เนฮะมียา 1 - ซูรัจ ปือมือเลา นะ ตูฮัดเนฮะมียา บือซาโวจ บีดา ลูมอฮ ซือมียา นะ ญา 1 อีนี ฌาดี ปือมือเลา นะ เนฮะมียา นานะ นะ ฮาคาลียา. เดะ บูลัด คีซะเลบ_ เดะ ตาโฮด นู ดูวา ปูโลฮ (20)_ กาลา กู อาดา ดูโดะ เดะ นังฆรี ซูซา_ ฌาดี นังฆรี รูมัฮ ฌาฆา เตอ_ 2 ฮานานี_ อาดี บราดี นะ กู ซืออูรัก_ มาแรฮ ดาตัก เดะ นังฆรี ยูดา_ ฌางัน โกะ กีลากี อาซิก ซือตืองัฮ. กู บือเลฮ ตาญา_ ปาซัน ลาฆู โกะ ลูมอฮ ยิว_ นู ลือปัซ เดะ ลาฆู มาตี_ ลือปัซ เดะ ลาฆู นู กือนา กือโปก ปี บรี ฌาดี ปราโซฮ. กู เตอ_ อาดา ตาญา กูญา ปาซัน นังฆรี เยรูซาเลม ฌูฆา. 3 กะฆีเตอ_ กูญา ตีกัฮ กะ กู จะ_ “ซือมียา นู ลือปัซ เดะ ลาฆู มาตี เตอ_ นู อาดา ดูโดะ เดะ โซะ นังฆรี อีตู_ ฌาดี ซือมียา นู ลือปัซ เดะ ลาฆู กือนา กือโปก ปี ฌาดี ปราโซฮ_ กูญา อาดา ลาฆู ซูซัฮ ลาฆู จือและ โตระ. ดีนิง นังฆรี เยรูซาเลม โปด_ รูโตฮ. ปีตู นังฆรี_ กือนา อาปี ตูนู ดัฮ.” 4 กาลา กู ดืองัยํ โกะ ปือมือเลา อีนี_ กู ดูโดะ มือนาแงฮ ซูซัฮ ฮาตี บาญะ อารี. กู อาดา บือตาฮัด นาซี_ บือซาโวจ กะ ตูฮัด เดะ โซะ อาตัซ ลาแงะ ซือรูโลยํ. 5 กู บือซาโวจ จะ_ “โอ_ ตูฮัด บือซัยํ เดะ อาตัซ_ ตูฮัด โซะ อาตัซ ลาแงะ_ ตูฮัด นู บือซัยํ โตระ_ นู โกะ ซือมียา บรีงัจ ตาโกจ เดะ ญา เลอ_ นู บูวัจ ตูโรจ กะ ปือมือเลา บือฌาญี บือตือตู_ นู ซายัก กือฌะ กือมัซ_ กะ ซือมียา นู ซายัก ญา_ นู บูวัจ ตูโรจ กะ โกะ ปือมือซัด นะ ญา. 6 มีตา บรี ตูฮัด จีเฮะ ตือลีงา มือนีงัย_ มีตา บรี ตูฮัด ญรือลัก มาตา_ ตีญุง ลีฮัจ_ บีดา นะ มือนีงัย กะ ปือมือเลา บือซาโวจ นะ กู_ นู ฌาดี ปราโซฮ นะ เกา. กู อาดา บือซาโวจ กะ เกา เดะ วะตู อีนี_ ซียัก มาลับ_ บีดา โกะ ลูมอฮ อิซราเอน นู ฌาดี ปราโซฮ นะ เกา. กู อาดา ซาโงะ ดูซา นะ โกะ ลูมอฮ อิซราเอน_ นู กามี บือเลฮ บูวัจ กะ เกา. ซาเบะ จะ_ กู ฌางัน บือแนฮ นะ กู_ บือเลฮ บูวัจ ดูซา ดัฮ. 7 กามี บือเลฮ บูวัจ ปรางัย นู ตะอารัฮ โตระ_ ฮอย เตด บือเลฮ ฌาฆา ปือมือเลา ฮูโกบ ฌางัน ฮาดัจ ฮูโกบ_ นู เกา บือเลฮ มือเลา ดัฮ ฌางัน มูซา_ ซือมียา นู ฌาดี ปราโซฮ นะ เกา. 8 มีตา บรี อีงัจ รอจ กะ ปือมือเลา นู เกา บือเลฮ มือเลา ดัฮ ฌางัน มูซา_ ซือมียา นู ฌาดี ปราโซฮ นะ เกา จะ_ ‘ดัฮ ลูมอฮ กาเญา ฮอย เตด รือมัก ฌางัน กู_ กู นะ บูวัจ บรี กาเญา ปือจัฮ บือลัฮ ปี_ ราตา เดะ ลูมอฮ บักซา อาซิก. 9 ตาปี ดัฮ กาเญา ปาเระ มาแรฮ ซารี กู_ ปือบือลา บูวัจ ตูโรจ โกะ ปือมือซัด นะ กู_ มีเซ จะ_ ลูมอฮ กาเญา กรือจัย ปี_ ดูโดะ โซะ บาวัฮ ลาแงะ นู ฌาโวฮ โตระ_ กู นะ บือมุน กาเญา มาแรฮ_ เดะ ตือปัจ อีตู_ บาวา มาแรฮ กะ ตือปัจ นู กู บือเลฮ ปีเลฮ_ บีดา บรี ปือนามา นะ กู อาดา เดะ ตือปัจ อีตู เลอ.’ 10 กูญา อีนี ฌาดี โกะ ปราโซฮ_ ฌาดี โกะ ลูมอฮ ซือมียา นะ เกา_ ตูฮัด เออ_ นู เกา บือเลฮ ตือบุซ ดัฮ_ ฌางัน ลาฆู ปือมือฆัฮ โตระ_ ฌางัน ตางัน นู ตือฆัยํ อูรัจ นะ เกา เลอ. 11 โอ ตูฮัด_ มีตา จีเฮะ ตือลีงา มือนีงัย กะ ปือมือเลา บือซาโวจ นะ กู นู ฌาดี ปราโซฮ นะ เกา_ ฌางัน ปือมือเลา บือซาโวจ นะ โกะ ลูมอฮ ปราโซฮ นะ เกา_ นู ซูกา ฮาตี บรีงัจ ตาโกจ เดะ ปือนามา นะ เกา. มีตา บรี ลาฆู นะ กู_ นู ฌาดี ปราโซฮ นะ เกา_ นะ ซือลือซัย บาฌิ เดะ อารี อีนี. มีตา บรี กะ ราฌา นะ ตือจีฮัด กะ กู เลอ.” วะตู อีตู_ กู ฌาดี ซือมียา บาวา เจาะ อาระ อางุน บรี กะ ราฌา โอะ. |