Потон 4 - Библия удмурт кылын

4-тӥ ЛЮКЕТ

¹ Ответ сётыса, Моисей шуиз: «Соос мыным ӧз оске ке, верам кылме санэ ӧз понэ ке, шуизы ке: ”Кузё-Инмар тыныд ӧз возьматскы”? [мар соослы соку шуоно?]»

² Кузё-Инмар солы шуиз: «Тынад кияд мар со?» Со шуиз: «Пудо возьман боды».

³ Кузё-Инмар шуиз: «Музъем вылэ сое кушты». Сое со музъем вылэ куштӥз но, бодыез кыйлы пӧрмиз, Моисей со дорысь бызьыса кошкиз.

⁴ Соку Моисейлы Кузё-Инмар шуиз: «Кидэ ӝутыса, быжтӥз кут сое». Со кизэ ӝутӥз но сое [быжтӥз] кутӥз; солэн кияз со нош ик боды луиз.

⁵ «Та понна со: [тыныд] мед оскозы, соослэн атайёссылэн Инмарзы, Авраамлэн Инмарез, Исааклэн Инмарез, Иаковлэн Инмарез Кузё-Инмар тыныд возьматскиз шуыса».

⁶ Кузё-Инмар солы шуиз на: «Кидэ пияд пон». Соку со аслэсьтыз кизэ пияз понӥз, [пиысьтыз] кизэ поттӥз но, тани, киыз гижлочерен шобырскиз, лымы кадь тӧдьы луиз.

⁷ [Кузё-Инмар солы] тазьы шуиз [на]: «Кидэ нош ик пияд пон». Кизэ нош ик пияз понӥз, сое пиысьтыз поттӥз, тани, со нош ик аслаз мугорыз кадь луиз.

⁸ «Соос тыныд ӧз ке оске, нырысь паймымон тодметэз санэ ӧз ке басьтэ, оскозы мукетызлы паймымон тодметлы;

⁹ кыкезлы ик та паймымон тодметъёслы ӧз ке оске, тынэсьтыд верам кылдэ санэ ӧз ке понэ, соку шурысь ву омырты но музъем вылэ кисьты; соку шурысь омыртэм ву музъем вылын вирлы пӧрмоз».

¹⁰ Соку Моисей Кузё-Инмарлы шуиз: «Э, Кузё-Инмаре! Мон кыллы усто адями ӧвӧл, толон но, толон валлян но мон сыӵе ик вал, ас ляльчиеныд вераськыны кутскон вакытад но сыӵе ик вал: мон секытэн, могаса вераськисько».

¹¹ Кузё-Инмар [Моисейлы] шуиз: «Адямилы кин ым сётӥз? Кин сое кылтэм, пельтэм каре, адӟись яке адӟисьтэм каре? Мон – [Инмар] Кузё-Инмар озьы уг-а кариськы?

¹² Озьыен, мын, вераськыкуд Мон тонэн огазьын луо, дышето, мар вераны кулэ».

¹³ [Моисей] шуиз: «Кузё-Инмаре! Мукетсэ ысты, кинэ ыстыны быгатӥськод».

¹⁴ Соку Кузё-Инмарлэн Моисей вылэ вожпотонэз ӝуатскиз но Со шуиз: «Ӧвӧл шат тынад Левий выжыысь потэм Аарон агаед? Мон тодӥсько, со [тон интые] вераськыны быгатоз шуыса, но тани, со тынад пумитад потоз но тонэ адӟем бераз солэн сюлмыз шумпотоз;

¹⁵ тон солы вералод, [Мынэсьтым] верам кылъёсме солэн кылыныз-ымыныз вераны солы эрик сётод, нош Мон, тон вераськыку, тынад вӧзад луо, со вераськыку но, солэн вӧзаз луо, тӥледыз дышето, мар лэсьтыны кулэ;

¹⁶ тон интые со калыклы вералоз; озьыен, со тынад кылыд-ымыд луоз, нош тон солы Инмар интыын луод;

¹⁷ [кыйлы пӧрмытэм] бодыез ас кияд басьты: соин тон паймымон ужъёс лэсьтылод».

¹⁸ Моисей Иофор варматаез доры берытскиз но солы со шуиз: «Мон кошко, Египетысь агай-вынъёсы доры берытско, учко, улэпесь на-а соос?» Соку Иофор Моисейлы шуиз: «Каньыллыкен мын». [Трос дыр ортчем бере Египетлэн эксэез кулӥз.]

¹⁹ Мадиан музъемысен Кузё-Инмар Моисейлы шуиз: «Мын, Египетэ берытскы, тынэсьтыд лулдэ утчасьёс ваньзы кулӥзы ни».

²⁰ Моисей кышнозэ, нылпиоссэ бордаз кутӥз но, соосты ишак вылэ пуктылыса, Египет музъеме вырӟиз. Инмарлэсь бодызэ Моисей кияз кутӥз.

²¹ Соку Кузё-Инмар Моисейлы шуиз: «Мынод но Египетэ нош ик вуид ке, учкы, Мынэсьтым сётэм вань паймымон ужъёсме тон фараон азьын возьматы; нош Мон солэсь сюлэмзэ чурыт каро но, со калыкез кошкыны уз лэзьы.

²² Фараонлы тазьы шу: ”Тазьы шуэ Кузё-Инмар [еврейёслэн Инмарзы]: Израиль – со Мынам нырысь вордскем пие;

²³ Мон тыныд верасько: Мынэсьтым пиме кошкыны лэзь, со Мыным ужаса-тыршыса мед улоз, нош ӧд ке лэзьы, соку Мон тынэсьтыд пидэ виё, нырысь вордскем нуныдэ виё”».

²⁴ Сюрес вылысен, изьыны дугдэм интыысенызы, сое Кузё-Инмар пумитаз но виыны турттэ вал.

²⁵ Соку Сепфора из пурт кутӥз но пиезлэсь пиосмурт луон тодметэзлэсь йылзэ вандӥз, соин Моисейлэн пыд бордаз йӧтӥськыса шуиз: «Тон мынам та вир пыр герӟаськем эмеспие луиськод».

²⁶ Кузё-Инмар со дорысь кошкиз. Соку Сепфора шуиз: «Вандӥськон сямез ортчытон пыр тон мынам вир пыр эмеспие луид».

²⁷ Соку Кузё-Инмар Ааронлы шуиз: «Моисейлэн пумитаз луоё кыр дуннее мын». Со мынӥз но сое Инмарлэн гурезь дораз пумитаз, чупаз сое.

²⁸ Сое ыстэм Кузё-Инмарлэсь вань верам кылъёссэ Моисей Ааронлы вераз, Солэн возьматыны косэм вань паймымон тодметъёсыз сярысь вераз.

²⁹ Моисей Ааронэн ӵош мыныса израиль пиослэсь вань тӧрооссэс огазе люказы,

³⁰ Аарон [соослы] вераз Кузё-Инмарлэсь Моисейлы верам вань кылъёссэ; люкаськем калык азьын Моисей паймымон тодметъёс возьматъяз,

³¹ калык солы оскиз; Кузё-Инмар израиль пиос доры вуылӥз, соослэсь курадӟемзэс адӟиз шуыса кылэм беразы соос пыдесъяськыса йыбырттӥзы.