Марк 12 - Библия удмурт кылын

12-тӥ ЛЮКЕТ

¹ Иисус соослы мадёнъёсын вераны кутскиз: «Одӥг адями виноград бакча мерттэм но кенерен котыртэм, вина виятон гу гудӟем, каланча пуктэм, сое виноград будэтӥсьёс кие сётэм но ачиз кошкем.

² Дыр вуэм но, виноград будэтӥсьёс доры, виноград емыш вайыны ляльчизэ ыстэм.

³ Нош виноград будэтӥсьёс сое кутӥллям но жугиллям, номыр но сётытэк келяллям.

⁴ Нош ик соос доры мукетсэ ляльчизэ ыстэм. Таизлэсь йырзэ изэн пась кариллям но сантэмаса келяллям.

⁵ Собере мукетсэ ляльчизэ ыстэм: тазэ вииллям; трос мукетъёссэ я жугыса лэзиллям, я виылӥллям.

⁶ Пумаз ини ыстэм аслэсьтыз одӥг гинэ яратоно пизэ но шуэм: ”Пиелэсь возьдаськозы”.

⁷ Нош виноград будэтӥсьёс ог-огзылы шуиллям: ”Та атай юртлы кузёе кылёно. Ойдолэ, мыныса сое виёме, солы сюроно ваньбур асьмелы луоз”.

⁸ Кутыса сое вииллям но виноград бакча сьӧры куштӥллям.

⁹ Виноград бакчалэн кузёез мар бен кароз? Лыктоз но виноград будэтӥсьёсты виылоз, виноград бакчазэ мукетъёслы сётоз.

¹⁰ Священной Гожтэмысь лыдӟемды ӧвӧл шат таӵе веранэз: ”Корка пуктӥсьёслэн кулэтэм карыса куштэм иззы корка сэреглэн улаз инъет йыр луыса пуксиз;

¹¹ та – Кузё-Инмарлэсь, паймымон луэ асьмелэн син азямы”?»

¹² Иисусэз кутыны тыршизы, но калыклэсь кышказы; уго валатскизы, соос сярысь та мадён верамын шуыса; Собере Сое кельтыса, Со дорысь кошкизы.

¹³ Кыл пыр янгыш карыса кутон вылысь Со доры куд-ог фарисейёсты но Иродлэсь адямиоссэ ыстӥзы.

¹⁴ Соос лыктыса Иисуслы шуизы: «Дышетӥсь! Ми тодӥськомы, Тон шонер лэсьтӥсь шуыса, кинлы но солы гинэ кельшыны турттыса уд улӥськы. Нокыӵе но ымныр шоры уд учкиськы, но Инмарлэн сюресэзлы шонер дышетӥськод. Яра-а кесарьлы выт тырыны, уг яра-а? Оло тыроно милемлы, оло ӧвӧл?»

¹⁵ Нош Со, соослэсь чеберъяськись луэмзэс тодыса, соослы шуиз: «Малы тӥ Мынэсьтым визьме сынаськоды? Вае Мыным динарий, Мон сое учко».

¹⁶ Соос вайизы. Соку соослы шуиз: «Кинлэн татын тусбуез суредамын, кинлэн та гожтӥськемез?» Соос шуизы: «Кесарьлэн».

¹⁷ Соослы ответ сётыса, Иисус шуиз: «Кесарьлэсьсэ кесарьлы сётэлэ, Инмарлэсьсэ – Инмарлы». Паймыса кылзӥзы Сое.

¹⁸ Собере Иисус доры «улӟыса султон ӧвӧл» шуыса дышетӥсь саддукейёс лыктӥзы но Солэсь юазы:

¹⁹ «Дышетӥсь! Моисей милемлы гожтӥз: ”Кинлэн ке агаез кулыса кышнозэ нылпитэк кельтӥз ке, солэн выныз солэсь кузпалзэ аслыз кышно мед кароз но агаезлэсь выжызэ мед утёз”.

²⁰ Сизьым агай-вынъёс вал: нырысетӥез кышнояськиз но нылпи кельтытэк кулӥз.

²¹ Кыкетӥез сое кышнолы вайиз, но кулӥз, со но нылпи ӧз кельты; озьы ик куинетӥез но.

²² Сизьымназы ик сое кышно каризы, нош нылпи ӧз кельтэ. Ваньзы бере та кышномурт но кулӥз.

²³ Улӟыса султон нуналэ кулэмъёс улӟыса султӥзы ке, кудзылы со кышно луоз? Сизьымназы но сое кышно каризы вал уго».

