СВЯТОЙ АПОСТОЛ ПАВЕЛӸН КОЛОССЯНВЛӒЛӒН КОЛТЫМЫ СИРМӒШӸЖӸ 3 - У Согонь

3 ГЛАВА 1 Тошты дӓ у эдем. 18 Христослан ӹнянӹшӹ семня дон рабвлӓ гишӓн.

¹ Тӓ Христос доно иквӓреш ӹлӹжӹндӓ гӹнь, тенгежӹ пӹлгомыштышым кӹчӓлдӓ. Тӹштӹ Йымын вургымла велнӹжӹ Христос шӹнзӓ.

² Мӱлӓндӹ вӹлнӹшӹ гишӓн агыл, а пӹлгомыштышы гишӓн шаныда.

³ Вет тӓ колендӓ, дӓ тӓмдӓн ӹлӹмӓшдӓ Христос доно иквӓреш Йымы доно ушнымашты кайде перегӓлтеш.

⁴ Кынам Христос, тӓмдӓн ӹлӹмӓшдӓ, толеш, тӹнӓм тӓӓт Тӹдӹн доно иквӓреш лӹмлешт толыда.

⁵ Седӹндон ти сӓндӓлӹкӹштӹшӹ тӓмдӓн ма улы, тӹдӹм пӹтӓрӹдӓ: шӓхӓрлӓнӹмӹм, ярдымы кайышым, темдӹмӹ, сулыкан кымыл шыпшмым, шыкланымым. Шыкланымыжы идоллан кымалмы доно икток ылеш.

⁶ Техень кайышвлӓ гишӓнок шамакым колыштдымы эдемвлӓ вӹкӹ Йымын шӹдӹжӹ вазеш.

⁷ Андак тӓӓт техень кайыш кид лӹвӓлнӹ ылында, ӹшкӹмдӓм тенгеок кычендӓ.

⁸ А ӹнде тӓ цилӓок ӧрдӹшкӹ карангдыда: шӹдӹм, азнымым, йӓллӓн худам шанымым, эдем вӹкӹ попымым, ышма гӹц лӓкшӹ худа шаям.

⁹ Икӹжӓк-иктӹлӓндӓ алтален идӓ попы, вет вӹлецдӓ тошты эдемӹм пӓшӓжӹ доно иквӓреш кыдаш шуэндӓ,

¹⁰ у эдемӹшкӹ вӹдӹлӓлтӹндӓ. Тӹдӹжӹ, Ӹштӹшӹжӹ ганьы лин миэн, со уэмеш, Йымым цицмӓш пӓлӓш тыменеш.

¹¹ Тиштӹ эллинӓт, иудейӓт, пӹчмӓт, пӹчдӹмӓт, варварат, скифӓт, рабат, ирӹкӓнӓт уке, но Христос – тидӹ цилӓ дӓ цилӓштӓт.

¹² Тенгежӹ тӓ, Йымы айырен нӓлмӹ, святой дӓ яратымы эдемвлӓ, йӓнг вашт жӓлӓйӹмӓш, пуры, смирнӓ, шӹмӓ ылмы, шукы тырхымаш доно вӹдӹлӓлтдӓ.

¹³ Икӓнӓ-иктӹдӓм цӹтен ӹлӹдӓ, тӓ логӹцдӓ иктӓжӹн весӹ докы ӧпкӹдӓ улы гӹнь, вӓшӓ-вӓшӓ простьыда. Кыце Христос тӓмдӓм простен, тӓӓт тенгеок ӹштӹдӓ.

¹⁴ Сек анзыцшок яратымаш доно вӹдӹлӓлтдӓ, тӹдӹ цилӓ яжом уша.

¹⁵ Йӓнгӹштӹдӓ Йымын тыржы хозаланыжы. Тӓмдӓм, ик кӓпӹн лаштыквлӓжӹм, тӹ тырышкы ӱжмӹ. Таум ӹштен мыштышы лидӓ.

¹⁶ Шӱмӹштӹдӓ Христосын шамакшын улы пайдажы ӹлӹжӹ. Улы ыш-пӓлӹмӓш доно икӹжӓк-иктӹдӓм тымдыда, икӹжӓк-иктӹлӓндӓ кӓнгӓшӹм пуда, псаломым, хвальымы мырым дӓ шӱлӹш кымылангдымы мырым шӱмӹштӹдӓ Господьлан таум ӹштен мырыда.

¹⁷ Мам попедӓ ӓль мам ӹштедӓ, цилӓок Господь Иисус Христос лӹм доно лижӹ, Тӹдӹ гач Йымылан дӓ Ӓтялӓн таум келесӹдӓ.

¹⁸ Вӓтӹвлӓ, марыдам колыштда, Господьлан ӹнянӹшӹ ӹдӹрӓмӓшлӓн тидӹ олмыдеш.

¹⁹ Марывлӓ, вӓтӹдӓм яратыда дӓ нӹнӹ доно костан идӓ ли.

²⁰ Тетявлӓ, ӓтя-ӓвӓдӓм цилӓ шотыштат колыштда, Господьлан тидӹ келшӓ.

²¹ Ӓтявлӓ, тетявлӓдӓн кымылышты ӹнжӹ валы манын, нӹнӹм соок идӓ пелештӹ.

²² Рабвлӓ, мӱлӓндӹ вӹлнӹшӹ хозадавлӓм цилӓ шотыштат колыштда. Шӱдӹмӹштӹм, эдемлӓн ярал лиӓш цацен, хоза анзылны веле агыл, а ире шӱм доно, Йымы гӹц лӱдӹн ӹштӹдӓ.

²³ Цилӓ пӓшӓдӓм эдемлӓн агыл, а Господьлан ӹштӹмӹ семӹнь йӓнг вашт ӹштӹдӓ.

²⁴ Господь гӹц тӓр шотеш наследствым нӓлшӓшлыкдам тӓ пӓледӓ, вет Господь Христослан служедӓ.

²⁵ А акъярым ӹштӹшӹ ӹшке акъярыжы семӹнь нӓлеш. Йымы цилӓм ик семӹнь анжа.