӹ семӹнь ӹштӹдӓ.

² Кыце Христос мӓмнӓм яратен дӓ Ӹшкӹмжӹм мӓ верцнӓ жертва семӹнь, тотлы пышан подарка семӹнь Йымылан пуэн, тенге яратен ӹлӹдӓ.

³ Но шӓхӓрлӓнӹмӹ, сакой ире агыл кайыш ӓль шыкланымаш гишӓн тӓ лоштыда шаяат лӓкшӓшлык агыл, святовлӓлӓн тидӹ ак олмыд.

⁴ Тенгеок шудалмаш, келеш-акелӹм попымаш, мыскылен ваштылмаш тӓлӓндӓ ярдымы, техень вӓреш тӓ Йымылан таум ӹштӹшӓшлык ылыда.

⁵ Пӓлен лидӓ: ик шӓхӓрлӓнӹшӹнӓт, ӓль ире агылынат, ӓль шыкланышынат – шыкланымыжы идоллан кымалмы доно икток – техеньӹм ӹштӹшӹ ик эдемӹнӓт Христосын дӓ Йымын Кугижӓншӹштӹ нимахань наследствыжы уке.

⁶ Тӓмдӓм такешӹм попымы доно иктӓт ӹнжӹ алталы, вет тидӹ гишӓнок шамак колыштдымы эдемвлӓ вӹкӹ Йымын шӹдӹжӹ вазеш.

⁷ Техень эдемвлӓ докы идӓ ушны.

⁸ Пӹтӓри тӓ пӹцкемӹш ылында, а ӹнде, Господь доно ушнен, соты ылыда. Сотын тетявлӓжӹ семӹнь ӹлӹдӓ,

⁹ вет Шӱлӹшӹн кӹцкӹжӹ – сакой пурылык, тӧр ӹштӹмӓш дӓ лачок.

¹⁰ Йымылан ма яралым соок терген шалгыда.

¹¹ Пӹцкемӹшӹн кӹцкӹдӹмӹ пӓшӓшкӹжӹ идӓ ушны, а техеньӹм вӹкӹ лыкда.

¹² Эдемвлӓн йӹвӹрт ӹштӹмӹ пӓшӓштӹ гишӓн попашат намыс.

¹³ Но соты доно вӹкӹ лыкмы годым цилӓ раскыдын каеш. Вӹкӹ лыкмы цилӓок соты лиэш,

¹⁴ седӹндон келесӹмӹ: «Амалышы, кӹньӹл дӓ колымаш гӹц ӹлӹж, тӹньӹм Христос сотемдӓрӓш тӹнгӓлеш».

¹⁵ Тенгежӹ, кыце ӹлӹмӹдӓм тӹшлен анжыда. Ышдымы семӹнь агыл, а ышан семӹнь ӹлӹдӓ,

¹⁶ веремӓм пайда доно кычылтда, вет ти кечӹвлӓ худа ылыт.

¹⁷ Седӹндон шанен мыштыдымы идӓ ли, а Йымын ирӹкшӹм пӓлен нӓлӓш цацыда.

¹⁸ Йӱкшӹ лимешкӹ идӓ йӱ, тидӹ шӓлӓ кайышышкы канда, а Святой Шӱлӹш доно темӹн лидӓ.

¹⁹ Псалом дӓ шӱлӹш кымылангдымы хвален мырымаш гач иктӹ-весӹдӓ доно попыда, йӓнгӹштӹдӓ Господьлан мырыда дӓ семӹм шактыда.

²⁰ Мӓмнӓн Господьна Иисус Христос лӹм доно соок дӓ цилӓ верц Йымылан, Ӓтялӓн, таум ӹштӹдӓ.

²¹ Йымы гӹц лӱдӹн, иктӹ-весӹдӓм колышт ӹлӹдӓ.

²² Вӓтӹвлӓ ӹшке марыштым Господьым колыштмы семӹньок колыштышты,

²³ вет кыце Христос Церкӹлӓн вуй ылеш, дӓ Тӹдок кӓпӹн Ытарышыжы, тенгеок марат вӓтӹлӓн вуй ылеш.

²⁴ Кыце Церкӹ Христосым колыштеш, тенгеок вӓтӹвлӓӓт ӹшке марыштым цилӓ шотыштат колыштшашлык ылыт.

^25-26 Марывлӓ, Христосын Церкӹм яратымыжы семӹнь ӹшке вӓтӹдӓм яратыда. Церкӹм свящӓйӓш манын, Христос тӹдӹ верц Ӹшкӹмжӹм пуэн, тӹдӹм вӹд доно дӓ шамак доно мышкын ирӹктен.

²⁷ Христос Ӹшке анзыланжы лӹмлештӓрӓлтшӹ Церкӹм тамга ӓль кыптыр, ӓль иктӓ-ма техеньӹ гӹц пасна шагалтынежӹ, Церкӹжӹ святой дӓ нимахань ситӹдӹмӓш гӹц пасна лишӓшлык.

²⁸ Тенгеок марат вӓтӹжӹм ӹшке кӓпшӹм яратымы семӹнь яратышашлык. Вӓтӹжӹм яратышы ӹшкӹмжӹм ӹшке ярата.

²⁹ Иктӓт нигынамат ӹшке кӓпшӹм ужын керддӹмӹ ак ли, а тӹдӹм пукша дӓ ӹрӹктӓ. Тенгеок Церкӹ верц Господь цаца,

³⁰ вет мӓ Тӹдӹн кӓп лаштыкшы ылына, Тӹдӹн кӓпшӹ дон лужы ылына.

³¹ «Седӹндон пӱэргӹ ӓтяжӹ дон ӓвӓжӹм кода, ӹшке вӓтӹжӹ доно ушна, дӓ нӹнӹ коктын ик кӓп лит».

³² Тидӹ когон кого тайна, а попемжӹ Христос дӓ Церкӹ гишӓн.

³³ Тӓ лоштыдаат тенгеок лижӹ: каждыйжы ӹшкӹмжӹм яратымы семӹньок вӓтӹжӹм яратыжы, а вӓтӹ марыжы гӹц лӱдшӹ.