Марк 14 - Библия удмурт кылын

14-тӥ ЛЮКЕТ

¹ Кык нунал ортчыса, Пасха но Юмал Нянь Сиён праздник вуэ вал. Архиерейёс но книга тодӥсьёс Иисусэз кутыса виён вылысь кескич амал утчаса ветлӥзы.

² Калык пушкын бугыръяськон медаз ӝутӥськы, та ужез праздник нуналэ ум лэсьтэ шуизы.

³ Иисус Вифанияын гижлочерен висись Симонлэн корказ сиськыса кыллён дыръя Со доры кышномурт алавастр посудаен нардлэсь лэсьтэм чылкыт дуно миро вайиз, посудазэ пильыса, мирозэ Солэн йыр вылаз кисьтӥз.

⁴ «Малы мироез юнме арам каронэз?» шуыса, куд-огез, вожзэс поттыса, куспазы вераськизы.

⁵ «Сое куинь сю динарийлэсь но дуноенгес вузаса коньдонзэ кураськисьёслы сётъяны луысал ук». Озьы сое пыкылӥзы.

⁶ Нош Иисус шуиз: «Кельтэ сое, малы сое кепыр вайытӥськоды? Со Мон понна ӟеч уж лэсьтӥз.

⁷ Кураськисьёс ялан тӥ котырын уго, куке мылды потӥз, соку ик соослы тӥляд ӟеч каремды луоз, нош Мон ялан тӥледын огазьын ӧвӧл.

⁸ Со лэсьтӥз, мар быгатӥз: Мынэсьтым мугорме вӧйын зыраса ватыны дасяз.

⁹ Зэм ик тӥледлы верасько: быдэс дунне вылын, кытын гинэ та Евангелие тодытэмын луиз, сое буре вайыса, солэн мар каремез сярысь котькытын но верамын луоз».

¹⁰ Иисусэз кутыса сётон вылысь Искариот Иуда, дас кык дышетскисьёсыз пӧлысь одӥгез, архиерейёс доры мынӥз.

¹¹ Тае кылыса, соосыз шумпотӥзы; солы азвесь коньдон сётом шуизы. Со утчаськыса улӥз, кызьы ке но кельшись дыре Сое кутыса сётыны.

¹² Юмал нянь сиёнлэн нырысетӥ нуналаз, Пасха ыжпи вандыку, дышетскисьёсыз Солэсь юазы: «Кытын Пасха ыжпиез сиемед потэ? Ми мыныса дасясалмы».

¹³ Дышетскисьёсыз пӧлысь кыксэ ыстӥз но соослы Со вераз: «Мынэлэ городэ, пумитады кувшинэн ву нуись мурт шедёз, со сьӧры мынэлэ.

¹⁴ Кытчы со пыроз, коркалэн кузёезлы шуэ: ”Дышетӥсь юа: кудаз комнатаын Мон дышетскисьёсыным валче Пасха ыжпиез сиыны быгато?”

¹⁵ Со тӥледлы коркалэсь вӧлдыса дасям бадӟым палзэ возьматоз; отчы асьмелы дасялэ».

¹⁶ Солэн дышетскисьёсыз мынӥзы; городэ вуэм беразы адӟизы: ваньмыз вал озьы, кызьы Со вераз. Пасхалы ыжпиез вандыса дасязы.

¹⁷ Ӝыт вуиз но, дас кык дышетскисьёсыныз ӵош Со лыктӥз.

¹⁸ Сиськыса улон дыръязы Иисус шуиз: «Зэм ик тӥледлы верасько, тӥ пӧлысь, Монэн огазьын сиськисьёс пӧлысь одӥгез, Монэ вузаса сётоз».

¹⁹ Соос куректонэ усизы но огзы бӧрсьы огзы Солы вераны кутскизы: «Мон ӧвӧл-а?», мукетыз но: «Мон ӧвӧл-а?»

²⁰ Ответ сётыса, Со тазьы вераз: «Дас кык пӧлысь одӥгез, Монэн ӵош тусьтые веттылӥсез.

²¹ Адями Пи мынэ ке но, кызьы Со сярысь гожтэмын вал, но Сое вузаса сётӥсь муртлы, кудӥз пыр Адями Пи вузаське, куректон луоз; со ӧй ке вордӥськысал, солы умойгес луысал».

