Марк 6 - Библия удмурт кылын

6-тӥ ЛЮКЕТ

¹ Отысь потыса, Иисус Аслаз улоно музъемаз бертӥз. Со бӧрсьы дышетскисьёсыз лыктӥзы.

² Суббота нунал вуиз, Со сӥнагогаын дышетыны кутскиз; кылзӥськем муртъёс паймыса вераськизы: «Кытысен талы сётӥськемын? Кыӵе сыӵе визьлык Солы сётэмын? Кызьы таӵе паймымон ужъёс Солэн киыныз лэсьтӥсько?

³ Тӥрен ужась мурт ӧвӧл-а Со, Мариялэн пиез, Иаковлэн, Иосиялэн, Иудалэн, Симонлэн братсы ӧвӧл-а Со? Татын, асьме пӧлын ӧвӧл-а Солэн сузэръёсыз?» Озьы Со пумысен сьӧлыказы.

⁴ Иисус соослы шуиз: «Пророк сӥтэм-сантэм уг луы, луэ ке, луэ аслаз вордӥськем музъемаз, ӵыжы-выжыосыз дорын, аслаз дораз гинэ».

⁵ Татын Со нокыӵе но паймымон ужъёс лэсьтыны ӧз быгаты; кӧня ке висисьёсты гинэ вылазы кизэ поныса бурмытӥз.

⁶ Соослэн оскымтэзылы Со паймиз. Собере артысь бускель гуртъёстӥ дышетыса ветлӥз.

⁷ Дас кыкназэс ик ӧтиз но соосты кыкен-кыкен лэзьылыны кутскиз, периосты улляса поттылыны кужым сётӥз.

⁸ Сюрес вылэ потыкузы, одӥг боды сяна, пуйы но, нянь но, кускерттоназы коньдон но басьтыны ӧз косы,

⁹ пыдазы огшоры пыдкутчан поныны косӥз, кык пумо дӥсян но басьтыны ӧз косы.

¹⁰ Соослы Со шуиз: «Кудаз ке корка пыриды, та интыысь кошкытозяды, отын ик улэ.

¹¹ Кин ке тӥледыз пырыны ӧз ке лэзьы, тӥледыз ӧз ке кылзӥськы, соос дорысь потыкуды, соослэсь янгышъёссэс шарае поттон понна пыдысьтыды сюйзэ курткыса кельтэ. Зэм ик тӥледлы верасько: суд нуналэ, Содомен Гоморралы сярысь но, та городлы секытгес луоз».

¹² Соос потӥзы но ӧпкельыса сьӧлыкъёслэсь куштӥськон сярысь тодытыса ветлӥзы.

¹³ Трос периосты улляса поттылӥзы, трос висисьёсты вӧйын зыраса бурмытылӥзы.

¹⁴ Ирод эксэй Иисус сярысь кылӥз но, – Солэн нимыз тодмо вал ни, – «та Иоанн Пылатӥсь улӟыса султэм но, соин ик со пыр паймымон ужъёс лэсьтӥсько» шуиз.

¹⁵ Мукетъёсыз «Та Илия» шуизы. Нош мукетъёсыз шуизы: «Та пророк яке пророкъёс пӧлысь одӥгез».

¹⁶ Нош Ирод кылыса шуиз: «Иоанн со, мон солэсь йырзэ ӵогыса басьтӥ; со кулэмысь улӟыса султэм».

¹⁷ Та Ирод, Филипп вынызлэн Иродиада нимо кышноез понна, Иоаннэз кутытыса пытсэтэ ворсатӥз, малы ке шуоно та кышномуртэз со аслыз кышно кариз.

¹⁸ Иоанн Иродлы вера вал: «Выныдлэсь кышнозэ тыныд кышно карыны уг яра».

¹⁹ Иродиада со вылэ йыркуръяськыса, виемез потыса улӥз, но ӧз быгаты.

²⁰ Ирод Иоаннлэсь кышкаса улӥз, со тодэ вал уго та пиосмурт шонер, дун-чылкыт улӥсь шуыса, соин ик сое утьыны тыршиз; солэсь кылзӥськыса трос лэсьтӥз, шумпотыса сое кылзӥськиз.

²¹ Тупамон нунал вуиз. Ирод, вордӥськем нуналзэ пусйыны шуыса, юон дыр кариз но аслэсьтыз кузёйыръёссэ, сюрс солдатэн кивалтӥсьёсты но Галилея музъемысь тӧроосты ӧтчаз.

²² Иродиадалэн нылыз пырыса эктӥз, Иродлы но, куноослы но со кельшиз. Эксэй нылашлы шуиз: «Кур, мар тыныд кулэ – ваньзэ сёто».

²³ Кылзэ сётыса шуиз: «Мар гинэ тон мынэсьтым уд куры – ваньзэ сёто, ӝыны эксэйлыкме но сёто».

²⁴ Со ныл потыса анаезлэсь юаз: «Мар куроно?» Соиз шуиз: «Иоанн Пылатӥсьлэсь йырзэ».

²⁵ Соку ик со дыртыса эксэй доры пыриз но солэсь куриз: «Иоанн Пылатӥсьлэсь йырзэ, тэркые поныса, али ик мыным сёт».

²⁶ Эксэй куректонэ усиз. Но, куноосыз азьын кыл сётэмзэ тодаз вайыса, пумитъяськемез ӧз поты ини.

