Марк 9 - Библия удмурт кылын

9-тӥ ЛЮКЕТ

¹ Иисус соослы шуиз: «Зэм ик тӥледлы верасько, татын сылӥсьёс пӧлын вань куд-ог адямиос, соос кулыса уз вуэ, кужмын лыктӥсь Инмар Эксэйлыкез адӟозы».

² Куать нунал ортчыса, Иисус Петрез, Иаковез но Иоаннэз асьсэ понназэс гинэ сьӧраз басьтӥз но, ӝужыт гурезь йылэ тубыса, соос азьын воштӥськиз:

³ дӥсянэз чиляса пиштӥсь, лымы кадь юг-юг тӧдьы луиз, музъем вылысь одӥгезлэн но дэра гужатӥсьлэн сыӵе тӧдьы каремез уз луы.

⁴ Соослы Илияен Моисей возьматскизы; Иисусэн вераськыса улӥзы.

⁵ Соку Петр Иисуслы шуиз: «Дышетӥсь! Милемлы татын улыны ӟеч; ваелэ куинь тылыс пуктоме: одӥгзэ Тыныд, одӥгзэ Моисейлы, одӥгзэ Илиялы».

⁶ Куалектэменыз сэрен мар вераны ӧз тоды ни.

⁷ Пилем вуыса соосты шобыртӥз, пилем пушкысь куара кылӥськиз: «Та Мынам Яратоно Пие, Солэсь кылзӥське».

⁸ Соку соос котырак учкизы но, Иисусэз сяна, нокинэ но мукетсэ ӧз адӟе.

⁹ Гурезь йылысь васькыкузы, Адями Пи кулэмысь улӟыса султытозь, та адӟемзэс одӥг муртлы но Со вераны ӧз лэзьы.

¹⁰ Та кылэз тодазы возизы, куспазы ог-огзылэсь юазы: «Мар шуэм со: кулэмысь улӟыны?»

¹¹ Солэсь юазы: «Кызьы озьы книга тодӥсьёс верало нырысь ик, пе, Илия лыктыны кулэ?»

¹² Ответ сётыса, Иисус соослы шуиз: «Зэм, нырысь ик Илия лыктыса ваньзэ дасяны-тупатыны кулэ. Адями Пилы, кызьы гожтэмын Со сярысь, трос курадӟонэз, сантэманэз адӟоно луоз.

¹³ Но тӥледлы верасько: Илия лыктӥз но, кызьы гожтэмын со сярысь, мар каремзы потӥз, озьы ик каризы».

¹⁴ Дышетскисьёсыз доры лыктыса, соос котыре люкаськем трос калыкез, соосын ченгешыса сылӥсь книга тодӥсьёсты Иисус синйылтӥз.

¹⁵ Соку, Сое адӟыса, вань калык паймиз, бызьыса мынӥз но Соин ӟечбуръяськиз.

¹⁶ Книга тодӥсьёслэсь Со юаз: «Мар сярысь тӥ соосын ченгешиськоды?»

¹⁷ Калык пушкысь одӥгез шуиз: «Дышетӥсь! Тон доры мон периен кылтэм карем пиме вайи вал.

¹⁸ Кытысен гинэ уг куты, соку ик пери сое муз вылэ погыртэ, соку ымысьтыз шукы потыны кутске, пиньёссэ гизьыр йыръе, мугорыз пуме; Тынад дышетскисьёсыдлэсь ”перизэ улляса поттэ” шуыса кури вал, но соос поттыны ӧз быгатэ».

¹⁹ Солы ответ сётыса, Иисус шуиз: «Эй, оскисьтэм выжы! Кема уло на-а тӥ пӧлын? Кема-а чидало на тӥледыз? Ваелэ сое Мон доры».

²⁰ Со муртэз Иисус доры вайизы. Перияськем мурт Сое адӟыса гинэ вуиз, пери соку ик сое дыр-р! куалекъятӥз; муз вылэ усьыса бекмылляськиз, ымысьтыз шукы потыса улӥз.

²¹ Иисус солэн атаезлэсь юаз: «Кемалась-а тазьы луиз ни?» – «Пичи дырысеныз, – шуиз со, –

²² пери сое трос пол, виён вылысь, тыл пӧлы но, вуэ но куяз; юрттыны быгатӥськод ке, жаля милемыз, юртты милемлы».

²³ Иисус солы шуиз: «Ӧжыт ке но быгатӥськод-а оскыны? Оскись муртлы котьмар луоно».

²⁴ Соку ик та пилэн атаез синкылиен бӧрдыса кеськиз: «Оскисько, Кузёе! Юртты, ӧжыт ке мынам осконэ».

²⁵ Калыклэсь люкаськемзэ адӟыса, Иисус перилы алыса вераз: «Эй, кылтэм, пельтэм пери! Мон тонэ косӥсько, пот со пушкысь но берен со пушкы ноку но эн ни пыры».

