Потон 40 - Библия удмурт кылын

40-тӥ ЛЮКЕТ

¹ Кузё-Инмар Моисейлы шуиз:

² «Нырысетӥ толэзе, толэзьлэн нырысетӥ нуналаз вӧсяськыны вӧсяськон скиния пукты.

³ Отчы сӥзён-косонэн ковчегез пукты, ковчегез катанчиен возъя;

⁴ отчы ӝӧк пырты но солэсь вань тӥрлыкъёссэ со вылэ тыр, югдытон арбериез пырты но со вылэ лампадаоссэ пукты.

⁵ Сӥзён-косонэн ковчег азьын ӵындытыны зарни курбон сётон ӝӧк пукты но [люкаськон] скинияе пырон азе катанчи ош.

⁶ Вӧсяськон скинияе пырон доры тылын сутӥськись курбон сётон ӝӧк пукты;

⁷ вӧсяськон скинияен курбон сётон ӝӧк вискы мисьтӥськон пукты, отчы ву лэзь;

⁸ котыр азбар лэсьты, азбар ӟезьы азе катанчи ош.

⁹ Зырӟыны вӧй басьты но соин скинияез но, мар со пушкын вань, ваньзэ зырӟы, скинияез, вань сосудъёссэ но эшшо отын мар вань, ваньзэ вӧся, соку дун-чылкыт луоз.

¹⁰ Тылын сутӥськись курбон сётон ӝӧкез но, мар со бордын вань, ваньзэ вӧйын зырӟы, курбон сётон ӝӧкез вӧся, соку курбон сётон инты быдӟым святыня шуыса лыдӟиськоз.

¹¹ Зырӟон вӧйын мисьтӥськонэз сылон интыеныз валче зырӟы, вӧся.

¹² Ааронэз но солэсь пиоссэ вӧсяськон скинияе пырон доры вай но соосты вуэн миськы;

¹³ Ааронэз вӧсяськон дӥськутэн дӥся, вӧйын зырӟы, дун-чылкыт кар – со Мынам священнике мед луоз.

¹⁴ Солэсь пиоссэ но вай, дэремъёс вылазы дӥся,

¹⁵ атайзэс кадь ик соосты но вӧйын зырӟы, священник луыса соос но Мыным мед ужалозы-тыршозы; вӧйын зырӟон соосты выжыысь выжые, пумтэм вапумъёс ӵожелы священник кароз».

¹⁶ Моисей лэсьтӥз ваньзэ озьы, кызьы солы Кузё-Инмар лэсьтыны косӥз.

¹⁷ [Египетысь потэм беразы,] кыкетӥ араз, нырысетӥ толэзе, та толэзьлэн нырысетӥ нуналаз скиния пуктэмын вал.

¹⁸ Моисей скинияез пуктӥз, пыдул кутэтъёс пуктӥз, вӧлэм пулъёс тыриз, сюрыос понӥз, юбооссэ пуктӥз,

¹⁹ скинияез вылтӥз шобыртӥз, солэн вылаз эшшо шобрет понӥз на, кызьы Кузё-Инмар Моисейлы косӥз.

²⁰ Кутӥз но сӥзён-косонэз ковчег пушкы понӥз, ковчеглэн кульчоосыз пушкы сюрыос понӥз, ковчеглэн вылӥяз шобрет понӥз;

²¹ ковчегез скиния пушкы пыртӥз, солэн азяз катанчи ошиз, сӥзён-косонэн ковчегез возъяз, кызьы Кузё-Инмар Моисейлы косон сётӥз.

²² Вӧсяськон скиния пушкы, скиниялэн уйпал люкетаз, катанчи сьӧры, ӝӧк пуктӥз,

²³ со вылэ Кузё-Инмар азе няньёс тыриз, кызьы Кузё-Инмар Моисеез лэсьтыны косӥз.

²⁴ Вӧсяськон скинияе ӝӧклы ваче беринэ, скиниялэн лымшорпал люкетаз югдытон арбери пуктӥз.

²⁵ [Солэсь] лампадаоссэ Кузё-Инмар азе пуктылӥз, кызьы Кузё-Инмар Моисеез лэсьтыны косӥз.

²⁶ Вӧсяськон скинияе катанчилэн азьпалаз зарниен шобыртэм курбон сётон ӝӧк пуктӥз но

²⁷ со вылын ческыт зын поттӥсь арбериосты ӵындытӥз, кызьы Кузё-Инмар Моисеез лэсьтыны косӥз.

²⁸ Скинияе пырон доры катанчи ошиз.

²⁹ Скинияе пырон доры тылын сутӥськись курбон сётон ӝӧк пуктӥз, со вылын тылын сутӥськись курбонъёс сётӥз, нянез курбон сётӥз, кызьы Кузё-Инмар Моисеез лэсьтыны косӥз.

³⁰ Вӧсяськон скинияен курбон сётон ӝӧк вискы мисьтӥськон пуктӥз, мисьтӥськыны отчы ву лэзиз,

³¹ Моисей, Аарон но солэн пиосыз мисьтӥськонысь вуэн киоссэс, пыдъёссэс миськизы:

³² вӧсяськон скинияе [служить карыны] пырыкузы, курбон сётон ӝӧк доры лыктылыкузы, мисьтӥськылӥзы, кызьы Кузё-Инмар Моисеез лэсьтыны косӥз.

³³ Скиниялэн но курбон сётон ӝӧклэн котыразы азбар лэсьтӥз, азбарлэн капка йылаз катанчи ошиз. Тазьы Моисей ужзэ йылпумъяз.

³⁴ Вӧсяськон скинияез пилем шобыртӥз но, Кузё-Инмарлэн пиштӥсь данлыкез скиния пушкын пачылаз люкаськиз.

³⁵ Вӧсяськон скинияе Моисей пырыны ӧз быгаты, малы ке шуоно сое пилем шобыртӥз, Кузё-Инмарлэн пиштӥсь данлыкез скиния пушкын пачылаз улӥз.

³⁶ Ялан сюрес вылтӥ ветлон дыръязы скиния вылысь пилем ӝутскыку, израиль пиос сюрессэс азинтӥзы;

³⁷ нош пилем дугдыса одӥг интыяз сылыку, со нош ик вылӥе ӝутскыны кутскытозь, соос дугдыса улӥзы.

³⁸ Уго ялан сюрес вылтӥ ветлон дыръязы Кузё-Инмарлэн пилемез нуназе куазьын скиния йылын сылылӥз, нош уйёсы тыл со пушкын быдэс израиль выжылэн син азяз улӥз.