Наум 1 - Библия удмурт кылын

1-тӥ ЛЮКЕТ

¹ Ниневия сярысь азьпалзэ тодытыса веран; Елкосейысь Наумлэн адӟонъёсыныз книга.

² Кузё-Инмар кылэз юн юась, пунэм берыктӥсь Инмар; пунэм берыктӥсь Кузё-Инмар вожез потон дыръя кышкыт: Аслаз тушмонъёсызлы Кузё-Инмар пунэмзэ берыктэ, пумитъяськисьёссэ Со уз жаля.

³ Кузё-Инмар – кема чидась, быдӟым Со Аслаз кужыменыз, вӧсь карытэк уг кельты; сильтӧлэн, бугрес тӧлын лыктэ Кузё-Инмар, пилем Солэн пыд улысьтыз ӝутскем тузон.

⁴ Со зарезьлы косоз но, зарезь куасьмоз, вань шуръёс бырозы; шуяло Васан но Кармил, бездэ Ливанлэн буёлэз.

⁵ Со азьын гурезьёс куалекъяло, мувыръёс ышо-быро, музъем зурка Солэн азяз, быдэс дунневыл но отын улӥсьёс куалекъяло.

⁶ Со вожзэ поттыку, Со азьын сылыны кин быгатоз? Солэн вожпотонэзлэсь тылзэ кин чидалоз? Солэн вожпотонэз тыл кадь гомаса мынэ; изгурезьёс Со азьын куашкало.

⁷ Ӟечлыко Кузё-Инмар, шугадӟон нуналэ пегӟон инты Со; Со вылэ оскиськыса улӥсьёсты Со тодэ.

⁸ Нош Ниневияез, бадӟым ву лэзьыса, выжыозяз куашкатоз, тушмонъёсыз вылэ пеймытлык лэзиськоз.

⁹ Кузё-Инмарлы пумит мар лэсьтыны малпаськоды? Со тӥледыз быдтоз, шугадӟон вылысен уз ни луы.

¹⁰ Уго бышкись будос кадь ог-огеныз герӟаськыса, юисьёс кадь кудӟемын луыса, соос кӧс куро кадь тылын чылкак ньылэмын луозы.

¹¹ Тон пушкысь Кузё-Инмарлы пумит уж лэсьтыны малпась, мыдланес визь-кенешъёс сётъясь, потӥз.

¹² Тазьы шуэ Кузё-Инмар: соос кышкасьтэмесь, трос ке но, но соос корамын луозы, ышозы-бырозы; нош тонэ секытлыкъёсын курадӟытылӥ ке но, азьланяз уг ни курадӟытылы.

¹³ Табере солэсь тон вылын кыллись сиессэ пыргыто, жильыетъёстэ чигтыло.

¹⁴ Нош тон пумысен, Ассур, Кузё-Инмар таӵе пуктон сётӥз: тынэсьтыд нимдэ нуллӥсь выжы уз ни луы; тынад инмаредлэн коркасьтыз вӧлыса лэсьтэм сульдэръёссэ, йыбыртъяно макеоссэ быдто, отчы тыныд шайгу дасяло, уго тонэ синазькыль карозы.

¹⁵ Тани, гурезьёсын тупаса улон ивортӥсьлэн, ӟеч ивор верасьлэн пыдъёсыз: праздникъёсты шулдыр ортчыты, Иудея, сётэм кылъёстэ быдэсъя, уго тон вылтӥ сьӧлыклэсь кышкасьтэм уз ни ортчы: со чылкак быдтэмын ни.