Марк 3 - Библия удмурт кылын

3-тӥ ЛЮКЕТ

¹ Иисус нош ик сӥнагогае лыктӥз; отын киыз куасьмем мурт вал.

² Янгыше уськытон вылысь Со сьӧрын чакласа улӥзы: суббота нуналэ уз бурмыты-а Со висисез.

³ Киыз куасьмем муртлы Со шуиз: «Султы шораз».

⁴ Нош соослы Со шуиз: «Суббота нуналэ мар лэсьтыны яра: ӟеч уж-а, яке урод уж-а? Лулэз утьыны-а, яке быдтыны-а?» Нош соос шып улӥзы.

⁵ Сюлэмзы лекомем пумысен куректыса, вожез потыса, шоразы учкиз но со висись муртлы шуиз: «Кидэ шонер кар». Шонер карем бераз висись киыз, мукетыз кадь ик, йӧн луиз.

⁶ Фарисейёс соку ик кыре потӥзы но, Иродлэн адямиосыныз огазе кариськыса, Иисусэз быдтон вылысь куспазы кенеш ортчытӥзы.

⁷ Нош Иисус Аслаз дышетскисьёсыныз зарезь дуре кошкиз. Со сьӧры трос калык мынӥз, соос Галилеяысь, Иудеяысь,

⁸ Иерусалимысь, Идумеяысь но Иордан шур сьӧрысь вал. Солэсь лэсьтэм ужъёссэ кылыса, Тир но Сӥдон каръёс котырын улӥсьёс туж трос кузя Со доры лыктӥзы.

⁹ Калык уноысь, Сое медаз ӝикатэ шуыса, дышетскисьёссэ пыж дасяны косӥз.

¹⁰ Трос висисьёсты бурмытӥз, гижлоё-яраё муртъёс Со доры сузьтӥськылӥзы Солэн бордаз йӧтӥськон вылысь.

¹¹ Сое адӟем бере периос но, Солэн азяз уськытӥськыса, «Тон – Инмар Пи» шуыса кесяськизы.

¹² Солэсь Кин луэмзэ шарае медаз поттэ шуыса, соосты Со юн алылӥз.

¹³ Собере Со гурезе тубиз но, кин Солы кулэ, Ас дораз ӧтиз; соос дораз лыктӥзы.

¹⁴ Соос пӧлысь, Асэныз ӵош улон но тодытыса ветлон вылысь, Иисус дас кык муртэз бырйиз,

¹⁵ висёнъёсты бурмытыны но периосты улляса поттыны соослы кужым сётӥз.

¹⁶ Бырйиз Симонэз, солы Петр ним сётӥз;

¹⁷ Зеведейлэсь Иаков пизэ но солэсь Иоанн вынзэ, соослы Воанергес ним сётӥз, со «гудыри пиос» шуэм луэ;

¹⁸ Андреез, Филиппез, Варфоломеез, Матфеез, Фомаез, Алфейлэсь Иаков пизэ, Фаддеез, Кананит Симонэз

¹⁹ но Искариот Иудаез – Сое вузаса сётӥсез.

²⁰ Собере соос корка пыризы но, нош ик калык люкаськиз, нянь сиыны но маза ӧз луы ни.

²¹ Матысь муртъёсыз Со визьзэ ыштэм шуыса вераськемез кылӥзы но Сое нуыны лыктӥзы.

²² Иерусалимысь лыктэм книга тодӥсьёс вераськизы, Со пушкын, пе, веельзевул пуке, периосты, пе, Со периослэн эксэйзылэн кужмыныз улляса потта.

²³ Иисус, соосты дораз ӧтьыса, соослы мадьыса вераз: «Кызьы быгатоз шайтан шайтанэз улляны?

²⁴ Эксэйлык аслыз ачиз пумит люкиськиз ке, со эксэйлык возиськыны уз быгаты ни.

²⁵ Юрт аслыз ачиз пумит люкиськиз ке, со юртлэн быдэс кылемез уз луы.

²⁶ Шайтан но аслыз ачиз пумит султӥз ке, солэн возиськемез уз луы ни, солэн бырон дырыз вуиз.

²⁷ Кужмо муртлэн корказ пырыса, солэсь ваньбурзэ нокинлэн но лушкамез уз луы, нырысь ик сое ӧд ке думылы, соку гинэ солэн юртысьтыз лушкаськыны быгатод.

²⁸ Зэм ик тӥледлы верасько: адями пиослэн вань сьӧлыкъёссы но урод верамъёссы, кыӵе гинэ кылъёсын уз тышкаське, ваньмыз куштӥськозы;

²⁹ нош кин Святой Дух вылэ урод кыл вераз ке, со муртлэн сьӧлыкъёсыз ноку но уз куштӥське, со пумтэм дауръёслы судэ сюроз».

³⁰ Солэн пушказ пери пуке шуэмысьтызы, та кылъёсты Со вераз.

³¹ Анаеныз братъёсыз лыктӥзы, корка пырытэк педлон сылӥзы, соос Иисусэз доразы ӧтьыны ыстӥзы.

³² Со котырын калык пукиз. Солы ивортӥзы: «Тани Тынад Анаед но, братъёсыд но, сузэръёсыд но педлон сыло, Тонэ утчало».

³³ Соослы Со тазьы вераз: «Кин Мынам анае, кин Мынам братъёсы?»

³⁴ Ас котыраз пукись калык шоры учкыса шуиз: «Тани Мынам анае но, тани Мынам братъёсы но.

³⁵ Кин быдэсъя Инмарлэсь эриксэ, со луэ Мыным брат но, сузэр но, анай но».