²² Сиськон дыръязы Иисус нянь басьтӥз, бакель кариз, тӥялтыса соослы сётъяз но шуиз: «Басьтэлэ, сиелэ, та Мынам Мугоры».

²³ Чаша кутыса, тау карыса, соослы сётӥз; ваньзы ик отысь юизы.

²⁴ Соослы шуиз: «Та Мынам трос адямиос понна кисьтӥськем Выль Сӥзён Виры.

²⁵ Зэм ик тӥледлы верасько: Инмар Эксэйлыкын выль вина юон нуналозям виноград емышлэсьсэ винаез Мон уг ни юы».

²⁶ Вӧсь гуръёс чирдыса, Елеон гурезе кошкизы.

²⁷ Иисус соослы вераз: «Та уе ваньды тӥ Мон бордысь куштӥськоды, гожтэмын уга: ”Ыж возьмасьсэ погырто но, ыжъёсыз пазьгиськозы”.

²⁸ Улӟыса султэм берам Мон тӥледыз Галилеяысен азьпалто».

²⁹ Петр Солы шуиз: «Ваньзы ке но куштӥськизы, мон уг куштӥськы».

³⁰ Иисус солы шуиз: «Зэм ик тыныд верасько, та уе, атас кык пол чортытозь, куинь пол тон Мон бордысь куштӥськод».

³¹ Нош со эшшо но золгес вераз: «Тонэн ӵош мыным кулоно ке но луиз, Тон бордысь уг куштӥськы». Мукетъёсыз но тазьы ик веразы.

³² Гефсимания шуон интые вуизы; Иисус дышетскисьёсызлы шуиз: «Мон вӧсяськытозь, тӥ татын пукелэ».

³³ Сьӧраз Петрез, Иаковез но Иоаннэз басьтӥз; курадӟыны, куректыны кутскиз.

³⁴ Соослы шуиз: «Мынам лулы кулоно кадь ик куректэ; татын улэ, сак улэ».

³⁵ Ӧжытак палэнэ кошкиз но музъем вылэ выдыса, луысал ке, мед ортчысал Солэн та часэз шуыса, Со вӧсяськиз;

³⁶ шуиз: «Авва, Атае! Тынад ваньзэ лэсьтэмед луэ. Мон вӧзтӥ ортчытыты вал та чашаез; но Мыным кызьы кулэ озьы эн кар, озьы кар, кызьы Тыныд кулэ».

³⁷ Берен вуыкуз, адӟиз: ваньмыз умме усемын. Соку Со Петрлы шуиз: «Симон! Изиськод-а тон? Одӥг час но сак улэмед ӧз лу-а?

³⁸ Визь сынаськонэ медад сюре шуыса, сак улэ, вӧсяське: дух сэзь, нош лулмугор кужымтэм».

³⁹ Нош ик палэнэ кариськыса, со кылэз ик вераса вӧсяськиз.

⁴⁰ Берен вуыкуз, адӟиз, нош ик ваньмыз умме усемын: синъёссэс ум нюртэм. Мар вераны но Солы соос ӧз тодэ ни.

⁴¹ Куинетӥ полаз лыктыкуз, соослы шуиз: «Тӥ ялан изиськоды, кыллиськоды на? Тырмиз, час вуиз; тани Адями Пиез сьӧлыкоос кие сёто.

⁴² Султэлэ, мыноме: тани Монэ вузась мурт матам лыктӥз ини».

⁴³ Соку ик, Со вераськон куспын, дас кык дышетскисьёсыз пӧлысь одӥгез, Иуда, вуиз. Соин ӵош, мечъёс, зыръёс кутыса, архиерейёслэн, книга тодӥсьёслэн, тӧроослэн лэзем трос адямиоссы лыктӥзы.

⁴⁴ Иисусэз вузась мурт соослы тодмет сётыса шуиз: «Кинэ мон чупало, Со ик вань Со. Кутэ Сое, нуыкуды сак кариське».

⁴⁵ Со куспын ик Иисус доры лыктыса шуиз: «Равви! Равви!» но чупаз Сое.

⁴⁶ Соку ик Сое кырмизы, киулазы басьтӥзы.

⁴⁷ Сылӥсьёс пӧлысь одӥгез, мечсэ поттыса, архиерейлэн ляльчиезлэсь пельзэ ӵогыса уськытӥз.

⁴⁸ Соку Иисус соослы шуиз: «Йырвандӥсь мурт доры сямен мечъёсын, зыръёсын Монэ кутыны потӥды.

