เอเซเคียน 1 - ซูรัจ ปือมือเลา นะ ตูฮัด

เอเซเคียน มีปี ลีฮัจ ลาฆู บือซรี บือซายา นะ ตูฮัด

¹ เดะ อารี ลีมา_ บูลัด นู ปัจ_ ตาโฮด นู ตีฆา ปูโลฮ (30)_ กาลา นู กู อาดา ดูโดะ ซามา ตืองัฮ ลูมอฮ ปราโซฮ_ เดะ บีดิก ซูงัย เคบาระ_ ลาแงะ โปด บูกา_ กู ลีฮัจ ลาฆู มีปี ดาตัก เดะ ตูฮัด.

² กาลา อารี ลีมา_ บูลัด อีตู_ (ฌาดี จะ_ เดะ ตาโฮด นู ลีมา_ นู ราฌา เยโฮยาคีน ฆาโดฮ ฌาดี ปราโซฮ)

³ ปือมือเลา นะ ตูฮัด บือซัยํ เดะ อาตัซ_ มาแรฮ กะ เอเซเคียน_ นู ฌาดี ซามี_ ฌาดี นานะ นะ บูซี_ เดะ นังฆรี นะ ลูมอฮ คันเดีย_ บีดิก ซูงัย เคบาระ. เดะ ตือปัจ อีตู_ ตางัน นะ ตูฮัด บือซัยํ เดะ อาตัซ_ มาแรฮ ดูโดะ เดะ อาตัซ ญา.

⁴ กาลา กู ตีญุง ลีฮัจ_ นี เลอ_ อาเงน รีโบจ โปด_ ตีโยะ มาแรฮ ดาตัก เดะ โซะ ตารา_ อาดา กือมูวัง กือโตน บือซัยํ_ นู อาดา ลาฆู จรัฮ กือลีลิก_ อาดา อาปี บลือกัจ_ ตรือเบะ มาแรฮ ซือรูโลยํ. ซามา ตืองัฮ อาปี อีตู_ ลีฮัจ บือกะ มัซ ซือวะซา นู บือตือแล.

⁵ เดะ ซามา ตืองัฮ อาปี อีตู_ อาดา ญาวา บือกะ บือนาตัก ปัจ อีโกยํ. ญาวา นะ บือนาตัก อีตู ฌาดี กะฆีนี_ ฌาดี จะ_ ฌาดี บือกะ ซือรูปา กะ ซือมียา.

⁶ ตาปี บือนาตัก ราตา อีโกยํ_ อาดา มูคา ปัจ มูคา_ อาดา ซายะ ปัจ ซายะ_ ราตา อีโกยํ.

⁷ โซะ กากี อีตู_ ญา รือมัก. ตาปะ กากี โปด_ ซือรูปา กากี อานะ ลือมู_ บือซายา บือกะ มัซ ซือวะซา กือนา ฆีแญฮ.

⁸ เดะ บาวัฮ ซายะ_ บีดิก ญาวา นะ ญา ปัจ บือลัฮ_ อาดา บือกะ ตางัน ซือมียา. บือนาตัก ปัจ อีโกยํ_ อาดา มูคา บาญะ_ ซายะ บาญะ_ กะฆีนี

⁹ ฌาดี จะ_ ฮูโฌก ซายะ นะ ญา_ ซิกมาซิก บือจือเตาะ ฮูโฌก ซายะ นะ กาวัด. ญา ตรือบัก รือมัก_ ปี กะ โซะ ฮือลด. วะตู ญา ปี โปด_ เตด อาเลฮ มาแรฮ ลาลู เลอ.

¹⁰ โซะ มูคา นะ ญา เตอ_ บือนาตัก ปัจ อีโกยํ_ อาดา มูคา ซือมียา_ อาดา มูคา ซีงา โซะ กานัน_ อาดา มูคา ลือมู โซะ กีรี_ อาดา มูคา บูโรก ราฌา วาลี_ โซะ บลากัก.

