Марк 8 - Библия удмурт кылын

8-тӥ ЛЮКЕТ

¹ Та нуналэ туж трос калык люкаськиз, номыр сиёнзы ӧй ни вал, соку Иисус Аслэсьтыз дышетскисьёссэ ӧтьыса шуиз:

² «Жаль потэ Мыным калык, куинь нунал Мон бордын уло ни, номыр сиёнзы но ӧвӧл,

³ сюдытэк гуртазы лэзи ке, сюрес вылын лябӟозы, кыдёкысь лыктэмъёс но вань ук».

⁴ Дышетскисьёсыз Солы шуизы: «Соосты сюдыны кытысь, кин та кыр дуннеын нянь басьтыны быгатоз?»

⁵ Соослэсь Иисус юаз: «Кӧня няньды вань?» Соос шуизы: «Сизьым».

⁶ Соку Со калыкез музъем вылэ пуксьылыны косӥз; сизьым нянез басьтӥз но тау карыса тӥялтӥз; калыклы мед люкылозы шуыса, дышетскисьёсызлы сётъяз; соос калыклы сётъязы.

⁷ Кӧня ке но чорыгзы но вал; бакель кариз но калыклы сётъяны косӥз.

⁸ Сиизы, кӧтсы тыриз; кылем нянь юдэсъёссэс сизьым кудые люказы.

⁹ Сиськисьёс ог ньыль сюрс мында вал. Соосты Со гуртазы лэзиз.

¹⁰ Нош Ачиз дышетскисьёсыныз ӵош пыже пыриз но Далмануф шуон шаере вуиз.

¹¹ Фарисейёс потыса Соин ченгешыны кутскизы, визьзэ сынаса, инмысен тодмет мед возьматоз шуыса, Солэсь куризы.

¹² Со мур лулӟиськыса шуиз: «Та выжы малы тодмет куре? Зэм ик тӥледлы верасько, та выжылы тодмет уз сётӥськы».

¹³ Соосты кельтыса, нош ик пыже пыриз но тупала выжиз.

¹⁴ Дышетскисьёсыз нянь басьтыны вунэтӥллям, бордазы пыжын одӥг гинэ нянь сукыризы вал.

¹⁵ Дышетскисьёсызлы алыса вераз: «Чаклаське, утиське фарисейёслэн шӧмзылэсь, Иродлэн шӧмызлэсь».

¹⁶ Куспазы вераськыса шуизы: «Асьмелэн няньмы ӧвӧл шуэмез та возьматэ».

¹⁷ Валатскыса Иисус соослы шуиз: «Малы тӥ няньмы ӧвӧл шуыса вераськиськоды? Али но уд тодӥське-а, уд валаське-а? Ялан сюлэмды измемын на-а?

¹⁸ Синды вань но – уд адӟиське-а? Пельды вань но – уд кылӥське-а? Тодады но уд вайиське-а?

¹⁹ Вить сукыри нянь тӥялтыса вить сюрс муртэ сюдыкум, кӧня куды тыр нянь юдэсъёсты люкады?» Солы шуизы: «Дас кык».

²⁰ «Нош сизьымзэ ньыль сюрс муртлы тӥялтыкум, кӧня куды тыр нянь юдэсъёсты люкады?» Шуизы: «Сизьым».

²¹ Соослы Иисус шуиз: «Али но тӥ уд на-а валаське?»

²² Вифсаидае вуиз. Со доры синтэм муртэз вайизы но, со борды мед йӧтӥськоз вал шуыса, Солэсь куризы.

²³ Синтэм адямиез, китӥз кутыса, гурт сьӧры поттӥз, синмаз сялӟиз но вылаз кизэ поныса юаз: «Мар ке адӟиськод-а?»

²⁴ Со мурт учкыса шуиз: «Кошкись муртъёсты писпуосты кадь адӟисько».

²⁵ Нош ик солэн син вылаз кизэ понӥз но учкыны косӥз. Со пи бурмиз, ваньзэ чылкыт адӟыны кутскиз.

²⁶ Иисус сое дораз бертыны косӥз но солы шуиз: «Гуртэ эн пыры, гуртын нокинлы но эн вера».

²⁷ Собере Иисус дышетскисьёсыныз ӵош Филипплэн кивалтоно Кесария ёросысьтыз гуртъёсы мынӥз. Сюрес вылысен дышетскисьёсызлэсь юаз: «Адямиос Монэ кин шуыса лыдъяло?»

²⁸ Соос веразы: «Иоанн Пылатӥсь шуо, мукетъёсыз – Илия, нош куд-огез пророкъёс пӧлысь кудӥз ке но огез шуыса верало».

²⁹ Соослэсь Со юаз: «Нош тӥ асьтэос Монэ кин шуыса лыдъяськоды?» Петр ответ сётыса шуиз: «Тон – Христос».

³⁰ Иисус Ачиз сярысь нокинлы но вераны ӧз лэзьы.

³¹ Собере соосты Со «Адями Пилы трос курадӟонэз чидано луоз, тӧроос, архиерейёс, книга тодӥсьёс Сое палэнтозы, Сое виёзы, куинетӥ нуналаз улӟыса султоз» шуыса дышетыны кутскиз.

³² Тае Со шара, ваньмызлы кылӥськымон вераз. Петр Сое палэнэ ӧтиз но Соин соглаш луымтэзэ вераны кутскиз.

³³ Дышетскисьёсыз пала берыктӥськиз но, шораз учкыса, Петрез вераськемысь дугдытӥз, солы Со шуиз: «Кошкы Мон дорысь, шайтан, тон Инмарлы яраноез сярысь уд малпаськы ук, адямилы яраноез сярысь тон малпаськод».

³⁴ Калыкез дышетскисьёсыныз ӵош матаз ӧтьыса, соослы Со вераз: «Кин Мон сьӧры мыныны малпа, аслэсьтыд ачид куштӥськы, киростэ басьты но Мон сьӧры мын.

³⁵ Уго кинлэн лулзэ утемез потэ, со сое ыштоз; нош кин Мон понна но Евангелие понна лулзэ ыштоз – со лулзэ утёз.

³⁶ Кыӵе пайдаез адямилы, быдэс дуннеез аслыз басьтӥз, нош лулызлы изъян лэсьтӥз ке?

³⁷ Лулзэ утён понна кӧня дун тыроз адями?

³⁸ Та азэм, сьӧлыко выжы пушкысь кин Мынэсьтым яке Мынам кылъёсылэсь возьдаськиз ке, Адями Пи но, Атаезлэн пиштӥсь данлыкеныз святой Кылчинъёсын валче лыктыкуз, со муртлэсь возьдаськоз».