Еф 2 - У Согонь

2 ГЛАВА 1 Колымаш гӹц ӹлӹмӓшӹш. 11 Иудей дӓ вес халыквлӓм Христос иктӹш уша.

¹ Тӓ пӹтӓри худа пӓшӓдӓ дӓ сулыкда гишӓн колышы линдӓ.

² Тӹ веремӓн тӓ худам ӹштен ӹлендӓ, ти сӓндӓлӹкӹштӹшӹ ӹлӹмӓш-овуца доно келшен, воздухыштышы властьын тӧрӓжӹн – шамак колыштдымывлӓ лошты кӹзӹтӓт ӹштӹшӹ шӱлӹшӹн – шанымыжы семӹнь ӹштендӓ.

³ Нӹнӹ лошты пӹтӓри мӓӓт цилӓн кӓп дӓ йӓнгнӓн сулыкан шыкланымышты семӹнь, кӓп дон йӓнгӹн дӓ шанымашын ядмыштым шоктен ӹленнӓ дӓ кӧргӹ природына доно молы семӹньок Йымын шӹдӹжӹм ӹшке вӹлӓннӓ ужшашлык ылына ыльы.

⁴ Но пурылыклан паян Йымы ӹшке кого яратымашыжы доно мӓмнӓм тенге яратен,

⁵ мӓмнӓм, худа пӓшӓвлӓнӓ гишӓн колышывлӓм, Христос доно иквӓреш ӹлӹшӹм ӹштен. Йымын благодатьшы доно тӓ ытарымы ылыда.

⁶ Тенгеок Йымы мӓмнӓм Христос Иисус доно иквӓреш ӹлӹжтен дӓ Тӹдӹн доно ушнымашты мӓмнӓм пӹлгом сӓндӓлӹквлӓшкӹ шӹнден.

⁷ Мӓлӓннӓ Христос Иисус гач анжыктымы пурыжы доно Йымы Ӹшкӹмжӹн благодатьшын шукы пайдажым анзыкылашы курымвлӓштӹ пӓлдӹртӓш шанен.

⁸ Благодать доно, ӹнянӹмӹ гач, тӓмдӓм ытарымы. Ытарымаш тӓ гӹцдӓ агыл, а Йымын подаркажы ылеш.

⁹ Иктӓт хвален ӹнжӹ керд манын, ытарымаш эдемӹн пӓшӓвлӓжӹ гишӓн агыл пуалтеш.

¹⁰ Мӓ Йымын ӹштӹмӹжӹ ылына, Тӹдӹн анзыцок йӓмдӹлӹмӹ пуры пӓшӓжӹм ӹштӓш Тӹдӹ мӓмнӓм Христос Иисус гач ӹштен.

¹¹ Тенгежӹ ӓшӹндӓрӹдӓ: пӹтӓри тӓ, шачынжы язычниквлӓ, – кӓпӹштӹм кид доно пӹчмӹ гишӓн пӹчмӓн маналтшывлӓ тӓмдӓм пӹчдӹмӹ маныт –

¹² тӹ веремӓн Христос гӹц пасна ылында дӓ Израиль халыклан йӓл ылында, Йымын пумы сӧрӹмӓшӓн согоньвлӓлӓн ӧрдӹж ылында, тӓ сӓндӓлӹкӹштӹ анзыкылан уанымаш дӓ Йымы гӹц пасна ӹлендӓ.

¹³ А ӹнде тӓ, молнам мӹндӹрнӹ ылшывлӓ, Христос Иисус доно ушнымашты Христосын Вӹржӹ гач лишӹл линдӓ.

^14-15 Вет Христос – мӓмнӓн тырна, язычниквлӓ дон пӹчмӓнвлӓ гӹц Тӹдӹ ик тӹшкӓм ӹштен дӓ нӹнӹм айырышы стенӓм, вес семӹньжӹ, тышманланымашым, ӹшке колымашыжы доно шӓлӓтен. Ти кокты гӹц Ӹшкежӹ доно ик у эдемӹм ӹштӓш манын, законым дӓ тӹдӹн шӱдӹмӓшвлӓ дон тергӹмӓшвлӓжӹм укеш лыктын, тидӹн доно тырым канден.

¹⁶ Тенге Христос тышманланымашым крестӹ гач пӹтӓрӓш, тӹштӹ ти коктым Йымы доно пуремдӓш дӓ нӹнӹм ик кӓпӹш ушаш шанен.

¹⁷ Тӹдӹ толын дӓ тӓлӓндӓ, мӹндӹрнӹ ылшывлӓлӓнӓт, лишнӹ ылшывлӓлӓнӓт, тыр гишӓн пуры уверӹм шайыштын.

¹⁸ Христос гач нӹнӹжӓт, нинӹжӓт ик Шӱлӹш доно Ӓтя докы шон кердӹнӓ.

¹⁹ Тенгежӹ, тӓ ӹнде йӓл дӓ ӧрдӹж эдем ада ыл, а святойвлӓ доно иквӓреш ик халыкок линдӓ, Йымын эдемвлӓжӹ ылыда.

²⁰ Тӓ Апостол дон пророквлӓн негӹцеш ӹштӹмӹ пӧрт ылыда, а негӹцӹн огол кӱжӹ – Иисус Христос Ӹшкежок.

²¹ Тӹштӹ улы стройка тӧр ушна, кушкеш дӓ Господьын святой пӧртшӹ лиэш.

²² Христос доно ушнымашты тӓӓт Шӱлӹш доно Йымын пӧртшӹ лидӓ.