1 โยฮัน 1 - ซูรัจ ปือมือเลา นะ ตูฮัดปือมือเลา นู บรี ฮีโดะ 1 อาดา ลาฆู ปาซัน ปือมือเลา นะ ตูฮัด นู บรี ฮีโดะ_ จะ_ ปือมือเลา อีตู นู อาดา ตะเดะ ดูลู นูตู เตอ. นู บลาโลก จะ_ ปือมือเลา นะ ตูฮัด อีตู_ กามี บือเลฮ ดืองัยํ ดัฮ_ กามี ลีฮัจ บือฆารี ฌางัน มาตา ดัฮ_ กามี ตีญุง ลีฮัจ ดัฮ_ กามี ปือเตาะ ฌางัน ตางัน นะ กามี ดัฮ. 2 ซือมียา นู บรี ฮีโดะ อีตู_ ญา มาแรฮ ปลีฮัจ ดัฮ. กามี โปด_ บือเลฮ ลีฮัจ บือฆารี ญา กะฆีเตอ กามี ฌาดี ซะซรี นู นะ มือญาเระ_ ปาซัน ลาฆู นู นะ ฮีโดะ ซูโงฮ ซือลาลู เตอ_ บรี กะ กาเญา ตาฮู. ซือมียา นู บรี ฮีโดะ อีตู_ ญา อาดา ฌางัน อาโปก เดะ อาตัซ เลอ_ ตาปี ญา บือเลฮ มาแรฮ ปลีฮัจ กะ กามี ดัฮ. 3 กามี บือเลฮ บือมุน บรามัย บือซามา_ ฌางัน อาโปก เดะ อาตัซ_ ฌางัน เยซู คริด นานะ นะ ญา เตอ. กะฆีเตอ กามี มือญาเระ กะ กาเญา_ จะ_ ลาฆู นู กามี บือเลฮ ลีฮัจ บือฆารี_ บือเลฮ ดืองัยํ ดัฮ_ บีดา บรี กาเญา นะ บือเลฮ บือมุน บรามัย บือซามา ฌางัน กามี. 4 ลาฆู อีนี_ กามี ฆาแรฮ บรี กะ กาเญา_ นะ บรี กีตา ซือมูฮา ซูกา ฮาตี_ ปือนอฮ มีแม เลอ. โซะ จรัฮ_ โซะ กือลับ 5 นี เลอ_ ฌาดี ลาฆู นู กามี บือเลฮ ดืองัยํ ดาตัก มาแรฮ เดะ ตูฮัด ดัฮ_ นู นะ มือญาเระ กะ กาเญา_ จะ_ ตูฮัด เตอ เลอ_ ญา ฌาดี นู จรัฮ เลอ. ฮอย ลาฆู นู กือลับ เดะ ตูฮัด เลอ. 6 ดัฮ กีตา มือเลา จะ_ “กีตา เลอ_ บือมุน บรามัย ฌางัน ตูฮัด”_ ตาปี กีตา ตูโรจ กะ ลาฆู นู โซะ กือลับ_ กะฆีเตอ กีตา มือเลา มืออูปัย_ กีตา เตด ตูโรจ กะ ลาฆู นู ซูโงฮ. 7 ตาปี ดัฮ กีตา บูวัจ ตูโรจ_ กะ ลาฆู โซะ จรัฮ เตอ_ บือกะ ซือรูปา นู ตูฮัด_ ญา อาดา โซะ จรัฮ_ กะฆีเตอ กีตา บือมุน บรามัย บือซามา-ซามา. กะฆีเตอ ปูลัก_ ดารัฮ นะ เยซู นานะ นะ ตูฮัด เดะ อาตัซ_ ญา บาโซฮ กีตา_ บรี ลือปัซ เดะ ดูซา ซือมูฮา เลอ. 8 ดัฮ กีตา มือเลา จะ_ “ฮอย ดูซา ดัฮ”_ กะฆีเตอ กีตา ฌาดี ซือมียา ตีปู กะ ญาวา ตะอาซิก_ ฮอย ลาฆู นู ซูโงฮ_ เดะ ฮาตี นะ กีตา เลอ. 9 ดัฮ กีตา ซาโงะ ฌางัน ตูฮัด_ จะ_ กีตา ดูซา ดัฮ_ กะฆีเตอ ตูฮัด ญา ฮาตี รือมัก_ ญา บาฌิ ตือปัจ_ ญา ยอม อาเกะ ดูซา นะ กีตา. ญา ยอม บาโซฮ กีตา บรี ลือปัซ_ เดะ ลาฆู นู เตด บือฆูนา ซือมูฮา เลอ. 10 ดัฮ กีตา มือเลา จะ_ “กู เตด บือเลฮ บูวัจ ดูซา ดัฮ”_ ญา เตอ_ ซือรูปา บือกะ กีตา มือเลา จะ_ “ตูฮัด มือเลา มืออูปัย”. กะฆีเตอ ปือมือเลา นะ ตูฮัด ฮอย เตด ดูโดะ_ เดะ ฮาตี นะ กีตา เลอ. |