Марк 5 - Библия удмурт кылын

5-тӥ ЛЮКЕТ

¹ Зарезьлэн мукет палаз, Гадара шаере вуиз.

² Пыжысь потыса гинэ вуиз, Солэн пумитаз шайгу пещераысь перияськыса улӥсь мурт лыктӥз.

³ Со муртлэн улон интыез шайгуосын вал; нокинлэн но сое жильыен но думылэмез ӧз луы.

⁴ Уно пол со думылэмын, жильыямын вал, нош со жильыосты чигтылӥз, думетъёсты тӥялляз; нокинлэн но сое буйгатэмез ӧз луы.

⁵ Чик дугдылытэк, уй но нунал, гурезьёсын, шайгуосын кесяськыса, изъёс борды ассэ йыгаса улӥз.

⁶ Кыдёкысен ик Иисусэз адӟиз, Со доры бызьыса лыктӥз но, Солы йыбырттыса,

⁷ бадӟым куараен черектӥськыса шуиз: «Иисус, Вылысь Инмарлэн Пиез, Тынад мон бордын мар ужед? Инмарлэн нимыныз Тонэ тэльмырыса курисько: эн курадӟыты монэ!»

⁸ Уго Иисус солы шуиз: «Пери, пот та адямилэн пушкысьтыз».

⁹ Солэсь юаз: «Кызьы тынад нимыд?» Солэн пумитаз со шуиз: «Легион мынам нимы, малы ке шуоно ми трос кузя».

¹⁰ Та музъемысь эн улля вал шуыса, периос Солэсь туж куриськизы.

¹¹ Гурезь вӧзын бадӟым парсь уллёез возьмало вал.

¹² Вань периос Солэсь куриськизы: «Парсьёс пушкы милемыз ысты, соос пушкы ми мед пырысалмы».

¹³ Иисус соослэсь куронзэс соку ик быдэстӥз. Периос потыса парсьёс пушкы пыризы, соку ик парсьёс меӵ яр йылысен зарезе тэтчазы, отын ог кык сюрс пала парсьёс вал; ваньзы зарезе выйизы.

¹⁴ Нош парсь возьмасьёс бызьыса кошкизы но городын, гуртъёсын та сярысь ивортӥзы. Отын улӥсьёс мар луэмез учкыны потӥзы.

¹⁵ Иисус доры лыктэм беразы адӟизы: перияськыса ветлӥсь адями, кудӥзлэн пушказ легион улӥз, дӥсяськыса пуке, визьмаськем ни; тае адӟыса, куаляк усизы.

¹⁶ Адӟись муртъёс соослы веразы, мар луиз перияськем муртэн, парсьёс сярысь но.

¹⁷ Соослэн улон ёросысьтызы мед кошкоз вал шуыса, Сое курыны кутскизы.

¹⁸ Иисус пыже пырем бере перияськыса улэм мурт Сое куриз, Соин ӵош ветлыны мед лэзёз шуыса.

¹⁹ Нош Иисус сое ӧз лэзьы, Со шуиз: «Гуртад берт асладъёс доры но вера Кузё-Инмар тонэн мар кариз, кызьы Со тонэ жаляз».

²⁰ Со мурт, Дас каро музъеме мыныса, Иисуслэсь соин ма каремзэ тодытыса ветлӥз. Ваньзы талы паймизы.

²¹ Иисус, пыже пуксьыса, мукет пал ярдуре потэм бере Со котыре трос калык люкаськиз. Со зарезь дурын вал.

²² Тани сӥнагогаысь кузёос пӧлысь одӥгез, Иаир нимо мурт, лыктӥз но, Сое адӟыса, Солэн азяз пыдесъяськиз.

²³ Солэсь туж куриз: «Нылы кулӥське ни; лыктыса со вылэ кидэ пон, мед бурмысал, улэп мед кыльысал».

²⁴ Иисус соин ӵош мынӥз. Со бӧрсьы трос калык мынӥз, Сое ӝиптӥзы.

²⁵ Вирыз кошкыса, дас кык ар ӵоже курадӟыса улӥсь одӥг кышномурт

²⁶ трос эмъясьёс дорын трос чидано луиз, маиз гинэ вал, ваньзэ быдтӥз, пайдаез нош нокыӵе но ӧз луы, эшшо но уродгес гинэ луиз,

²⁷ Иисус сярысь кылӥз но, калык пӧлтӥ бертӥз лыктыса, Солэн дӥськут бордаз йӧтӥськиз;

²⁸ «Дӥськут бордаз гинэ йӧтӥськи ке – бурмо», – со шуэм вылэм.

²⁹ Со куспын ик вирыз виямысь дугдӥз, висёнэз быриз ни шуыса, мугорыз шӧдӥз.

³⁰ Со дыре ик Иисус Ас пушкысьтыз кужмызлэсь потэмзэ шӧдӥз, калык пала кариськыса шуиз: «Кин Мынам дӥськут бордам йӧтӥськиз?»

³¹ Дышетскисьёсыз Солы шуизы: «Адӟиськод, калык кызьы Тонэ ӝиптэ, эшшо юаськод: ”Кин Мон борды йӧтӥськиз?”»

³² Со котырак учкиз, мед адӟо вал, кин тае лэсьтӥз шуыса.

³³ Туж кышкаса но куалектыса, асэныз мар луэмез тодыса, Со доры кышномурт лыктӥз, азяз пыдесъяськыса, номыре ватытэк, ваньзэ вераз.

³⁴ Нош Иисус солы шуиз: «Нылмурт! Тынад осконэд тонэ утиз. Каньылэн берт, та висёнэныд эн ни висьы».

³⁵ Та кылъёсыз Со веран куспетӥ сӥнагогалэн кузёезлэн дорысьтыз лыктыса шуизы: «Нылыд кулӥз ни, малы раньӟытӥськод на Дышетӥсез?»

³⁶ Иисус та кылъёсыз кылӥз но сӥнагогалэн кузёезлы соку ик шуиз: «Эн кышка, оскы гинэ».

³⁷ Петрез, Иаковез, Иаковлэсь вынзэ Иоаннэз сяна, нокинэ но бӧрсяз мыныны ӧз лэзьы.

³⁸ Сӥнагогаысь кузёлэн гуртаз вуиз но куалектэм, викышъяса, куараен бӧрдӥсь адямиосты адӟиз.

³⁹ Корка пырем бераз шуиз: «Малы чигиськиськоды, бӧрдӥськоды? Нылды кулэмын ӧвӧл, со изе гинэ».

⁴⁰ Сое серем каризы. Нош Со ваньзэс поттӥз, бордаз ныллэсь атайзэ, анайзэ, Асэныз ӵош ветлӥсьёсты басьтӥз но ныллэн кыллён интыяз пыриз.

⁴¹ Нылмуртэз китӥз кутыса шуиз: «Талифа-куми», со «нылаш, тыныд верасько, султы» шуэм кыл луэ.

⁴² Нылмурт соку ик султӥз но ветлыны кутскиз; солы ог дас кык арес вал. Тае адӟисьёс туж паймизы.

⁴³ Та учыр сярысь нокин но медаз тоды шуыса, юн алыса вераз, ныллы сиён сётыны косӥз.