ซูรัจ นะ โยบ 1 - ซูรัจ ปือมือเลา นะ ตูฮัดโยบ ฌางัน ซือมียา ซือรูมัฮ 1 อาดา กีลากี ซืออูรัก เดะ นังฆรี อูซะ_ ปือนามา โยบ_ ฌาดี ซือมียา บาฌิ_ ฮาตี รือมัก_ ฌาดี ซือมียา ตูเฮะ กะ ตูฮัด_ อาเลฮ ลารี เดะ ลาฆู ฌาฮัจ. 2 ญา อาดา นานะ กีลากี ตูโฌฮ อูรัก_ ฌางัน นานะ นีบีนี ตีฆา อูรัก 3 โซะ โกะ บือนาตัก ปือบือลา นะ ญา_ อาดา กาเมก ตูโฌฮ รีบู (7,000) อีโกยํ_ อูตัย ตีฆา รีบู (3,000) อีโกยํ_ ลือมู ลีมา ราตุซ (500) ฆู_ กูดา อายา บาซา ดือมิ ลีมา ราตุซ (500) อีโกยํ. ญา โปด_ อาดา โกะ ปราโซฮ บาญะ อูรัก ซูโงฮ. กะฆีเตอ_ กีลากี อีนี ญา กายา บาญะ เดะ กาวัด_ เดะ โกะ ลูมอฮ ซือมียา โซะ อาตัซ มาตา อารี. 4 โกะ นานะ กีลากี นะ ญา_ ลาดัจ บูวัจ ลาฆู บรามัย_ บูวัจ โกะ ซือบารัก มากัด_ เดะ รูมัฮ นะ กูญา ซอก ซา อูรัก_ ตูโรจ กะ อารี นะ ซิกมาซิก. กูญา นะ ซูโรฮ ปี บลาโลก อาดี นีบีนี ตีฆา อูรัก นะ กูญา_ มาแรฮ มากัด_ โอะ_ ฌางัน กูญา. 5 กาลา อารี บรามัย มากัด อีตู นะ ซุจ ฆือนะ ดัฮ_ โยบ นะ ซูโรฮ ปี บาโซฮ ญาวา นะ กูญา ซือมูฮา_ บรี จรัฮ บาฌิ. ญา นะ บีกัซ เดะ วะตู มูกัยํ_ อาเกะ ซือบารัก ตูนู มือญือมัฮ_ ตูโรจ บือกะ นู กูญา อาดา บราปา อูรัก_ ซาเบะ โยบ มือเลา จะ_ “อาซัน จะ_ นานะ นะ กู บือเลฮ บูวัจ ลาฆู บือดูซา_ ซูปัฮ อาโบยํ ตูฮัด เดะ ฮาตี นะ กูญา.” โยบ ญา บูวัจ กะฆีนี มาแรฮ ซือรูโลยํ. ซีตัด มือเลา ปาซัน ลาฆู บาฌิ ตือปัจ นะ โยบ 6 อาดา ซืออารี_ โกะ ฮูลู บาลัก ซือมูฮา มาแรฮ ซารี ตูฮัด บือซัยํ เดะ อาตัซ. นู ซีตัด อีตู โปด_ มาแรฮ ฌางัน ลูมอฮ กูญา ฌูฆา. 7 ตูฮัด บือซัยํ เดะ อาตัซ ตาญา ซีตัด จะ “เกา มาแรฮ ดาตัก เดะ ตือปัจ ดีฮา?” ซีตัด ตีกัฮ กะ ตูฮัด จะ “กู ปี มาแรฮ เดะ ดือนียา_ บือฌาลัด บักซัจ ปี มาแรฮ_ เดะ ตือปัจ อีตู เลอ.” 8 ตูฮัด มือเลา ปูลัก จะ “เกา บือฮีมัจ ลีฮัจ โยบ_ ปราโซฮ นะ กู_ เฆอ เตด? จะ_ เดะ ดาลับ ดือนียา ฮอย ซาปา ซือรูปา บือกะ ญา_ ฌาดี ซือมียา บาฌิ ตือปัจ_ ตูเฮะ กะ ตูฮัด_ อาเลฮ บูวัก เดะ ลาฆู ฌาฮัจ เลอ.” 9 กะฆีเตอ ซีตัด ญา ตีกัฮ กะ ตูฮัด จะ “โยบ ตูเฮะ กะ ตูฮัด เปาเปลา เฆอ? 10 ตูฮัด บือเลฮ กือตัก ปาฆัยํ กือลีลิก ญาวา นะ ญา_ ฌางัน โกะ ซือมียา เดะ รูมัฮ นะ ญา_ ฌางัน โกะ ซือบารัก ซือมูฮา นู ญา_ อาดา ราตา บือลัฮ_ บูกัด เฆอ? ตูฮัด บรี ซือลามัจ กะ ลาฆู บือกรือฌา นะ ญา_ โกะ บือนาตัก นู ญา ปือบือลา โปด_ บือตามัฮ บาญะ ซือรูโลยํ เดะ นังฆรี. 