Руфь 4 - Библия удмурт кылын

4-тӥ ЛЮКЕТ

¹ Вооз кар капка доры потӥз но отчы пуксиз. Тани, вӧзтӥз ортче ӵыжы-выжыез, со сярысь вераз вал Вооз. Со муртлы [Вооз] вазиськиз: «Пыр татчы, пуксьы». Со пыриз но пуксиз.

² Кар тӧроос пӧлысь [Вооз] дас муртэ люказ но соослы шуиз: «Татчы пукселэ». Соос пуксизы.

³ [Вооз] ӵыжы-выжы пиезлы шуиз: «Моав бусыысь берытскем бераз Ноеминь Елимелех агаймылэсь бусы люкетсэ вуза;

⁴ тынад пеляд пырымон вераськоно кариськи: татын пукисьёслэн син азязы, калыкелэн тӧроосызлэн син азязы басьты; басьтэмед ке потэ, басьты, нош уг ке поты басьтэмед, мыным вера, мон соку тодо; уго тон сяна, нокинлы сое басьтыны, нош тон бере – мон». Соиз шуиз: «Мон басьтӥсько».

⁵ Вооз шуиз: «Ноеминьлэсь бусызэ басьтӥд ке, Руфьлэсь но, моав ныллэсь, люкетсэ басьтыны кулэ луод, со (Ноеминьлэн) кулэм пиезлэн кышноез, сое тон кышно басьтыны кулэ кулэм муртлэсь нимзэ ас люкет музъемаз улӟытон понна».

⁶ Ӵыжы-выжы луись пи шуиз: «Аслэсьтым люкет музъемме куашкатонтэм понна сое кышно басьтыны уг быгатӥськы; тон сое ас бордад кут, мон сое ас бордам кутыны уг быгатӥськы».

⁷ Вазен Израильын басьяськыкузы, вошъяськыкузы, ужлэсь ортчемзэ возьматон понна таӵе сям вал: одӥг мурт пыдкутчанзэ кыле но мукетызлы сётэ вал [ӵыжы-выжы луон правозэ уже кутӥсь муртлы], Израильын ужъёсты тазьы юнматылӥзы.

⁸ Ӵыжы-выжы луись пи Воозлы шуиз: «Аслыд басьты». Пыдкутчанзэ кылиз [но Воозлы сётӥз].

⁹ Соку Вооз тӧроослы, вань люкаськем калыклы шуиз: «Табере тӥ адӟисьёс луиськоды, кызьы мон Ноеминьлэсь быдэссэ Елимелех киулэ шедем музъемзэ басьтӥсько, Хилеонлэсьсэ но, Махлонлэсьсэ но басьтӥсько;

¹⁰ Махлонлэсь кышнозэ моав нылэз Руфез аслым кышнолы басьтӥсько, кулэм картэзлэсь нимзэ солэн люкет музъемаз кельтон понна, солэн нимыз агай-вынъёсыз пӧлысь, улон интыезлэн капка дорысьтыз медаз ышы-быры; туннэ тӥ тае адӟисьёс луиськоды».

¹¹ Капка дорын сылӥсь вань калык, тӧроос шуизы: «Ми – адӟисьёс луиськомы; тынад коркад пырись кышномуртэз Кузё-Инмар Рахилен Лияез кадь мед кароз, соос Израиль выжыез юнматӥзы; Ефрафаысь узырлыкед мед потоз, Вифлеемын нимыд дано мед луоз;

¹² тынад выжыед Фамарьлэн Иудалы вордскытэм Фареслэн выжыез кадь мед луоз, Кузё-Инмарлэн ӟечлыкеныз та егит кышномуртлэсь тыныд кужмо выжы мед потоз».

¹³ Вооз Руфез кутӥз, со солы кышно луиз. Вооз со доры пыриз, Кузё-Инмарлэн ӟеченыз со секытэн луиз, пи нуны вайиз.

¹⁴ Кышномуртъёс Ноеминьлы шуизы: «Данлыко Кузё-Инмар, Со тонэ юрт утисьтэк ӧз кельты! Солэн нимыз Израильын дано мед луоз!

¹⁵ Со тынад шумпотон вайисед, пересьмон даурад сюдӥсед луоз, уго со нуныез тонэ яратӥсь кенэд вайиз, сизьым пиослэсь но со тон понна умойгес».

¹⁶ Та нуныез Ноеминь кияз кутӥз но гадь бордаз ӝиптыса нуллӥз, нуны утись луиз.

¹⁷ Бускель кышномуртъёс нунылы ним сётыса шуизы: «Ноеминьлэн пи нуныез вордскиз», солы Овид ним сётӥзы. Со Давидлэн атаезлэн Иессейлэн атаез луэ.

¹⁸ Тани, Фареслэн выжыез: Фареслэсь Есром вордскиз;

¹⁹ Есромлэсь Арам вордскиз; Арамлэсь Аминадав вордскиз;

²⁰ Аминадавлэсь Наассон вордскиз; Наассонлэсь Салмон вордскиз;

²¹ Салмонлэсь Вооз вордскиз; Воозлэсь Овид вордскиз;

²² Овидлэсь Иессей вордскиз; Иессейлэсь Давид вордскиз.