¹¹ มูคา นะ ญา ฌาดี กะฆีเตอ เลอ. โกะ ซายะ นะ ญา_ ดือดี กะ อาตัซ บือนาตัก. ซาๆ อีโกยํ_ อาดา ดูวา ซายะ นู บือจือเตาะ ซายะ นะ กาวัด_ อาดา ดูวา ซายะ_ นู ซาโปจ ญาวา นะ ญา ตะอาซิก.

¹² บือนาตัก ราตา อีโกยํ_ ตรือบัก ปี กะ โซะ ฮือลด_ เตด จะ_ ซือมืองัจ นะ ปี กะ โซะ ดีฮา_ ญา โปด_ ปี ฌาลัด อีตู. กาลา ญา ปี_ นะ เตด อาเลฮ มาแรฮ เลอ.

¹³ กาวัด บือนาตัก อีตู_ ลีฮัจ บือกะ ซือรูปา ฮารัก บลือกัจ_ ซือรูปา บือกะ อาดา ดามัยํ_ บาญะ บาตัก_ อูบัฮ ปี มาแรฮ_ เดะ ซามา ตืองัฮ กาวัด บือนาตัก. อาปี อีตู_ บลือกัจ ฌรือแนฮ_ อาดา ซายา กีลัจ ตรือเบะ มาแรฮ_ ดาตัก เดะ อาปี อีตู.

¹⁴ โกะ บือนาตัก อีตู_ มือลูปัจ ปี มาแรฮ_ บือกะ กีลัจ และๆ.

¹⁵ กาลา กู ตีญุง ลีฮัจ กาวัด บือนาตัก อีตู_ ลีฮัจ เลอ_ อาดา แระฆีแระ ดูโดะ เดะ ตานัฮ_ บีดิก บือนาตัก อีตู_ ซา อีโกยํ_ ซา แระฆีแระ_ ซือมูฮา ปัจ อีโกยํ.

¹⁶ โซะ รูปา ฌางัน ซือบารัก นู บูวัจ แระฆีแระ อีตู_ บือตือแล บือกะ บาตู อีตัด บือดาบู. แระฆีแระ นู ปัจ โปด_ อาดา รูปา ซือรูปา บือกะ อาดา แระฆีแระ ซูโซด เดะ ตืองัฮ แระฆีแระ.

¹⁷ กาลา นะ อูบัฮ ปี โปด_ ปี ซือบือลัฮ เดะ ดาลับ ปัจ บือลัฮ นะ ญา บือเลฮ. กาลา ปี ดัฮ_ ญา เตด อาเลฮ ลาลู เลอ.

¹⁸ บือซี ซรือโกะ แระฆีแระ อีตู_ ตีงี บราซา ตาโกจ_ ซาเบะ บือซี ซรือโกะ แระฆีแระ ปัจ บือลัฮ อีตู_ ปือนอฮ โกะ บีฌี มาตา กือลีลิก.

¹⁹ กาลา บือนาตัก อีตู ปี_ แระฆีแระ อีตู โปด_ ตูโรจ ปี เดะ รูโซะ ฌูฆา. กาลา บือนาตัก มือลายัก ญาแญะ ดาตัก เดะ ตานัฮ_ แระฆีแระ อีตู โปด_ มือลายัก ญาแญะ ปี ฌูฆา.

²⁰ กาลา ซือมืองัจ นะ ปี กะ ดีฮา_ บือนาตัก อีตู โปด_ ปี ฌูฆา. แระฆีแระ อีตู_ มือลายัก ตูโรจ ปี ปิกดาปิก ฌูฆา_ ซาเบะ จะ_ ซือมืองัจ นะ บือนาตัก อาดา เดะ แระฆีแระ อีตู.

