Матфей 28 - Библия удмурт кылын

28-тӥ ЛЮКЕТ

¹ Суббота ортчем бере, арнялэн нырысетӥ нуналаз, ӟардон азьын Магдалина Мария но мукетыз Мария шайгу учкыны лыктӥзы.

² Соку туж кужмо музъем зурказ – Кузё-Инмарлэн Кылчинэз, Инмысь васькыса, лыктӥз но шайгу ӧс бордысь изэз палэнтӥз, со вылын пукиз;

³ солэн тусбуйыз чилекъям кадь, дӥськутэз лымы кадь тӧдьы вал.

⁴ Солэсь кышкаса, возьмаськисьёс куалекъяны кутскизы, кулэм муртъёс кадесь луизы;

⁵ нош Кылчин, кышномуртъёслы вазиськыса, шуиз: «Эн кышкалэ, мон тодӥсько, тӥ кортӵогам Иисусэз утчаськоды шуыса.

⁶ Со татын ӧвӧл: кызьы вераз, Со улӟыса султӥз. Лыктэлэ, Кузё-Инмарлэсь кыллем интызэ учкелэ.

⁷ Ӝоггес мынэлэ но дышетскисьёсызлы вералэ, Со кулэмысь улӟыса султӥз шуыса. Со тӥляд азяды Галилеяе вуоз; отысен Сое адӟоды. Тани мон тӥледлы верай».

⁸ Шайгуысь шаплы потӥзы, кышкаса но туж шумпотыса, дышетскисьёсызлы ивортыны бызьыса мынӥзы.

⁹ Дышетскисьёсызлы ивортыны мыныкузы, Иисус соосты пумитаз, соослы Со шуиз: «Шумпотэлэ!» Нош соос матаз лыктӥзы но, Иисуслэн пыд бордаз кутӥськыса, Солы йыбырттӥзы.

¹⁰ Соку Иисус соослы шуиз: «Эн кышкалэ. Мынэлэ, Мынам братъёсылы ивортэлэ. Галилеяе мед мынозы, отысен соос Монэ адӟозы».

¹¹ Соос мыныку, возьмаськисьёс пӧлысь куд-огез, городэ вуыса, архиерейёслы вань луэм учыр сярысь ивортӥзы.

¹² Нош соос, тӧроосын валче люкаськыса, кенеш каризы, солдатъёслы трос коньдон сётыса

¹³ шуизы: «Вералэ, ми изьыку, Солэн дышетскисьёсыз уйин лыктыса лушказы Сое.

¹⁴ Та сярысь ивор кивалтӥсь доры вуиз ке, ми Сое оскытомы, тӥледыз но шугадӟонлэсь мозмытомы».

¹⁵ Коньдонзэс басьтыса лэсьтӥзы озьы, кызьы дышетэмын вал. Та кыл туннэ нуналозь иудейёс пӧлын вӧлмемын.

¹⁶ Нош дас одӥгез дышетскисьёсыз Галилеяе, гурезе мынӥзы, отчы соосты Иисус мыныны косӥз вал.

¹⁷ Иисусэз адӟыса, Солы йыбырттӥзы, нош куд-огез оскытэк шекланӥзы.

¹⁸ Матазы лыктыса, Иисус соослы шуиз: «Инмын но, музъем вылын но Мыным котькыӵе кужым сётэмын.

¹⁹ Мынэлэ, вань калыкъёсты дышетэлэ; соосты Атайлэн, Пилэн, Святой Духлэн нимыз понна пылатэ,

²⁰ ваньзэ, мае Мон тӥледлы косӥ, соосты быдэсъяны дышетэ; вань нуналъёсы, дунне бырытозь, Мон тӥледын огазьын». Аминь.