โอบาดียา 1 - ซูรัจ ปือมือเลา นะ ตูฮัด

เอโดม นู งันตืองัน กือนา บูวัจ บรี รือนัฮ

¹ ลาฆู มีปี นะ โอบาดียา ตูฮัด_ ฌาดี จะ_ ตูฮัด บือซัยํ เดะ อาตัซ ญา มือเลา ปาซัน ลาฆู นะ เอโดม กะฆีนี จะ กามี ดืองัยํ บรีตา ดาตัก เดะ ตูฮัด บือซัยํ เดะ อาตัซ ซือมียา บาวา บรีตา ซืออูรัก กือนา อาตัจ ปี เดะ ตืองัฮ ลูมอฮ บักซา ซือมียา มือเลา จะ “บีกัซ เลอ_ บรี กีตา ปี บูวัจ ลาฆู บือปรัก ฌางัน นังฆรี เอโดม.”

² ลีฮัจ เลอ_ กู นะ บูวัจ บรี เกา ดือมิ เดะ ตืองัฮ ลูมอฮ บักซา ซือมูฮา บรี ราตา ซือมียา มือฌัฮ โตระ กะ เกา.

³ ฮาตี งันตืองัน นะ เกา บือเลฮ ตีปู เกา ตะอาซิก เกา นู ดูโดะ เดะ จือลัฮ บาตู นู อาดา ตือปัจ ดูโดะ นู ตีงี โตระ. เกา บือฮีมัจ เดะ ฮาตี จะ “ซาปา เลอ_ นะ บรี กู ตูโรด มาแรฮ กะ ตานัฮ?”

⁴ มีเซ จะ เกา มือลายัก ญาแญะ ปี ตีงี ซือรูปา บูโรก ราฌา วาลี มีเซ ซารัก นะ เกา ดูโดะ ซามา ตืองัฮ กาวัด บีตัก กู นะ รือฆัก เกา ตูโรด ดาตัก มาแรฮ เดะ ตือปัจ อีตู ตูฮัด บือซัยํ เดะ อาตัซ มือเลา กะฆีนี เลอ.

ลาฆู ซามุน บูนอฮ นะ บาลัซ ลาฆู ฌาฮัจ นะ เอโดม

⁵ ดัฮ อูรัก ปือญูรี มาแรฮ ซารี เกา ดัฮ ลูมอฮ ปือญามุน มาแรฮ เดะ วะตู มาลับ (เกา กือนา บูวัจ บรี ฌาฮานัม กะฮามี) กูญา นะ จูรี บีดา ญาวา นะ กูญา ตะอาซิก บูกัด เฆอ? ดัฮ ซือมียา มูงอจ บูวัฮ อางุน มาแรฮ ซารี เกา กูญา นะ ตาโรฮ บรี ลือเบฮ ซือตืองัฮ บูกัด เฆอ?

⁶ เอซาว กือนา ซามุน ฌู ฮาบิฮ ดัฮ กะฮามี เลอ โกะ ซือบารัก บรือฆา กือนา มือรูมะ ปี ฮาบิฮ ดัฮ.

⁷ กาวัด นู บาฌิ ฌางัน เกา บือเลฮ ตีปู เกา กูญา บือเลฮ โปรฮ บรี เกา ปี รอจ กะ ตือกอซ นังฆรี กาวัด นู บาฌิ ฌางัน เกา บือเลฮ อาเลฮ ลาวัด ฌือนัฮ เดะ เกา ดัฮ กาวัด นู มากัด นาซี นะ เกา โปด_ ตืองะ ปือญรัจ ซือกัจ เกา ลาฆู อีนี ฮอย ซาปา มาโซะ เดะ ฮาตี ลาลู.

⁸ ตูฮัด บือซัยํ เดะ อาตัซ มือเลา จะ เดะ อารี อีตู กู นะ บูวัจ บรี ซือมียา ปานัย อากัน ฌาฮานัม ฮาบิฮ เดะ เอโดม บูวัจ บรี ลาฆู มาโซะ ฮาตี ฌาฮานัม เดะ บูเกะ เอซาว.

⁹ โอ เทมาน เออ_ อูรัก มูดา นู ตือฆัยํ อูรัจ นะ เกา นะ ตาโกจ กะฆีนี เลอ_ ราตา ซือมียา นู มาแรฮ ดาตัก เดะ บูเกะ เอซาว นะ กือนา บูนอฮ ดัฮ.

เอโดม บูวัจ เตด บาฌิ ฌางัน อาดี

¹⁰ กรานา ลาฆู บูวัจ โตระๆ นู เกา บูวัจ กะ ยาโกบ_ อาดี เดะ เกา ลาฆู จือและ นะ ตูโดก เกา ฮาบิฮ เกา นะ กือนา บูวัจ บรี ฌาฮานัม ปี ซือลาลู.

¹¹ เดะ อารี นู เกา บือดีรี โวฮฌาโวฮ เตด ปือดูลี เดะ อารี นู ซือมียา บักซา อาซิก บราโกจ ซือบารัก นะ อาดี เดะ เกา ปี อาดา ลูมอฮ บักซา อาซิก มาโซะ มาแรฮ_ ฌาลัด ปีตู นังฆรี นะ ญา ยิบละ อาเมด นังฆรี เยรูซาเลม เกา โปด ซือรูปา กะ ลูมอฮ บักซา อาซิก นู บูวัจ บรี เยรูซาเลม ฌาฮานัม.