11 ตาปี มีตา อาเงา ตางัน_ ปือเตาะ โกะ ซือบารัก ซือมูฮา นู ญา อาดา_ ญา เตอ_ นะ ซูปัฮ กะ ตูฮัด_ โซะ ฮือลด มูคา เลอ.” 12 ตูฮัด บือซัยํ เดะ อาตัซ มือเลา ฌางัน ซีตัด จะ “ลีฮัจ เลอ_ โกะ ซือบารัก นะ ญา ซือมูฮา โปด_ อาดา ดูโดะ เดะ บาวัฮ ลาฆู ฮูโกบ นะ เกา_ อาซัน ฌางัน อาเงา ตางัน ปือเตาะ อีซี ญาวา นะ ญา เลอ.” กะฆีเตอ_ ซีตัด ญา ตรือเบะ ปี_ เดะ ฮือลด มูคา นะ ตูฮัด บือซัยํ เดะ อาตัซ. โกะ ซือบารัก ฌางัน โกะ นานะ นะ โยบ ซือมูฮา ลือแงะ ดัฮ 13 อาดา ซืออารี_ กาลา โกะ นานะ กีลากี ฌางัน นานะ นีบีนี นะ ญา_ ตืองัฮ ดูโดะ มากัด โอะ อาระ อางุน_ เดะ รูมัฮ นะ กากา กีลากี ซูโลก นะ กูญา เตอ_ 14 อาดา ซือมียา บาวา บรีตา_ มาแรฮ ซารี โยบ_ มือญาเระ จะ_ “ลือมู ตืองัฮ ฆาลา บือนัก_ กาวัด กูดา บาซา ดือมิ ตืองัฮ มากัด รูโปจ โซะ บีดิก บือนัก_ 15 กะฆีเตอ โกะ ลูมอฮ เซบา_ กูญา มาแรฮ ราปัซ อาเมด บือปี ฮาบิฮ_ บูนอฮ โกะ ปราโซฮ ฌางัน ปือดัก. กู ซืออูรัก_ นู ลารี ลือปัซ_ มาแรฮ มือญาเระ กะ เกา.” 16 กาลา ญา ตืองัฮ มือเลา เตอ_ อาดา ซือมียา ซืออูรัก มาแรฮ มือญาเระ จะ “อาปี นะ ตูฮัด ฆูโฆยํ มาแรฮ ดาตัก เดะ ลาแงะ_ ฮางอซ กาวัด กาเมก_ ซือกาลี ฌางัน โกะ ปราโซฮ_ ตูนู กูญา ฮาบิฮ ดัฮ. อาดา กู ซืออูรัก_ นู ลารี ลือปัซ_ มาแรฮ มือญาเระ กะ เกา.” 17 กาลา ญา ตืองัฮ มือเลา เตอ_ อาดา ซือมียา ซืออูรัก มาแรฮ มือญาเระ จะ “ลูมอฮ คันเดีย_ ซียะ ฌาดี ตีฆา กาวัด_ ซามุน อาเมด อูตัย บือปี_ บูนอฮ โกะ ปราโซฮ ฌางัน ปือดัก. กู ซืออูรัก นู ลารี ลือปัซ_ มาแรฮ มือญาเระ กะ เกา.” 18 กาลา ญา ตืองัฮ มือเลา เตอ_ อาดา ซือมียา ซืออูรัก_ มาแรฮ มือญาเระ จะ “โกะ นานะ กีลากี นานะ นีบีนี นะ เกา_ ตืองัฮ มากัด โอะ อาระ อางุน_ เดะ รูมัฮ นะ กากา ซูโลก นะ กูญา. 19 ลีฮัจ เลอ_ อาดา รีโบจ บือซัยํ_ ลากัฮ ตือปัจ ตานัฮ ตูโฮยํ นู ลือฆา มาแรฮ_ ตาแปะ รูมัฮ_ ปัจ บือดาฮะ. รูมัฮ อีตู โปด_ รูโตฮ ตือกัด อูรัก มูดา ฌางัน โกะ ราดารา. กูญา โปด มาตี. กู ซืออูรัก_ นู ลารี ลือปัซ_ บือเลฮ มาแรฮ มือญาเระ กะ เกา.” 20 กะฆีเตอ โยบ โปด_ บีกัซ_ จูลัด บาฌู ซรือโกะ นะ ญา_ กูโกยํ ปาลา_ ตือมะ มูคา รอจ กะ ตานัฮ_ 21 มือเลา จะ “กู มาแรฮ ซา ญาวา_ ดาตัก เดะ โปรจ นะ มะ เดะ กู. กู นะ บาลิ ปี_ ซา ญาวา เลอ. นู ตูฮัด บือซัยํ เดะ อาตัซ บรี กะ กู_ ตูฮัด ญา นะ อาเมด บือปี ปาเระ ดัฮ. ซือลามัจ เลอ เดะ ปือนามา นะ ตูฮัด เลอ.” 22 เดะ ลาฆู อีนี ซือมูฮา_ โยบ เตด บือเลฮ บูวัจ ดูซา_ เฆอ จะ_ เตด บือเลฮ มือเลา ตูโดฮ กะ ตูฮัด เลอ. |