⁴⁹ Вань нуналъёсы Мон тӥледын огазьын храмын вал, дышетыса улӥ, нош тӥ Монэ ӧд кутэ. Озьыен, Гожтэмъёсысь верамъёс мед быдэсмозы».

⁵⁰ Соку, Сое кельтыса, ваньзы бызьыса кошкизы.

⁵¹ Одӥг пинал пи, гольык мугорзэ шобретэн бинялтыса, Со сьӧрын ветлӥз; солдатъёс сое кутӥзы.

⁵² Нош со шобретсэ киязы кельтыса, гольык куен соослэсь пегӟиз.

⁵³ Иисусэз архиерей доры вайизы; со доры вань архиерейёс, тӧроос, книга тодӥсьёс люкаськизы.

⁵⁴ Петр палэнэтӥ Со бӧрсьы мынӥз, архиерейлэн азбар дорозяз мынӥз, со пушкы пыриз; медоосын огазьын тылскем дурын шунтӥськыса пукиз.

⁵⁵ Архиерейёсын валче сӥнедрионын вань пукисьёс, Иисусэз виыса сётон вылысь, Солэсь шекъёссэ утчазы, но ӧз шедьтэ.

⁵⁶ Тросэз Со вылэ ӧрекчаськыса ӧвӧлтэмзэ веразы, но соослэн со верамъёссы тырмыт ӧз луы.

⁵⁷ Куд-огез султӥзы но Со вылэ ӧрекчаськыса ӧвӧлтэмзэ вераса шуизы:

⁵⁸ «Ми кылӥмы Солэсь тазэ киын лэсьтэм храмез куашкато но куинь нунал куспын мукетсэ, киын лэсьтымтэзэ храмез пукто шуэмзэ».

⁵⁹ Таиз но верамзы тырмыт ӧз луы.

⁶⁰ Соку архиерей, шоразы султыса, Иисуслэсь юаз: «Тон номыр но уд-а вераськы? Маин соос Тонэ янгыше уськыто?»

⁶¹ Нош Со шып улӥз, нокыӵе но ответ ӧз сёты. Архиерей нош ик Солэсь юаз: «Тон-а со Христос, Данъянолэн Пиез?»

⁶² Иисус шуиз: «Мон; тӥ адӟоды, Кужымлэн бурпалаз пуксьыса, ин пилемъёс вылын лыктӥсь Адями Пиез».

⁶³ Соку архиерей дӥськутсэ шорияк кесьыса шуиз: «Малы кулэ на асьмелы адӟисьёс?

⁶⁴ Тӥ кылӥды Инмарез сантэмамез; мар тӥ шуоды?» Ваньзы соос, янгыше уськытыса, «виыны кулэ Сое» шуизы.

⁶⁵ Куд-огъёсыз Со вылэ сяланы кутскизы, ымнырзэ шобыртыса тышказы но Солы шуизы: «Тодмад ке, вера». Ляльчиос-медоос Солэн бамаз мыжгазы.

⁶⁶ Петр улӥын, азбарын улыку, архиерей дорын медоын улӥсь кышномурт отчы лыктӥз.

⁶⁷ Шунтӥськыса сылӥсь Петрез адӟиз но со шоры учкыса шуиз: «Тон но Назаретысь Иисусэн огазьын вал».

⁶⁸ Нош со танӥськыса шуиз: «Уг тодӥськы, уг валаськы мар тон вераськод». Азьпал азбаре потӥз; соку атас чортӥз.

⁶⁹ Медо кышно сое нош ик адӟиз но татын сылӥсь муртъёслы вераны кутскиз: «Таиз соос пӧлысь».

⁷⁰ Петр нош ик танӥськиз. Ӧжытак улыса, татын сылӥсьёс Петрлы нош ик вераны кутскизы: «Зэм ик, тон соос пӧлысь; тон Галилеяын вордӥськем мурт ук, вераськемед тынад соосын одӥг кадь».

⁷¹ Нош со кыл сётыса, танӥськыса шуиз: «Со Адямиез, Кудӥз сярысь тӥ вераськоды, уг тодӥськы».

⁷² Соку ик атас кыкетӥзэ чортӥз. Соку Петр тодаз вайиз Иисуслэсь «атас кык пол чортытозь, куинь пол тон Мон бордысь куштӥськод» шуэм кылзэ. Соку со бӧрдыны кутскиз.