Судьяос 1 - Библия удмурт кылын

1-тӥ ЛЮКЕТ

¹ Иисус кулэм бере израиль пиос Кузё-Инмарлэсь юаса шуизы: «Ми пӧлысь кин нырысь ик мыноз хананейёс вылэ – соосын ожмаськыны?»

² Кузё-Инмар шуиз: «Иуда мыноз, тани, Мон музъемез со киулэ сётӥсько».

³ Нош Иуда аслаз Симеон братэзлы шуиз: «Люкет басьтонам пыриськы: хананейёсын ожмаськыны кутском; мон но тынад люкет басьтонад пырисько». Симеон соин ӵош мынӥз.

⁴ Иуда ожмаськыны мынӥз; хананейёсты, ферезейёсты Кузё-Инмар соос киулэ сётӥз; соос пӧлысь дас сюрссэ соос Везеке погыртӥзы.

⁵ Везекысен соос Адони-Везекен ваче пумиськизы, ожмаськыны кутскизы, хананейёсты, ферезейёсты соос вормизы.

⁶ Адони-Везек бызьыса кошкиз, нош таос со сьӧры уйиськыса мынӥзы но кутӥзы сое, киысьтыз пӧлызэ, пыдысьтыз бадӟым чиньызэ ӵогыса куштӥзы.

⁷ Соку Адони-Везек шуиз: «Киысьтызы пӧлызы, пыдысьтызы бадӟым чиньызы ӵогем сизьымдон эксэйёс ӝӧк улысьтым нянь пыры бичаса улӥзы; кызьы мон лэсьтӥ, озьы ик мыным но Инмар пунэмзэ берыктӥз». Сое Иерусалиме вайизы, отысен со кулӥз.

⁸ Иуда пиос Иерусалимлы пумит ожмаськизы, сое киултӥзы, мечен-палашен коразы, городэз тылын сутӥзы.

⁹ Собере Иуда пиос гурезьёсын, лымшорпал музъемын, улыго интыосын улӥсь хананейёсын ожмаськыны мынӥзы.

¹⁰ Собере Иуда Хевронын улӥсь хананейёслы пумит ожмаськыны вырӟиз, – азьвыл Хеврон Кириаф-Арба шуыса нимаське вал, – отысен со погыртӥз Шешаез, Ахиманэз но Фалмаез [Енак выжыысь].

¹¹ Отысен со Давирын улӥсьёс вылэ ожмаськыны мынӥз; Давирез азьвыл Кириаф-Сефер шуыса нимало вал.

¹² Халев шуиз: «Кин Кириаф-Сеферез киултыны быгатӥз ке, солы Ахса нылме кышнолы сёто».

¹³ Сое Гофониил, Халевлэн Кеназ вынызлэн пиез, киултӥз, соку Халев Ахса нылзэ Гофонииллы сётӥз.

¹⁴ Картэз сьӧры кошкон азяз Гофониил Ахсаез атаезлэсь аслыз бусы люкет курыны ӝутказ. Ахса ишак вылысьтыз васькиз. Соку Халев солэсь юаз: «Мар тыныд кулэ?»

¹⁵ Ахса солы шуиз: «Бакель кар монэ: тон мыным лымшорпал музъемез сётӥд, вай мыным ву сётӥсь ошмесъёстэ но». [Солэсь мылкыдзэ-куронзэ тодыса], Халев Ахса нылызлы вылӥысьсэ но, улӥысьсэ но ошмесъёсты сётӥз.

¹⁶ Кеней [Иофорлэн], Моисейлэн варматаезлэн, пиосыз Пальмаё карысь Иуда нылпиосын ӵош Арадлэн лымшор палаз интыяськем Иудей кыре кошкизы: татчы вуыса, израиль калык пӧлы улыны интыяськизы.

¹⁷ Иуда Симеон братэныз ӵош мынӥз но Цефафын улӥсь хананейёсты погыртӥзы, соослэсь городзэс каргаса куашкатӥзы, соин ик со «Хорма» шуыса нимаське.