²⁷ Соку ик эксэй аслэсьтыз мугор возьмасьсэ Иоаннлэсь йырзэ вайыны косӥз.

²⁸ Со пытсэтэ пыриз, солэсь йырзэ ӵогыса тэркые понӥз но вайыса ныллы сётӥз, нош та ныл сое аслаз анаезлы сётӥз.

²⁹ Та сярысь дышетскисьёсыз кылӥзы, лыктыса солэсь мугорзэ басьтӥзы но шайгуэ понӥзы.

³⁰ Апостолъёс Иисус доры люкаськизы но мар лэсьтэмзы, малы дышетэмзы сярысь ваньзэ Солы веразы.

³¹ Иисус соослы шуиз: «Асьтэ понна, калыктэм интые мыныса, ӧжытак шутэтске». Лыктӥсьёс, кошкисьёс трос луэмен, соослы сиськыны но маза уг луы вал.

³² Пыже пуксьыса, асьсэ понна калыктэм интые кошкизы.

³³ Калык соослэсь кошкемзэс адӟиз, тросэз соосты тодмазы; вань городъёсысь пыдын мынӥсьёс татчы бызьыса азьлогес вуизы но Иисус котыре люкаськизы.

³⁴ Потэм бераз Со трос калыкез адӟиз, Солы соос жаль потӥзы, возьмаськисьтэк кылем ыжъёс кадесь соос вал уго; Иисус соосты трос дышетыса улӥз.

³⁵ Огшап дыр ортчем бере дышетскисьёсыз Со доры лыктыса шуизы: «Та кыр инты, нош дыр трос ини,

³⁶ Тон соосты артысь гуртъёсы, починкаосы лэзь, асьсэлы нянь мед басьтозы, соослэн номыр но сиёнзы ӧвӧл ук».

³⁷ Соослэн пумитазы Иисус шуиз: «Тӥ соослы сиён сётэлэ». Солы соос шуизы: «Милемлы асьмелы мыныса, ог кык сю динарий тыр нянь басьтыса, соосты сюдоно ке шат?»

³⁸ Нош Иисус соослэсь юаз: «Кӧня няньды тӥляд вань? Мынэлэ, учкелэ». Мыныса тодӥзы но шуизы: «Вить няньмы но кык чорыгмы вань».

³⁹ Собере соосты Со ваньзэс люкрак вож гуждор вылэ пуктылыны косӥз.

⁴⁰ Витьтон муртэн, сю муртэн чурен-чурен пуксьылӥзы.

⁴¹ Со вить нянез но кык чорыгез кутӥз, ин пала учкыса бакель кариз но, нянез тӥялтыса, дышетскисьёсызлы сётъяз, люкаськем калыклы соос мед люкылозы шуыса. Кык чорыгез но ваньмызлы люкиз.

⁴² Ваньзы сиизы, ваньзылэн кӧтсы тыриз.

⁴³ Нянь юдэсъёсты, чорыглэсь кылем люкетъёссэ дас кык кудые тыраз люказы.

⁴⁴ Нянь сиисьёс пӧлын ог вить сюрс пиосмурт вал.

⁴⁵ Ачиз калыкез келян дыръя дышетскисьёссэ, пыже пуксьыса, тупала, Вифсаида котыре, азьлогес выжыны косӥз.

⁴⁶ Соосты келям бераз Ачиз гурезь йылэ вӧсяськыны тубиз.

⁴⁷ Ӝыт пал пыжзы зарезь шорын вал ини, нош Со огназ музъем вылэ кылиз.

⁴⁸ Со адӟиз тӧл пужит пельтэмен сэрен дышетскисьёсызлэсь ву вылын курадӟемзэс; ӵукна пал, ӟардон азьын, соос доры Со зарезь вылтӥ вамышъяса лыктӥз; вӧзтӥзы потыса кошкыны турттэ вал.

⁴⁹ Солэсь зарезь вылтӥ вамышъяса лыктэмзэ адӟизы но, та пӧртмаськись, дыр, шуыса, черектӥськизы.

⁵⁰ Сое адӟыса, ваньзы кышкатскизы. Соку ик соосын Со вераськыны кутскиз, соослы шуиз: «Йыг-йыг кариське, Мон со, эн кышкалэ».

⁵¹ Соослэн пыжазы пыриз; тӧл дугдӥз. Асьсэ куспын соос туж паймыса, абдраса улӥзы.

⁵² Сюлэмъёссы из кадь чурыт вылэмысь, нянь люкылыку луэм паймымон ужез адӟыса но, соос ӧз валатске.

⁵³ Тупала выжыса, Геннисарет музъеме вуизы, ярдуре дугдӥзы.

⁵⁴ Иисус пыжысь потэм бере татын улӥсьёс соку ик Сое тодмазы но

⁵⁵ та сярысь иворез быдэс шаеразы вуттӥзы. Солэсь кытынзэ тодэм беразы соку ик Со доры висисьёсты валесэнызы валче вайылыны кутскизы.

⁵⁶ Кытчы гинэ Со ӧз вуы – гуртъёсы-а, городъёсы-а – котькытын но висисьёссэс кыре поттылӥзы, дӥсянэзлэн сӧзы бордаз ке но йӧтӥськыны мед лэзёз вал шуыса, Солэсь куриськизы; кинъёс Со борды йӧтӥськизы – бурмизы.