Михей 1 - Библия удмурт кылын

1-тӥ ЛЮКЕТ

¹ Иудеяын Иоафан, Ахаз, Езекия эксэйын пукон аръёсы Самария но Иерусалим пумысен Кузё-Инмар Морасфитысь Михейлы тазьы вераз.

² «Кылзэлэ, вань калыкъёс, музъем но мар отын вань, кабыл басьтэ! Инмар Кузё-Инмар – адӟись, тӥледлы пумит Со Аслаз святой храмысеныз Ачиз мед вералоз!

³ Уго тани, Кузё-Инмар Аслаз интыысьтыз потэ, васькоз но музъемлэн ӝужыт интыосыз вылэ лёгиськоз, –

⁴ Со улын гурезьёс тыл азьысь сюсь кадь сылмозы, нёжалъёс люкиськылозы меӵ гурезьысь усись вуос кадь.

⁵ Ваньмыз та Иаковлэн сьӧлыклэсь кышкатэк улэменыз сэрен, Израиль юртлэн сьӧлыкъёсыз понна. Кин бордысь потэ Иаковлэн сьӧлыклэсь кышкатэк улонэз? Самария бордысь ӧвӧл-а? Иудеяе кин ӝужыт интыосты пуктылӥз? Иерусалим ӧз-а?

⁶ Со понна Самарияез бусыысь из люклы, виноград будэтон интылы пӧрмыто; изъёссэ нёжалэ зӥръяло, инъетсэ гольык кельто.

⁷ Солэн вань сульдэръёсыз сузмытэмын луозы, азыса-калгыса поттэм вань саламъёсыз тылын сутэмын луозы; вань сульдэръёссэ-идолъёссэ куашкатыны сёто, уго азыса-калгыса поттэм кузьымъёсын со соосты пуктылӥз; азон-калгон кузьымлы ик соос пӧрмытэмын луозы.

⁸ Та пумысен мон бӧрдо, викышъяло; талам, гольык кылем мурт кадь ветло, шакалъёс кадь вузо, страусъёс кадь бӧрдо.

⁹ Уго вӧсь луись яраосыз Иуда доры вуизы, калыкелэн капкаосыз дорозь ик вуизы, Иерусалим дорозь.

¹⁰ Та сярысь Гефын эн ивортэ, бадӟым куараен отын эн бӧрдэ; Офра гуртысен астэ пенен пызьна.

¹¹ Шафирын улӥсьёс, возьдаськон интыосыныды гольык кылемъёс, мукет интые улыны выже; Цаанын улӥсь но пегӟыны уз быгаты; Ецельысь бӧрдэм куара отчы тӥледыз дугдыны уз лэзьы.

¹² Марофаын улӥсь аслаз ваньбурез пумысен кайгыре, уго Кузё-Инмар дорысь шугадӟон васькиз Иерусалимлэн капкаез доры.

¹³ Лахисын улӥсь, ожмаськон уробояд кыткы шаплыесь валъёстэ; тон Сӥон ныллэн сьӧлыканэзлэн кутскон сётӥсез, уго тон дорын Израильлэн йыружъёсыз шараяськизы.

¹⁴ Соин ик тон Морешеф-Гефе саламъёс-кузьымъёс ыстылод; но Ахзив карысь Израиль эксэйёслы юрттэт уз вуы.

¹⁵ Морешын улӥсь, тон доры эшшо люкет басьтӥсез ваё; со Одолламозь, Израильлэн данлыкез дорозь, вуоз.

¹⁶ Туж яратоно нылпиосыд пумысен куректыса, йырысьтыд йырсидэ басьты, ӵышкы; тылыосыз усьылэм ӧрӟилэн кадь, соосын сэрен пилештэ паськытаты, уго соос тон дорысь мукет азе улыны нуэмын вал».