¹⁸ Иуда Газаез но со котырысь музъемез, Аскалонэз но со котырысь музъемез, Екронэз но со котырысь музъемез [Азотэз но со котырысь музъемез] аслыз кариз.

¹⁹ Кузё-Инмар Иуда палан вал, соин ик со гурезез аслыз кариз; нош нёжалын улӥсьёсты улляны ӧз быгаты, малы ке шуоно соослэн ожмаськыны корт уробооссы вал.

²⁰ Халевлы Хевронэз сётӥзы, кызьы шуэ вал Моисей, [отын аслыз люкетлы со Енак пиослэсь куинь городзэс басьтӥз] но отысь Енаклэсь куинь пиоссэ улляз.

²¹ Иерусалимын азьвыл улэм иевусейёсты Вениамин пиос ӧз уллялэ; Вениамин пиосын ӵош иевусейёс туннэ нуналозь но Иерусалимын уло на.

²² Иосифлэн пиосыз но Вефильлы пумит мынӥзы, Кузё-Инмар соос палан вал.

²³ [Дугдыса] Иосиф пиос Вефиль каре (азьвыл со Луз шуыса нимаське вал) эскерись-чаклась муртъёсты ыстӥзы.

²⁴ Возьмаськисьёс городысь лыктӥсь адямиез адӟизы, [сое киулазы басьтӥзы] но солы шуизы: «Возьматы милемлы городэ пыронэз, соку ми тонэ вӧсь ум каре».

²⁵ Со соослы городэ пыронэз возьматӥз, соос городын улӥсьёсты меч улэ погыртӥзы, нош та адямиез, солэсь вань ӵыжы-выжыоссэ лэзизы.

²⁶ Та адями хеттейёслэн музъемазы мынӥз но город пуктӥз, солы Луз ним сётӥз. Та ним туннэ нуналозь улэ.

²⁷ Манассия Беф-Санын, [мукет нимыз Скифополь], улӥсьёсты ӧз улля, со котырысь гуртъёсын улӥсьёсты но, Фаанахын но со котырысь гуртъёсын улӥсьёсты, Дорын но со котырысь гуртъёсын улӥсьёсты, Ивлеамын но со котырысь гуртъёсын улӥсьёсты, Мегиддонын но со котырысь гуртъёсын улӥсьёсты ӧз улля; хананейёс та музъеме улыны кылизы.

²⁸ Израильлэн кужымез юнмам бере со хананей калыкез аслыз выт тырись кариз, нош улляны ӧз улля.

²⁹ Ефрем выжы но Газерын улӥсь хананейёсты улляса ӧз лэзьы; соос пӧлын, Газерын, улӥзы хананейёс, [солы выт тыризы].

³⁰ Завулон но Китронын, Наглолын улӥсьёсты ӧз улля, хананей калык соос пӧлын улӥз но соослы выт тыриз.

³¹ Асир но Аккоын улӥсьёсты ӧз улля, [соос солы выт тыризы, Дорын улӥсьёсты но], Сӥдонын, Ахлавын, Ахзивын, Хелваын, Афекын, Реховын улӥсьёсты но ӧз улля.

³² Асир выжы улӥз та музъемын улӥсь хананейёс пӧлын, уго соосты улляны ӧз быгаты.

³³ Неффалим но Вефсамисын, Беф-Анафын улӥсьёсты ӧз улля, хананейёс пӧлын – та музъемын улӥсь калык пӧлын – улӥз; Вефсамисын, Беф-Анафын улӥсьёс солы выт тыризы.

³⁴ Аморрейёс Дан пиосты гурезьёсын ӝикатыса возизы, нёжалэ васькыны ӧз лэзе.

³⁵ Аморрейёс Херес гурезе улыны кылизы, [кытын уло гондыръёс, ӟичыос], Аиалонэ, Шаалвиме; но Иосиф пиослэн кизы вормиз [аморрейёсты], соос выт тырыса улӥсь калык луизы.

³⁶ Аморрейёслэн улон интызы Акравим вырйылысен Селаозь, эшшо кыдёкегес но кыстӥськиз.