¹² เกา เตด บือฆูนา นะ บือดีรี ลีฮัจ ฌางัน ลาฆู ซูกา ฮาตี เดะ กาลา อาดี เดะ เกา อาดา ลาฆู ซูซัฮ เกา เตด บือฆูนา นะ ซูกา ฮาตี อาฆัฮ ฆือละ ลูมอฮ ยูดา เดะ อารี นู ลูมอฮ กูญา ซือมูฮา กือนา บูวัจ บรี ฌาฮานัม เกา เตด บือฆูนา นะ อาฆัฮ ฆือละ เดะ อารี นู ซูซัฮ ปายัฮ อีตู.

¹³ เกา เตด บือฆูนา นะ มาโซะ กะ ปีตู นังฆรี นะ ลูมอฮ ซือมียา นะ กู เดะ อารี อีตู นู กูญา ฌาฮานัม เกา เตด บือฆูนา นะ ปาคัจ ตีญุง ลีฮัจ ฌางัน ลาฆู ปือนอฮ เดะ ฮาตี เดะ อารี อีตู นู ญา ฌาฮานัม เกา เตด บือฆูนา นะ ซามุน อาเมด ซือบารัก นะ ญา ปี เดะ อารี อีตู นู ญา ฌาฮานัม.

¹⁴ เกา เตด บือฆูนา นะ บือดีรี ซือกัจ เดะ จีปัก ฌาลัด นะ ญา บีดา นะ ซือกัจ รีฆะ ลูมอฮ นู ลารี ปี ซือลูนี นะ ญา เกา เตด บือฆูนา นะ อาตัจ ซือมียา นะ ญา นู ลือปัซ ดัฮ_ บรี กะ ซือตรู เดะ อารี นู กูญา ซูซัฮ ปายัฮ.

¹⁵ ซาเบะ อารี นะ ตูฮัด บือซัยํ เดะ อาตัซ ดาปิก มาแรฮ ดัฮ นู ญา นะ ลาวัด ลูมอฮ บักซา ซือมูฮา. เกา บูวัจ กะ กูญา กะฮามี โปด นะ อาดา ซือมียา มาแรฮ บูวัจ กะ เกา กะฆีเตอ เลอ. ลาฆู ปือบูวัจ นะ เกา นะ มาแรฮ ฆูโฆยํ เดะ อาตัซ ปาลา นะ เกา ตะอาซิก.

¹⁶ กาเญา ลูมอฮ ยูดา ดือละ โอะ เดะ อาตัซ บูเกะ นู จรัฮ บาฌิ นะ กู กะฮามี ลูมอฮ บักซา อาซิก ซือมูฮา โปด_ นะ โอะ เตด บราดู กะฆีเตอ เลอ ลูมอฮ กูญา นะ โอะ_ ตือลัด ตูโรด ปี นะ ฌาดี ซือรูปา บือกะ นู เตด ดือละ ฌาดี เลอ.

ลาฆู ฌือนัฮ นู ปือญูดัฮ นะ อิซราเอน

¹⁷ ตาปี นะ อาดา ซือมียา นู ลือปัซ เดะ บูเกะ ซีโยน ตือปัจ อีตู โปด_ นะ จรัฮ บาฌิ. บือแนฮ บักซา นะ ยาโกบ นะ ราปัซ อาเมด ตือปัจ ตานัฮ นู ฌาดี ตือปัจ ปือซากา นะ กูญา.

¹⁸ บือแนฮ บักซา นะ ยาโกบ นะ ฌาดี อาปี บือแนฮ บักซา นะ โยเซบ นะ ฌาดี ญาลา อาปี บือแนฮ บักซา นะ เอซาว นะ ฌาดี ตูโงน ปาดี อาปี ฌางัน ญาลา อาปี นะ ตูนู ฮางอซ บรี ฮาบิฮ บือแนฮ บักซา นะ เอซาว นะ ฮอย ซาปา ลือปัซ ลาลู ซาเบะ จะ ตูฮัด บือซัยํ เดะ อาตัซ บือเลฮ มือเลา ดัฮ.

¹⁹ โกะ ซือมียา อีตู นู ดูโดะ เดะ เนเกบ นะ บือเลฮ บูเกะ เอซาว ฌาดี นะ กูญา โกะ ซือมียา อีตู นู ดูโดะ เดะ ตือปัจ ตานัฮ รือนัฮ นะ บือเลฮ นังฆรี ฟีลิซะเตีย ฌาดี นะ กูญา กูญา นะ ราปัซ นังฆรี เอฟราอิม ฌางัน นังฆรี ซะมาเรีย ฌาดี นะ กูญา เบนยามิน นะ บือเลฮ กิเลอาด ฌาดี นะ ญา.

²⁰ ลูมอฮ ซือมียา นะ อิซราเอน นู กือนา กือโปก ปี ฌาดี ปราโซฮ นะ ดูโดะ เดะ นังฆรี คานาอัน ปี ฌู รอจ ซาเรฟัด ลูมอฮ เยรูซาเลม นู กือนา กือโปก ปี ฌาดี ปราโซฮ เดะ เซฟาราด นะ บือเลฮ ตูโปะ แนฮฌือแนฮ เดะ โซะ เนเกบ_ ฌาดี นะ กูญา.

²¹ ซือมียา นู ตูโลก นังฆรี บรี ลือปัซ_ นะ ญาแญะ ปี กะ บูเกะ ซีโยน บีดา นะ ปือบือลา บูเกะ เอซาว. ตูฮัด บือซัยํ เดะ อาตัซ โปด_ นะ ฌาดี ราฌา อาตัซ นังฆรี ซือมูฮา.