Осия 1 - Библия удмурт кылын

1-тӥ ЛЮКЕТ

¹ Иудей эксэйёслэн Озиялэн, Иоафамлэн, Ахазлэн, Езекиялэн улон нуналъёсазы, Израиль эксэйлэн, Иеровоамлэн, Иоаслэн пиезлэн, улон нуналаз Беерилэн пиезлы Осиялы Кузё-Инмар дорысь верам кыл вуиз.

² Кузё-Инмарлэн Осиялы вераны кутсконэз. Кузё-Инмар Осиялы шуиз: «Мын, азыса-калгыса улӥсез аслыд кышно вай, со кышно тыныд нылпи мед ваёз; уго Кузё-Инмар бордысь палэнскеменыз сэрен укыр азыса-калгыса улэ та музъем».

³ Мынӥз но Дивлаимлэсь Гомер нылзэ кышно вайиз; секытэн луиз, солы пи нуны вайиз.

⁴ Кузё-Инмар Осиялы шуиз: «Солы Изреель ним сёт, уго ӧжытак дыр ортчем бере Ииуй выжылы Изреельлэсь вирзэ кисьтэм понна пунэмзэ берыкто, Израиль выжылэсь эксэйлыксэ быдто.

⁵ Со нуналэ озьы луоз: Изреель нёжалын Израильлэсь пукыӵсэ сузмыто».

⁶ Гомер эшшо секытэн луиз, ныл нуны вайиз, Кузё-Инмар Осиялы шуиз: «Нылыдлы Лорухама ним сёт; уго азьланяз Израиль юртэз жаляса уг ни улы, сьӧлыксэс уг кушты.

⁷ Нош Иуда юртэз жаляло, Инмарзы Кузё-Инмар бордын соосты утё, соосты пукыӵен но уг, мечен но уг, ожен но уг, валъёсын но уг, вал вылын пукись ожгарчиосын но уг утьы».

⁸ ”Сьӧлыкез куштэмын ӧвӧл” нимо нылзэ нонтэмысь дугдэм бераз со секытэн луиз но пи нуны вайиз.

⁹ Со шуиз: «Солы Лоамми ним сёт, малы ке шуоно тӥ Мынам калыке ӧвӧл, Мон но тӥляд [Инмарды] уг луы».

¹⁰ Но израиль пиослэн лыдзы зарезьысь луо мында луоз, сое мертаны но, лыдъяны но уз луы; отын, кытын соослы шуизы: «Тӥ Мынам калыке ӧвӧл», соослы шуозы: «Тӥ Улэп Инмарлэн пиосыз».

¹¹ Иуда пиос, израиль пиос огазе люкаськозы но асьсэлы одӥг валтӥсь быръёзы, собере потозы со музъемысь, уго Изреельлэн нуналыз бадӟым!