²¹ กาลา บือนาตัก ปี_ แระฆีแระ อีตู โปด ปี ฌูฆา. กาลา บือนาตัก บราดู_ แระฆีแระ อีตู โปด บราดู. กาลา บือนาตัก มือลายัก ญาแญะ ดาตัก เดะ ตือปัจ ตานัฮ_ แระฆีแระ โปด_ มือลายัก ตูโรจ ปี ฌูฆา_ ซาเบะ ซือมืองัจ นะ บือนาตัก อีตู_ อาดา เดะ แระฆีแระ.

²² โซะ อาตัซ ปาลา นะ กาวัด บือนาตัก อีตู_ อาดา บีดัก_ ซือรูปา บือกะ ลาแงะ_ บือตือแล ซือรูปา กาจา_ อาปัยํ เดะ อาตัซ ปาลา นะ บือนาตัก อีตู.

²³ เดะ บาวัฮ ลาแงะ อีนี_ ซายะ นะ โกะ บือนาตัก_ ดือดี ตรือเบะ รือมัก ปี_ บือจือเตาะ กาวัด. บือนาตัก ราตา อีโกยํ_ อาดา ซายะ ดูวา บือลัฮ_ ซรือโกะ ญาวา ตะอาซิก.

²⁴ กาลา กาวัด บือนาตัก อีนี ตรือบัก ปี_ กู ดืองัยํ ซือวารา นะ ซายะ_ ซือรูปา ซือวารา นะ อาเย บือดรัซ บาญะ_ บือกะ ซือวารา นะ ตูฮัด นู มือฆัฮ_ ซือวารา กือลาจุ_ ซือรูปา ซือวารา กาวัด ตาฮัน นู ตือฆัยํ อูรัจ. กาลา โกะ บือนาตัก อีตู บราดู ซืองะ_ ซายะ โปด_ นะ กาปุซ เลอ.

²⁵ อาดา ซือวารา มาแรฮ_ ดาตัก เดะ อาตัซ ลาแงะ อีตู_ นู เดะ อาตัซ ปาลา นะ ญา. กาลา บือนาตัก อีตู บราดู ซืองะ ดัฮ_ ซายะ นะ ญา โปด_ กาปุซ ดัฮ.

²⁶ โซะ อาตัซ ลาแงะ_ นู อาดา เดะ อาตัซ ปาลา นะ กาวัด บือนาตัก อีตู_ อาดา บือกะ ซือรูปา ตือปัจ ดูโดะ_ นู ลีฮัจ บือกะ บาตู อีตัด ซี ฮีเฌา. เดะ อาตัซ ซือบารัก นู ลีฮัจ บือกะ ตือปัจ ดูโดะ อีตู_ อาดา ซือรูปา บือกะ อูมัจ ซือมียา.

²⁷ ตะเดะ นู ลีฮัจ บือกะ ปีงัก นะ ญา_ ปี กะ อาตัซ_ กู ลีฮัจ บือกะ มัซ ซือวะซา นู บือตือแล_ ซือรูปา อาปี นู ลีนง ซรือโกะ ฮาบิฮ. ตะเดะ นู ซือรูปา ปีงัก_ ตูโรด มาแรฮ_ กู ลีฮัจ ซือรูปา กะ อาปี_ อาดา ลาฆู จรัฮ บือซรี_ กือลีลิก ซือมียา อีตู.

²⁸ ลาฆู จรัฮ นู บือซรี_ นู อาดา กือลีลิก อีตู_ ซือรูปา ฌางัน ลายัยํ ฮาตู_ นู บือฆารี เดะ กือมูวัง_ กาลา อาดา ฮูฌัด. นู ซือรูปา บือซรี บือซายา นะ ตูฮัด บือซัยํ เดะ อาตัซ_ ญา ลีฮัจ ซือรูปา บือกะฆีนี เลอ. กาลา กู ลีฮัจ ดัฮ_ กู โปด_ ตือมะ มูคา รอจ กะ ตานัฮ. กู ดืองัยํ ซือวารา ซือมียา ซืออูรัก ตืองัฮ มือเลา.