Еф 3 - У Согонь

3 ГЛАВА 1 Язычниквлӓ верц Павелӹн ӹштӹмӹ пӓшӓжӹ. 14 Христосын яратымыжы.

¹ Седӹндон мӹнь, Павел, тӓ гишӓндӓ, молнам язычник ылшывлӓ гишӓн, Иисус Христос верц кычен питӹрӹмӹ ылам.

² Йымын благодатьшы доно мӹлӓнем ӹнянен пумы тӓлӓндӓ палшышы пӓшӓ гишӓн тӓ колында, векӓт:

³ кыце мӹнь пӹтӓри кӹтӹкӹн сиренӓм, пачын анжыктымы гач мӹлӓнем тайным пӓлдӓрӹмӹ.

⁴ Лыдмыда годым Христосын тайныжым яжон пӓлӹмем ынгылен кердӹдӓ,

⁵ тӹдӹм молнамшы шачышвлӓлӓн пӓлдӓрӹмӹ агыл, а ӹнде Тӹдӹн святой Апостол дон пророквлӓжӹлӓн Святой Шӱлӹш доно пачмы.

⁶ А тайныжы теве тиштӹ: язычниквлӓ Пуры Увер гач иудейвлӓ доно иквӓреш наследник дӓ ик кӓпӹн лаштыкшы лишӓшлык ылыт, Йымын сӧрӹмӹм нӹнӓт Христос Иисус доно ушнымашты нӓлӹт.

⁷ Йымын силажы ӹштӹмӹ семӹнь Тӹдӹн мӹлӓнем пумы благодатьшы гач мӹнь Пуры Уверӹн служышыжы линӓм.

⁸ Мӹлӓнем, святойвлӓ логӹц сек изилӓн, ти благодать пуалтын: Христосын ланзылаш лидӹмӹ пайдажы гишӓн язычниквлӓлӓн пуры уверӹм шайышташ

⁹ дӓ Иисус Христос гач цилӓ сӓндӓлӹкӹм ӹштӹшӹ Йымын курымвлӓ вашт шӹлтӹмӹ тайныжым цилӓлӓн пӓлдӓрӓш.

^10-11 Вет Христос Иисус Господьна гач Йымын курымаш шанымашыжы семӹнь Йымын шукы сӹнӓн кого ышыжы пӹлгом сӓндӓлӹквлӓштӹшӹ Начальство дон Властьвлӓлӓн ӹнде Церкӹ гач пӓлдӓрӹмӹ лишӓшлык.

¹² Христос доно ушнен шалген дӓ Тӹдӹлӓн ӹнянӹмӹ доно мӓ лӱдде дӓ ӹнянен Йымы докы толын кердӹнӓ.

¹³ Седӹндон тӓ верцдӓ нелӹ-качым ужмем гишӓн вуйдам идӓ сӓкӹ манын ядам, ти нелӹ-качыжы тӓмдӓн лӹмнердӓм лӱктӓ.

¹⁴ Тидӹ гишӓн мӓмнӓн Иисус Христос Господьын Ӓтяжӹ анзылан сукалтен шӹнзӓм –

¹⁵ ӓтя гӹц шачшы хоть-махань роды-йых пӹлгомыштат, мӱлӓндӹ вӹлнӓт ӹшке лӹмжӹм Тӹдӹ гӹц нӓлеш –

¹⁶ дӓ сарвалем: Тӹдӹ ӹшке лӹмлештӓрӓлтмӓшӹжӹн пайдажы доно келшӹшӹн тӓмдӓн шӱм кӧргӹдӓм ӹшке Шӱлӹшӹжӹ доно цат пингӹдемдӹжӹ.

^17-19 Тӓ яратымашеш важым колтыда, тӹдӹн вӹлӓн ӹлӹмӓшдӓм негӹцлӹдӓ, цилӓ святойвлӓ доно иквӓреш Христосын яратымашыжын кымдажым, кужыжым, келгӹцшӹм дӓ кӱкшӹцшӹм ынгылен керддӓ, Христосын цилӓ пӓлӹмӓш гӹц кӱшнӹ шалгышы яратымашыжым пӓлен нӓлдӓ манын, тӓмдӓн шӱмӹштӹдӓ ӹнянӹмӓш гач ӹлӓш Христосым пужы, тенге тӓ Йымын цилӓ цицмӓшӹжӹ доно темӹн кердӹдӓ.

²⁰ Кӧргӹштӹнӓ ӹштӹшӹ силажы доно мӓмнӓн ядмына ӓли шанымына гӹц пиш шукеш шукыракым ӹштен кердшӹ Йымылан

²¹ Церкӹштӹ Христос Иисус доно ушнымашты роды-йых гӹц роды-йыхыш, курым-курымеш лӹмлештӓрӓлтмӓш лижӹ. Аминь.