Титлы 3 - Библия удмурт кылын

3-тӥ ЛЮКЕТ

¹ Соослэн тодазы вайытылы: кузёослы, кивалтӥсьёслы тэрытскыса мед улозы, котькыӵе ӟеч ужез быдэстыны соос дасесь мед луозы;

² нокинэ но урод кылын медаз куаретэ, керӟегъяськыса-копаськыса медаз улэ, зӥбыт-востэм, вань адямиосын тупаса мед улозы.

³ Уго куке но асьмеос но укылтэмъяськыса, тэрытскытэк, сьӧлыкъёс пӧлы йыромыса улӥмы, лулмугормылэн куронъёсызлэн, пӧртэм эзылыса-майбыр улонлэн ляльчиосыз вал; лекъяськыса, вожъяськыса улӥмы; номырлы ярантэм уродэсь вал, огмес огмы адӟемпотостэм карыса улӥмы.

⁴ Нош куке Инмарлэн, асьмелэн Утисьмылэн, гажан-жалянэз, Солэн адямиез яратонэз асьме доры вуиз,

⁵ Со асьмеды лэсьтэм ӟеч ужъёсмыя ӧз утьы, Со асьмеды Аслаз гажан-жалянэныз утиз, выль вордсконлэн пылатонэныз, Святой Духен выльдӥськон пыр.

⁶ Асьмелэн Утисьмы Иисус Христос пыр Со асьме вылэ Святой Духсэ пачыл кисьтӥз.

⁷ Асьмеос, Солэн гажан-жалянэз пыр шонере потыса, оскиськонмы вань бере, пумтэм вапуме улонлэн люкет басьтӥсьёсыз мед луысалмы шуыса.

⁸ Та шонер верам кыл. Мон тыныд мылкыд карисько та понна юн сылыны, соку Инмарлы оскыны кутскемъёс ӟеч ужъёс лэсьтыны тыршисесь луозы, нош тазьы улон вань адямиос понна ӟечлыко, пайдаё луэ.

⁹ Нош укылтэм кыл тэкшеронъёслэсь, ӵыжы-выжыослэн кытысь но ку потэмзы сярысь гожъянъёслэсь, ченгешонъёслэсь но закон пумысен ваче вуылонъёслэсь палэнскылы. Соос уго нокыӵе но пайда уг ваё, юнме дыр быдтон гинэ со ваньмыз.

¹⁰ Осконмес тугась-пожасез одӥг пол, собере эшшо огпол визьмаса утча, нош собере солэсь палэнскы.

¹¹ Тод, таӵе мурт сӧриськемын, сьӧлыкъёс пӧлы выемын, со ассэ ачиз суд улэ сётэ шуыса.

¹² Тон доры Артемез яке Тихикез ыстӥ ке, мон доры Никополе ӝоггес лыктыны тыршы; мон отын толме потыны малпай.

¹³ Закон тодӥсь Зӥнаез но Аполлосэз сюрес вылэ потыны ӟеч-ӟеч дася: номырлы но соос ёрмоно-ӟудоно медаз луэ.

¹⁴ Асьмелэнъёс но ӟеч ужъёс лэсьтыса улыны мед дышетскозы, ёрмыса улӥсьёслы мед юрттӥськозы, емыш вайисьтэм улонэн медаз улэ.

¹⁵ Ваньзы али монэн ӵош улӥсьёс тыныд салам верало. Осконэн, милемыз гажаса улӥсь эшъёсмылы ваньзылы салам вера. Ваньды бордын Инмарлэн дэлетэз мед улоз. Аминь.