ฮาบากุก 1 - ซูรัจ ปือมือเลา นะ ตูฮัด1 ปือมือเลา นู บรัจ_ นู ฮาบากุก ซือมียา ตูโดฮ ปือมือเลา นะ ตูฮัด_ บือเลฮ ลีฮัจ. ฮาบากุก บือซูงุจ 2 โอ ตูฮัด บือซัยํ เดะ อาตัซ_ กู นะ บือซูระ ลาฆู ซูซัฮ ลามา ตารา ดีฮา ตาปี ตูฮัด เตด ดืองัยํ? กู นะ บือซูระ กะ เกา จะ “กูญา บูวัจ โตระๆ_ ตูฮัด เออ” ลามา ตารา ดีฮา ตาปี เกา เตด บือเลฮ ตูโลก? 3 บูวัจ นามา เกา บรี กู ลีฮัจ ลาฆู ฌาฮัจ ฆาโดฮ ตีญุง ลาฆู ซูซัฮ ปายัฮ? ลาฆู ฌาฮานัม_ ลาฆู บูวัจ โตระๆ_ อาดา โซะ ฮือลด มูคา นะ กู ลาฆู บือกาเตาะ กาเตาะ_ ลาฆู บือตือฆัฮ โปด อาดา ฌูฆา. 4 กะฆีเตอ ปือมือเลา ฮูโกบ ญา ลาโญจ ลาฆู กรัจ ฮูโกบ บรี รือมัก โปด เตด บือฆารี ลาลู ซาเบะ จะ ซือมียา ฌาฮัจ กือลีลิก ซือมียา บาฌิ ตือปัจ กะฆีเตอ นู กรัจ ฮูโกบ กือนา ลาฆู_ ญา บือฆารี บือกะ เตด รือมัก. ตูฮัด บือซัยํ เดะ อาตัซ ญา ตีกัฮ 5 กือนา ตีญุง ลีฮัจ โกะ นังฆรี ราตา_ ลีฮัจ บรี บาฌิ กือนา ปือและ ฮาตี_ กือนา ตือกือฌุจ ซาเบะ จะ_ กู ตืองัฮ บือกรือฌา ลาฆู ซา ฌือแนฮ เดะ ฮาดัจ นะ เกา มีเซ นะ มือญาเระ กะ เกา_ เกา โปด เตด ปือจายา. 6 นี เลอ_ กู ตืองัฮ อาโซฮ ฮาตี นะ ลูมอฮ คันเดีย ลูมอฮ นังฆรี นู ฌาฮัจ นู ราปัซ อีตู นู ตรือเบะ บือปรัก ปี ราตา เดะ ดือนียา บีดา ราปัซ อาเมด โกะ รูมัฮ นู บูกัด นะ กูญา. 7 กูญา ฌาดี ซือมียา นู บูวัจ บรี ตาโกจ ฌู ญาวา กือตัยํ นู นะ กรัจ ฮูโกบ บรี รือมัก_ นู นะ อาดา มูคา นู บาฌิ_ นู บือซรี ตรือเบะ มาแรฮ เดะ ลูมอฮ กูญา ตะอาซิก. 8 โกะ กูดา นะ กูญา เตอ_ จือปัจ ลือเบฮ เดะ บรูตัด บีตัก ฌาฮัจ ลือเบฮ เดะ อาซู ฮูตัด วะตู ปะฮือญา ตาฮัน กูดา นะ กูญา บรานี มาโซะ ปี ซือรูโลยํ เออ ตาฮัน กูดา นะ กูญา มาแรฮ ดาตัก เดะ ตูโปะ นู ฌาโวฮ ตรือบัก มาแรฮ บือกะ บูโรก ราฌา วาลี นู ตรือบัก จาปัย อูปัด 9 กูญา ซือมูฮา ปาคัจ มาแรฮ บีดา บูวัจ โตระๆ มูคา นะ กูญา ตีญุง รือมัก ปี กะ โซะ ฮือลด กูญา บือมุน โกะ ปราโซฮ บาญะ_ บือกะ ตานัฮ ปาตัย. 10 กูญา อาฆัฮ ฆือละ โกะ ราฌา กูญา บือฆือละ กะ โกะ กือปาลา กูญา บือฆือละ กะ โกะ รูมัฮ บือปรัก ซือมูฮา ตามะ ตานัฮ บรี ตีงี_ บีดา นะ ราปัซ อาเมด เลอ. 11 กะฆีเตอ กูญา โปด กีปัซ ลาลู ปี ซือรูปา บือกะ อาเงน ตีโยะ กูญา บูวัจ กือลือเบฮ ฌาดี ซือมียา ซาลัฮ ดัฮ ปือมือฆัฮ นะ กูญา ฌาดี บือกะ ตูฮัด นะ กูญา. ฮาบากุก มือเลา บือซูงุจ_ มาโซะ กะ ดูวา กาลี 12 โอ ตูฮัด บือซัยํ เดะ อาตัซ_ ตูฮัด นะ กู_ ตูฮัด นู จรัฮ บาฌิ นะ กู ตูฮัด อาดา ดูโดะ ตะเดะ กาลา นูตู_ บูกัด เฆอ? กามี นะ เตด มาตี. โอ ตูฮัด บือซัยํ เดะ อาตัซ_ เกา บือเลฮ ตืองะ กูญา บีดา บรี กือนา กรัจ ฮูโกบ โอ ตูฮัด นู ฌาดี บาตู บือลีนง กู บรี ลือปัซ เกา บือเลฮ ตืองะ กูญา บีดา บรี กือนา ฮูโกบ. 13 มาตา นะ เกา จรัฮ บาฌิ_ เตด บือฆูนา นะ ตีญุง ลาฆู ฌาฮัจ นะ ตีญุง ลาฆู ซาลัฮ โปด เตด บือเลฮ บูวัจ นามา เกา ตีญุง ซือมียา บูวัจ กือบลากัก ญา ซืองะ กาลา ซือมียา ฌาฮัจ ตือลัด ซือมียา นู บาฌิ ตือปัจ ลือเบฮ เดะ ญาวา กูญา? 14 เกา บูวัจ บรี อูมัจ ซือมียา ฌาดี บือกะ อีกัด เดะ ลาโวจ ฌาดี บือกะ โกะ บือนาตัก มือรากะ นู ฮอย กือปาลา. 15 ลูมอฮ คันเดีย รีฆะ ซือมียา ซือมูฮา ฌางัน มาตา มืองาเญน กูญา อีเระ ซือมียา มาแรฮ ฌางัน ฌาลา กูญา บือมุน ซือมียา มาแรฮ ฌางัน ปูกัจ นะ กูญา กะฆีเตอ กูญา มือลูปัจ ซูกา ฮาตี. 16 ซาเบะ กะฆีเตอ กูญา บูนอฮ บือนาตัก มือญือมัฮ กะ ฌาลา นะ กูญา ตูนู โกะ ซือบารัก บือบาวู กะ ปูกัจ นะ กูญา กรานา จะ_ ฮาระ กะ ซือบารัก อีนี_ กูญา ดูโดะ บือกะ ซือมียา กายา โกะ ซือบารัก มากัด นะ กูญา โปด บาญะ. 17 กะฆีเตอ กูญา นะ ปรือลอจ โกะ ซือบารัก นู ลือกัจ เดะ ฌาลา นะ กูญา ตรือเบะ ฮาบิฮ บูนอฮ ลูมอฮ บักซา_ ฮอย เตด ตือจีฮัด_ ปี ซือรูโลยํ เฆอ? |