Потон 2 - Библия удмурт кылын

2-тӥ ЛЮКЕТ

¹ Левий выжыысь одӥг пиосмурт мынӥз но Левий выжыысь ик нылэз аслыз кышно басьтӥз.

² Кышноез секытэн луиз, пи нуны вайиз, со туж чебер вал, сое куинь толэзь ӵоже ватыса возиз.

³ Азьланяз но ватыса возьыны ӧз ни быгатэ бере, камышлэсь кутам мушкоез (корзинаез) кутӥз но сое асфальтэн, тэкитэн зыраз, со пушкы пичи нуныез понӥз но шур дурын будӥсь камыш пушкы пуктӥз.

⁴ Нош нунылэн апаез палэнысен учкыса улӥз: мар луоз соин.

⁵ Соку фараонлэн нылыз шур дуре мисьтӥськыны лыктӥз, нош медо нылъёсыз шур дуртӥ лёгаськыса ветлӥзы. Фараонлэн нылыз камыш пӧлысь мушкоез адӟиз но ляльчи нылзэ сое басьтыны ыстӥз.

⁶ Усьтӥз но пичи нуныез адӟиз; но тани, [мушкоын] нуны бӧрдэ; [фараонлэн нылыз] сое жаляса шуиз: «Та еврейёслэн нунызы».

⁷ Нунылэн апаез фараонлэн нылызлы шуиз: «Еврей кышноез тон доры вайыны мыноно ке шат, пичи нуныез тыныд нонтыса мед будэтоз?»

⁸ Фараонлэн нылыз солы шуиз: «Мын, ветлы». Нылаш мынӥз но нунылэсь анайзэ ӧтьыса вайиз.

⁹ Фараонлэн нылыз солы шуиз: «Кут та нуныез, мон понна нонтыса будэты сое, со понна мон тыныд дун тыро». Кышномурт нуныез басьтӥз но нонтыса улӥз.

¹⁰ Нуны будӥз но, кышномурт сое фараонлэн нылыз доры вайиз, солы со пи интыын вал, солы Моисей ним сётӥз, малы ке шуоно со шуэ вал, мон, пе, сое вуысь поттӥ.

¹¹ Трос дыр ортчиз, Моисей быдэ вуэмын вал ини, со агай-вынъёсыз [израиль пиос] доры потӥз но секыт ужамзэс адӟиз; со адӟиз египет пилэсь агай-вынъёсыз [израиль пиос] пӧлысь одӥгзэ еврей пиез жугемзэ.

¹² Отчы, татчы учкиз, нокинэ но ӧз адӟы, кутӥз но египет пиез вииз, луо пушкы сое ватӥз.

¹³ Мукетаз нуналэ со потыса адӟиз: кык еврей пиос куспазы керето. Вӧсь карись муртлы Моисей шуиз: «Малы тон матысь мурттэ жугиськод?»

¹⁴ Нош со шуиз: «Кин тонэ милемлы кузёйыр, судья карыса пуктӥз? Уд малпаськы-а монэ виыны, кызьы [толон] египет пиез виид?» Моисей кышкатскиз, со шуиз: «Зэм но, со уж сярысь тодӥллям».

¹⁵ Фараон со уж сярысь кылэм бераз Моисеез виыны утчаз, нош Моисей фараон дорысь пегӟыса вуиз, со Мадиан музъеме дугдӥз. [Мадиан музъеме вуыса,] со гудӟем дуре пуксиз.

¹⁶ Мадиан священниклэн сизьым нылъёсыз вал, [соос атайзылэсь, Иофорлэсь, ыжъёссэ возьмаса улӥзы]. Соос лыктыса ву омыръязы, атайзылэсь [Иофорлэсь] ыжъёссэ люктан понна тусьёссэс вуэн тырмытӥзы.

¹⁷ Пудо возьмасьёс лыктыса соосты улляса лэзизы. Соку Моисей султӥз но соослы дурбасьтӥз, [соослы ву омыръяз,] ыжъёссэс люктаз.

¹⁸ Соос атайзы, Рагуил, доры вуэм бере со [соослэсь] юаз: «Малы тӥ туннэ вазь вуиды?»

¹⁹ Соос шуизы: «Кыӵе ке но египет пи пудо возьмасьёслэсь милемыз утиз, ву но омыръяз, ыжъёсмес люктаз».

²⁰ Атайзы нылъёсызлы шуиз: «Кытын со али? Малы сое кельтӥды? Сиськыны ӧте сое».

²¹ Моисейлы та адями дорын улыны кельшиз; Сепфора нылзэ Моисейлы кышнолы сётӥз.

²² Со [секытэн луиз но] пи нуны вайиз, [Моисей] солы Гирсам ним сётӥз, уго со шуэ вал: «Мурт музъемын лыктэм адями мон луи». [Кышноез, секытэн луыса, кыкетӥзэ пизэ вайиз, Моисей солы Елиезер ним сётӥз, шуиз: «Атаелэн Инмарез мынам юрттӥсе, фараонлэн киулысьтыз Со монэ мозмытӥз».]

²³ Трос дыр ортчем бере Египетлэн эксэез кулӥз. Израиль пиос, секыт ужлы чидатэк, лулӟылӥськыса улӥзы, тэльмырыса-бӧрдыса улӥзы, секыт ужлы чидатэк, викышъям куаразы Инмар доры вуиз.

²⁴ Соослэсь лулӟылӥськемзэс Инмар кылӥз но Авраамен, Исаакен, Иаковен кылдытэм кусыпсэ Инмар тодаз вайиз.

²⁵ Инмар адӟиз израиль пиосты, Инмар соосты синйылтӥз.