²⁴ Иисус соослы ответ сётыса шуиз: «Тазьы-а тӥ Гожтэмъёсты но, Инмар кужымез но тодымтэеныды янгышаськоды?

²⁵ Кулэмысь улӟыса султон бере уз но кышнояське, уз но бызе, Инмысь Кылчинъёс кадь улозы.

²⁶ Кулэмъёслэн улӟыса султонзы сярысь Инмарлэсь куак дорысен Моисейлы ”Мон – Авраамлэн Инмарез, Исааклэн Инмарез, Иаковлэн Инмарез” шуэмзэ Моисейлэн книгаысьтыз ӧд лыдӟе шат?

²⁷ Инмар – кулэмъёслэн Инмарзы ӧвӧл, Со – улэпъёслэн Инмарзы. Озьыен, тӥ туж зол янгышаськоды».

²⁸ Книга тодӥсьёс пӧлысь одӥгез та ченгешонэз кылӥз но, Иисуслэсь ӟеч ответ сётылэмзэ адӟыса, Со доры лыктыса юаз: «Вань курон-косонъёс пӧлысь кудӥз самой бадӟымез?»

²⁹ Иисус солы ответ сётӥз: «Вань курон-косонъёс пӧлысь самой бадӟымез таӵе: ”Кылзы, Израиль! Асьмелэн Инмармы Кузё-Инмар – одӥг Кузё-Инмар;

³⁰ Инмардэ Кузё-Инмарез вань сюлмыныд, вань лулыныд, вань визьмыныд, вань кужмыныд яраты”. Та самой бадӟымез курон-косон!

³¹ Кыкетӥез но таиз кадь ик: ”Матысьтэ астэ ачид кадь ик яраты”. Таослэсь бадӟымез курон-косон ӧвӧл».

³² Книга тодӥсь Солы шуиз: «Умой, Дышетӥсь! Зэмез верад Тон: Инмар одӥг гинэ, Со сяна, мукетыз ӧвӧл;

³³ Сое вань сюлмын, вань визьмын, вань лулын, вань кужымен, матысьтэ но астэ ачид кадь ик яратон – тылын сутӥськись котькыӵе курбонъёслэсь, мукет курбон сётонъёслэсь бадӟымгес».

³⁴ Иисус, талэсь визьмо ответ сётыны быгатэмзэ кылыса, солы шуиз: «Инмар Эксэйлыклэсь кыдёкын ӧвӧл ни тон». Та бере нокин но Солэсь юалляськыны ӧз дӥсьты ни.

³⁵ Храмын дышетыса улыкуз, Иисус шуиз: «Малы нош книга тодӥсьёс Христос Давидлэн Пиез шуыса верало?

³⁶ Давид ачиз Святой Духен тыр луыса вераз: ”Кузё-Инмар мынам Кузё-Инмарелы шуиз: Тынэсьтыд тушмонъёстэ пыд улад понытозям, Мынам бурпалам пук”.

³⁷ Озьыен, ачиз Давид Сое Кузё-Инмар шуэ, кызьы Со солэн Пиез луоз?» Трос муртъёс Сое шумпотыса кылзӥськизы.

³⁸ Аслаз дышетоназ Со вераз: «Чаклаське книга тодӥсьёслэсь, кузь дӥськутэн ветлыны, калык люкаськон интыосын асьсэды ӟечкыламез яратӥсьёслэсь,

³⁹ сӥнагогаосын калыклэн азьпалаз пукыны, сиён-юонъёс дыръя нырысетӥ радъёсын кылльыны яратӥсьёслэсь.

⁴⁰ Соос, палкышноослэсь юртъерзэс сиисьёс, калык адӟиськон азьын кема вӧсяськисьёс, – чидантэм секытлы судить каремын луозы».

⁴¹ Иисус ваньбур тырон шыкыс шоры пуксиз но учкыса улӥз, кызьы отчы калык коньдон тыре. Тросэз узыр муртъёс тросэн тыризы.

⁴² Куанер улӥсь палкышно лыктыса кык лепта понӥз. Кык лепта одӥг кодрант луэ.

⁴³ Иисус дышетскисьёссэ матаз ӧтьыса шуиз: «Зэм ик тӥледлы верасько, та куанер палкышно ваньбур тырон шыкысэ тырисьёс пӧлысь ваньмызлэсь уно понӥз;

⁴⁴ уго ваньмыз мултэсэз ваньысь тыризы, нош со куанер улыса но, кӧтсэ тырон понна маиз вань – ваньзэ понӥз».