²⁶ Черектӥськыса, сое юн сэзъялтыса, пери со пушкысь потӥз; со пи кулэм мурт кадь ик луиз, тросэз «со кулӥз ни» шуизы.

²⁷ Нош Иисус сое китӥз кутыса ӝутӥз но, со пыд вылаз султӥз.

²⁸ Иисус корка пырем бере, асьсэ понна кыльыку, дышетскисьёсыз Солэсь юазы: «Ми нош малы сое улляса поттыны ӧм быгатэ?»

²⁹ Соослы Со шуиз: «Та выжыез, вӧсяськыса но визь утьыса сяна, номырин но поттыны уг луы».

³⁰ Отысь потыса, Галилея пыр ортчизы. Солэн Ассэ нокинлы но тодматэмез ӧз поты;

³¹ уго дышетскисьёсызлы Со тазьы дышетыса вераз: «Адями Пи адямиослэн киулазы сётэмын луоз, Сое виёзы, вием беразы куинетӥ нуналаз Со улӟыса султоз».

³² Та верам кылъёсыз соос ӧз валалэ, юаны ке нош – кышказы.

³³ Капернауме вуиз. Коркан улыкузы, Иисус соослэсь юаз: «Сюрес кузя куспады мар сярысь вераськыса лыктӥды?»

³⁴ Шып улӥзы, сюрес кузя лыктыкузы, «кин ваньмызлэсь бадӟымез» шуыса, асьсэ куспын вераськизы вал уга соос.

³⁵ Пуксиз но, дораз дас кык дышетскисьёссэ ӧтьыса, соослы вераз: «Кинлэн ваньмызлэсь азьпала потэмез потэ, со ваньмызлэн бераз мед кылёз, ваньмызлы ляльчи мед луоз».

³⁶ Пичи муртэ кутӥз но соослэн шоразы султытӥз, ӟыгыртӥз но соослы шуиз:

³⁷ «Кин Мынам нимы понна одӥгзэ таӵе пиналэз кабыл басьтэ, со Монэ кабыл басьтэ; нош кин Монэ кабыл басьтэ, со Монэ кабыл уг басьты, со Монэ Ыстӥсез кабыл басьтэ».

³⁸ Соку Иоанн шуиз: «Дышетӥсь! Тынад нимыныд периосты уллясь адямиез ми адӟимы, нош со асьме сьӧры уг ветлы. Со ужен вырыны ӧм ни лэзе, малы ке шуоно асьме сьӧры уг ветлы».

³⁹ Иисус шуиз: «Эн алэ сое; Мынам нимыным паймымон уж лэсьтӥсь муртлэн со дыре ик Монэ лек кылъёсын ултӥямез уз луы;

⁴⁰ уго кин тӥледлы пумит ӧвӧл, со – тӥ палан.

⁴¹ Кин ке Мынам нимы понна тӥледлы одӥг сюмык ву сётӥз ке, тӥ Христослэн муртъёсыз уго, зэм ик верасько, со мурт аслэсьтыз медзэ-кузьымзэ уз ышты.

⁴² Нош кин одӥгзэ та пичиос пӧлысь, Мыным оскисез, сьӧлыке пыртӥз ке, солы умойгес луысал, чыртыяз вуко кӧ ошыса зарезе куштысалзы ке.

⁴³ Киыд тонэ сьӧлыке пыртэ ке, ӵогыса кушты сое: тыныд умойгес луоз китэк улонэ пырыны, кык киыныд ик гееннае, ноку но кысылӥсьтэм тыл пушкы пыронлэсь,

⁴⁴ кытын соослэн нумырзы но уг кулы, тыл но уг кысы.

⁴⁵ Пыдыд тонэ сьӧлыке пыртэ ке, ӵогыса кушты сое: тыныд умойгес луоз пыдтэк улонэ пырыны, кык пыдыныд но гееннае, ноку но кысылӥсьтэм тыл пушкы куштӥськонлэсь,

⁴⁶ кытын соослэн нумырзы но уг кулы, тыл но уг кысы.

⁴⁷ Синмыд тонэ сьӧлыке пыртэ ке, ишкалты сое: тыныд умойгес луоз пал синмын Инмар Эксэйлыке пырыны, кык синмыныд но ӝуась гееннае куштӥськонлэсь,

⁴⁸ кытын соослэн нумырзы но уг кулы, тыл но уг кысы.

⁴⁹ Уго котькин но тылын сылалтӥськоз, котькыӵе курбон сылалэн сылалтӥськоз.

⁵⁰ Сылал – со ӟеч маке; нош сылаллэн кузьытэз быриз ке, маин сое тупатоды на? Пушкады сылалэз медаз быры, куспады тупаса улэлэ».