Псалтирь 1 - Библия удмурт кылын

1-тӥ КАФИЗМА 1-тӥ ПСАЛОМ

Давидлэн крезьгурез.

¹ Шудо со мурт, кудӥз сьӧлыклэсь кышкасьтэмъёслэн кенешазы уг ветлы, сьӧлыкоослэн сюрес вылазы уг сылы, сантэмасьёслэн люкаськоназы уг пукы;

² Кузё-Инмарлэн законэз бордын солэн вань мылкыдыз, Солэсь законзэ со уй но, нунал но дышетэ!

³ Кошкись ву дуре мерттэм писпу кадь со, аслэсьтыз емышсэ дырыз дыръя сётэ, солэн куарез но уг шуя; котькыӵе ужын, мар гинэ со уг лэсьты, азинлыкез вань.

⁴ Нош сьӧлыклэсь кышкасьтэмъёс сыӵеесь ӧвӧл: соос – тӧл пельтыса нуэм тузон кадесь.

⁵ Соин ик сьӧлыклэсь кышкасьтэмъёс судын сылыны уз чидалэ, сьӧлыкоос шонер улӥсьёслэн кенешазы улыны уз быгатэ.

⁶ Шонер улӥсьёслэсь сюрессэс Кузё-Инмар тодэ, нош сьӧлыклэсь кышкасьтэмъёслэн сюрессы быроз.