СВЯТОЙ АПОСТОЛ ПАВЕЛӸН КОЛОССЯНВЛӒЛӒН КОЛТЫМЫ СИРМӒШӸЖӸ 4 - У Согонь

4 ГЛАВА 1 Христослан ӹнянӹшӹ семня дон рабвлӓ гишӓн. 2 Церкӹлӓн кӓнгӓшвлӓ. 7 Цеверӹн кодаш согонь.

¹ Хозавлӓ, рабвлӓ доно цилӓ шотыштат тӧр ӹштӹшӹ лидӓ. Идӓ монды: пӹлгомышты тӓмдӓнӓт Хозада улы.

² Тырхен дӓ янгылыде со ыдылда, таум ӹштӹдӓ.

³ Ӹшке увержӹм шӓрӓш, Христосын тайныжым увертӓрӓш Йымы мӓлӓннӓ амасам пачшы манын, мӓ верцнӓӓт ыдылда. Тӹ тайна гишӓнок мӹнь кӹзӹт питӹрӹмӓштӹ шӹнзем,

⁴ дӓ мӹнь тӹдӹм раскыдын увертӓрӹшӓшлык ылам. Мӹлӓнем ти пӓшӓм керӓл семӹнь ӹштӓш манын ыдылда.

⁵ Ӧрдӹжвлӓ доно ӹшкӹмдӓм шот доно кычыда, цилӓ йӧнӓн веремӓм кычылтда.

⁶ Шаяда со пуры, санзал доно тотангдымы лижӹ, каждыйлан кыце келесӹмӹлӓ, пӓлӹшӓшлык ылыда.

⁷ Господьлан ӹнянӹн служышы, мӓ донна иквӓреш ӹштӹшӹ яратымы Тихик шӱмбел тӓлӓндӓ мӹнь гишӓнем цилӓ келесӓ.

⁸ Тидӹлӓнок тӹдӹм тӓ докыда колтенӓм. Тӹдӹ кыце ӹлӹмӹдӓм пӓлен нӓлжӹ дӓ йӓнгдӓм кымылангдыжы.

⁹ Тӹдӹ сага ӹнян дӓ яратымы Онисим шӱмбелнӓ миӓ, тӹдӹ тӓ логӹцдӓ иктӹжӹ ылеш. Нӹнӹ тиштӹшӹ пӓшӓ гишӓн цилӓ увертӓрӓт.

¹⁰ Мӹнь сагаэм кызаматышты шӹнзӹшӹ Аристарх, тенгеок Варнаван Марк двоюродный шӱмбелжӹ тӓлӓндӓ шӓлӓм колтат. Марк шотышты мам ӹштӹмӹлӓ, мӓ келесеннӓ: тӹдӹ тӓ докыда миӓ гӹнь, пурын вӓшлидӓ.

¹¹ Эче Иуст манмы Иисус шӓлӓм колта. Пӹчмӓнвлӓ логӹц нӹнӹ веле Йымын Кугижӓншӹлӓн мӹнь сагаэм пӓшӓм ӹштӓт. Нӹнӹ мӹлӓнем кымылангдымаш ылыныт.

¹² Иисус Христосын цоражы, тӓмдӓн Епафрасда шӓлӓм колта. Нимахань ситӹдӹмӓшдӹмӹ лидӓ, цилӓ шотыштат Йымын шанымыжы семӹнь ӹлӹдӓ манын, тӓ верцдӓ цӓрнӹде ыдылын кредӓлеш.

¹³ Тӹдӹ тӓ верцдӓ дӓ Лаодики дон Иерапольыштышывлӓ верц улы кымыл доно шытырлана, тидӹм мӹнь ӹняндӓрен кердӓм.

¹⁴ Яратымы врач Лука дӓ Димас тӓлӓндӓ шӓлӓм колтат.

¹⁵ Лаодикиштӹшӹ шӱмбелвлӓлӓн, тенгеок Нимфанлан дӓ тӹдӹн пӧртешӹжӹ погынышы церкӹлӓн шӓлӓм келесӹдӓ.

¹⁶ Ти сирмӓшӹм тӓ доныда лыдмыкы, тӹдӹм Лаодикиштӹшӹ церкӹштӓт лыдыктыда, Лаодикиштӹшӹ сирмӓшӹм тӓӓт лыдда.

¹⁷ Архипплӓн келесӹдӓ: «Анжы, Господь доно ушнымашты нӓлмӹ пӓшӓэтӹм ӹштен шокты».

¹⁸ Мӹнь, Павел, ти шӓлӓм ӹшке кидем доно сирем. Мӹньӹн питӹрӹмӓштӹ шӹнзӹмем ӓштӹдӓ. Тӓ доныда Йымын благодатьшы лижӹ. Аминь.