Марк 4 - Библия удмурт кылын

4-тӥ ЛЮКЕТ

¹ Зарезь дурын нош ик дышетыны кутскиз; Со доры трос калык люкаськиз, соин ик Со зарезь вылысь пыже пыроно луиз, отын Со пукиз, нош вань калык зарезь дурысь музъем вылын сылӥз.

² Трос мадёнъёс пыр соосты Со дышетӥз. Дышетыса Со тазьы вераз:

³ «Кылзӥськелэ: тани кизись кизьыны потэм.

⁴ Кизьыкуз озьы луэм: куд-огез кидысэз сюрес дуре усем, тылобурдоос лыктӥллям но кокчаса быдтӥллям.

⁵ Куд-огез ӧжыт сюё, изо интые усиллям но ӝоген удаса потӥллям, малы ке шуоно отын сюез лазег вылэм;

⁶ шунды потэм но, шуяллям; выжызы ӧвӧл бере, куасьмиллям.

⁷ Куд-огез бышкись будосъёс пӧлы усиллям, бышкись будос ӝужам но кидысэз ӝокатэм, соин ик со емыш но сётымтэ.

⁸ Нош куд-огез, ӟеч музъеме усемез, пушъем, будэм но, кудӥз куамын, кудӥз куатьтон, кудӥз сю емыш сётэм».

⁹ Собере соослы шуиз: «Кылыны пельыз вань мурт – мед кылоз!»

¹⁰ Калык кошкем бере Солэн вӧзаз дас кык дышетскисьёсыныз огазьын сылӥсьёс Солэсь та мадён сярысь юазы.

¹¹ Иисус соослы шуиз: «Тӥледлы Инмар Эксэйлыклэсь ватӥськыса улӥсь зэмлыксэ тодон сётэмын, нош педлосьёслы ваньмыз мадёнъёс пыр гинэ тодытӥське.

¹² Соин ик соос синмынызы учко но – уг адӟо, пельынызы кыло но – уг валало; берытскизы ке, соослэн сьӧлыкъёссы куштӥськозы».

¹³ Соослы шуиз: «Та мадёнэз уд валаське шат? Кызьы меда валалоды вань мадёнъёсыз?

¹⁴ Кизись мурт кыл кизе.

¹⁵ Сюрес дуре кизиськемез возьматэ сыӵе муртъёсты: соос пушкы кыл кизиське, кылэм беразы ик соос доры шайтан лыктэ но сюлмазы кизиськем кылэз лушкаса кошке.

¹⁶ Тазьы ик изо интые кизиськемез возьматэ сыӵе муртъёсты: соос кылэз кыло но соку ик сое шумпотыса кабыл басьто,

¹⁷ нош пушказы выжызы ӧвӧл, мылкыдзы вошъяськись; бӧрысь куректон дыръёс вуо ке, яке кыл понна улляны кутско ке, соку ик соос канжаськыса усьыло.

¹⁸ Бышкись будосъёс пӧлы кизиськемез возьматэ кылэз кылӥсь муртъёсты,

¹⁹ но та даурлэн сюлмаськонъёсыз, узырлыклы синмаськон но мукет кулэяськонъёс соос пушкы пыро но кылэз ӝокато, соин ик со емыштэк кыле.

²⁰ Нош ӟеч музъеме кизиськемез возьматэ сыӵе муртъёсты: соос кылэз кылзо, сюлмазы поно но емыш ваё: одӥгез куамын, мукетыз куатьтон, куд-огез сю полэс».

²¹ Соослы Иисус шуиз: «Сюсьтылэз посуда улэ яке кровать улэ пуктыны ваё шат? Сюсьтыл пуктонэ пуктон понна ӧвӧл-а?

²² Нокыӵе но лушкемлыклэн шарае потытэк кылемез уг луы; нокыӵе ватӥськемлэн но кыре потытэк кылемез уг луы.

²³ Кылыны пельыз вань мурт – мед кылоз!»

²⁴ Соослы Иисус шуиз: «Чаклалэ кылэмдэс: кыӵе мертэтэн мерталоды, сыӵе мертэтэн ик тӥледлы но мертаськоз, тӥледлы, кылзӥсь муртъёслы, ватсаськоз на.

²⁵ Кинлэн вань, солы сётэмын луоз, нош кинлэн ӧвӧл, маиз вань, соиз но басьтэмын луоз».

²⁶ Иисус шуиз: «Инмар Эксэйлык адямилэн музъеме куштэм кидысэзлы укша.

²⁷ Изе но, султэ но, уйин но, нуназе но, кызьы уда, кызьы ӝужа кидыс – со уг тоды.

²⁸ Уго музъем ачиз нырысь вож узьым поттэ, собере – шеп, шепе тыраз ю люка.

²⁹ Емышез кисьма ке, соку ик сюрло келя, уго аран дыр вуиз».

³⁰ Иисус шуиз: «Маин ӵошатомы Инмар Эксэйлыкез? Яке кыӵе мадёнэн сое возьматомы?

³¹ Со горчица кидыс выллем: музъеме кизьыку, дунне вылысь вань кидысъёслэсь со векчи;

³² нош кизем бере удаса пушъе но вань шепо будосъёслэсь ӝужыт луэ, бадӟымесь вайёс лэзе, соку солэн саюлаз инмысь тылобурдоослэн пегӟыса улэмзы луэ».

³³ Кылзыны кужымзы тырмытозь, та выллем трос мадёнъёсын Иисус кыл вераса дышетӥз.

³⁴ Мадёнъёстэк соослы Со номыр но ӧз вера, нош дышетскисьёсызлы, асьсэ понна кыльыку, ваньзэ валэктыса вералляз.

³⁵ Со нуналэ ӝыт Иисус соослы шуиз: «Тупала выжоме».

³⁶ Калыкез лэзем беразы Сое, пыжын пукисез, сьӧразы басьтӥзы. Соин ӵош мукет пыжъёс но вал.

³⁷ Шимес тӧлпери ӝутскиз; тулкымъёс пыж борды шуккиськылӥзы, соин сэрен пыже тыраз ву люкаськиз.

³⁸ Со кӧлӥз пыжлэн бер люкетаз, йыролтэс вылын. Сое сайкатыса шуизы: «Дышетӥсь! Быриськомы ни, Тыныд нокыӵе но уг поты шат?»

³⁹ Султыса Со тӧлэз дугдыны косӥз, зарезьлы алыса шуиз: «Чалмытскы, дугды». Тӧл дугдӥз но, туж чалмыт луиз.

⁴⁰ Собере соослы Со шуиз: «Малы тӥ сокем кышкасесь? Малы тӥляд осконды ӧвӧл?»

⁴¹ Туж кышкаса-куалекъяса, соос куспазы вераськизы: «Кин Со сыӵе – тӧл но, зарезь но Солэсь кылзӥсько?»