Еф 4 - У Согонь

4 ГЛАВА 1 Христосын Церкӹжӹн иктӹ ылмыжы. 17 Молнамшы ӹлӹмӓш дӓ у ӹлӹмӓш. 25 У ӹлӹмӓшлӓн кӓнгӓшвлӓ.

¹ Тенгежӹ мӹнь, Господь верц кычен питӹрӹмӹ эдем, нӓлмӹ ӱжмӓшдӓ доно яралын ӹлӓш сарвалем.

² Соок смирнӓ, пуры кымылан дӓ кужын тырхышы, иктӹ-весӹдӓм яратен цӹтӹшӹ лидӓ.

³ Шӱлӹшӹн кандымы иктӹ лимӓшӹм тӓмдӓм ушышы тыр доно перегӓш цацыда.

⁴ Ик кӓп дӓ ик Шӱлӹш улы, уанен вычымашат тенгеок иктӹ, тӓ тӹшкӹ ӱжмӹ ылыда.

⁵ Ик Господь, ик ӹнянӹмӓш, ик крестӹмӓш,

⁶ ик Йымы дӓ цилӓлӓн Ӓтя. Тӹдӹ цилӓн вӹлнӹ, цилӓн гач дӓ мӓ кӧргӹштӹнӓ ылеш.

⁷ А мӓ логӹцнӓ каждыйлан Христосын висен пумыжы семӹнь подарка пуалтын.

⁸ Седӹндон Писани попа: «Тӹдӹ кӱшкӹ кузен, пленӹш нӓлмӹвлӓм нӓнген дӓ эдемвлӓлӓн подаркам шӓлӓтен».

⁹ Тӹдӹн кузымыжы мам анжыкта? Тӹдӹн пӹтӓри мӱлӓндӹ пындашыш валымыжым агыл ма?

¹⁰ Тӹ Валышыжок, улы сӓндӓлӹкӹм темӓш манын, цилӓ пӹлгом гӹц кӱшкӹ кузен.

¹¹ Тӹдӹ иктӹвлӓжӹм Апостолеш, весӹвлӓм пророкеш, иктӹвлӓжӹм Пуры Уверӹм шайыштшывлӓэш, весӹвлӓм пастыреш дӓ тымдышеш шагалтен.

¹² Служымы пӓшӓлӓн, Христосын Кӓпшӹм пингӹдемдӹмӹлӓн святойвлӓм йӓмдӹлӓш манын, Тӹдӹ тенге ӹштен.

¹³ Тенгелӓ, остаткаэш мӓ цилӓн ӹнянӹмӓштӹ дӓ Йымын Эргӹжӹм пӓлӹмӓштӹ иктӹш шона, кушкын шошы, Христосын цицмӓшӹжӹ доно келшӹшӹ кӱкшӹцӹш шошы линӓ.

¹⁴ Коэ доно кӹшкӹмӹ, цилӓ тымдымашын мардежшӹ доно ӹфӹлен нӓнгемӹ, эдемвлӓ доно мадмы, йойланымаш гач мыштен алталымы изи тетя гань мӓлӓннӓ лиӓш ӹнжӹ ли,

¹⁵ а тӧрӹм кычен, яратен ӹлен, Тӹдӹн докы ушнымашкы цилӓ шотыштат кушкын толына, Тӹдӹжӹ вуй, Христос ылеш.

¹⁶ Тӹдӹ гӹц улы кӓп, иквӓреш кычышы каждый ежӹнг палшымы доно иктӹш ушнен шалген, каждый пасна лаштыкын ӹшке ӹштӹшӓшӹжӹм ӹштӹмӹжӹ семӹнь кушкеш дӓ яратымашты ӹшкӹмжӹм пингӹдемдӓ.

¹⁷ Тенгежӹ мӹнь Господьын лӹмжӹ доно тидӹм попем дӓ сарвалем: вес халыквлӓ семӹнь акел шанымаш доно пакыла идӓ ӹштӹ.

¹⁸ Нӹнӹн ышыштым пӹцкемӹш леведӹн, пӓлӹдӹмӹштӹ дӓ шӱмӹштӹ кӱӓнгмӹ гишӓн Йымын ӹлӹмӓш гӹц ӧрдӹжтӹ ылыт.

¹⁹ Нӹнӹ цилӓ шижмӓшӹм ямденӹт, ӹшкӹмӹштӹм шӓхӓрлӓнӓш пуэнӹт, сакой йӹрнӹкӹм шыкланен ӹштӓт.

²⁰ Но тӓ тенге агыл Христосым пӓлен нӓлӹндӓ.

²¹ Иисус гишӓн тӓ колында дӓ, Тӹдӹн тыменьшӹжӹ лин, Тӹдӹн доны ылшы лачокеш тымдымы линдӓ гӹнь,

²² тенгежӹ алталышы шыкланымаш доно изин-олен пӹтӓрӓлтшӹ первишӹ эдемдӓн молнамшы кайышыжы гӹц карангшашлык ылыда.

²³ Тӓмдӓн шӱлӹшдӓ дӓ шанымашда уэмшӓшлык ылыт,

²⁴ Йымы гань лиӓш ӹштӹмӹ, лачокын ядмыжы доно тӧр дӓ святойла ӹлӹшӹ у эдемӹш вӹдӹлӓлтшӓшлык ылыда.

²⁵ Седӹндон, алталымашым ӧрдӹжеш коден, цилӓн ӹшке лишӹлвлӓлӓндӓ лачокым попыда, вет мӓ иктӹ-весӹнӓн лаштыкшы ылына.

²⁶ Шӹдешкедӓ гӹнят, сулыкым идӓ ӹштӹ: кечӹ шӹцмешкӹ, шӹдешкӹмӹдӓм шуэн колтыда

²⁷ дӓ диаволлан вӓрӹм идӓ пу.

²⁸ Кӱ шолыштын, ӹнде ӹнжӹ шолышт, а незер эдемлӓн кышец айырен пуаш лижӹ манын, ӹшке кидшӹ доно лӓктӹшӓн пӓшӓм цацен ӹштӹжӹ.

²⁹ Тӓмдӓн ышмада гӹц нимахань йӹрнӹк шамак ӹнжӹ лӓк, а колыштшывлӓлӓн благодатьым кандышы, ӹнянӹмӓштӹ пингӹдемдӹшӹ пуры шамакым веле попыда.

³⁰ Йымын Святой Шӱлӹшӹжӹм идӓ ойхырыкты, вет тӓ ирӹкӹш лыкмы кечӹлӓн Шӱлӹш доно пӓлемдӹмӹ ылыда.

³¹ Цилӓ йӓнг качым, азнымашым, шӹдӹм, саслымым, мыскылымым цилӓ худа доно иквӓреш шуэн колтыда.

³² Иктӹ-весӹ докы пуры дӓ пышкыды кымылан лидӓ. Кыце Йымы тӓмдӓн вуйнаматдам Христос гач простен, тенгеок тӓӓт иктӹ-весӹдӓн вуйнаматдам простьыда.