Марк 11 - Библия удмурт кылын

11-тӥ ЛЮКЕТ

¹ Иерусалиме тубыкузы, Виффагияен Вифания гуртъёслы, Елеон гурезьлы матэ вуэм беразы Иисус кыксэ дышетскисьёссэ ыстӥз

² но соослы шуиз: «Азьпалады адӟиськись гуртэ мынэлэ. Отчы пырем берады ик гозыям ишакпиез шедьтоды, адямиос пӧлысь со вылэ нокин но татчыозь ӧз на пуксьылы. Пертчыса сое татчы вае.

³ Нош кин ке тӥледлы шуиз ке: ”Мар тӥ озьы лэсьтӥськоды?” Тӥ шуэлэ: ”Со Кузё-Инмарлы кулэ, сое татчы Со берен лэзёз”».

⁴ Соос мынӥзы но урамысь, капка доры думем ишакпиез шедьтӥзы, пертчизы сое.

⁵ Сылӥсьёс пӧлысь куд-огез соослы шуизы: «Мар тӥ лэсьтӥськоды? Малы ишакпиез пертчылӥськоды?»

⁶ Соос веразы озьы, кызьы Иисус косӥз; собере соосты басьтыны лэзизы.

⁷ Ишакпиез Иисус доры вайизы но солэн тыбыр вылаз дӥськутъёссэс тыризы; Иисус со вылэ пуксиз.

⁸ Тросэз асьсэлэсь дӥськутсэс сюрес вылэ вӧлдӥзы, нош мукетъёсыз, писпу вайёсты вандылыса, сюрес вылэ вӧлдӥзы.

⁹ Азьтӥз мынӥсьёс но, сьӧраз мынӥсьёс но черекъязы: «Осанна! Кузё-Инмарлэн нимыз понна Лыктӥсь дано!

¹⁰ Кузё-Инмарлэн нимыз понна Давид атаймылэн лыктӥсь эксэйлыкез дано! Осанна вылӥын!»

¹¹ Иисус Иерусалиме пыриз но храме мынӥз. Котырак ваньзэ учкиз. Бер ӝыт вал ини. Дас кык дышетскисьёссэ басьтыса, Вифание кошкиз.

¹² Ӵуказеяз, Вифанияысь потэм беразы, Иисуслэн сиемез потӥз.

¹³ Кыдёкысен ик куарен шобыртӥськем смоквапуэз адӟиз но, марзэ ке но солэсь уг шедьты-а шуыса, Со доры мынӥз. Лыктӥз но, куарзэ сяна, номырзэ но ӧз шедьты, соку смоква бичан дыр вуымтэ на вал уга.

¹⁴ Иисус солы шуиз: «Туннэ нуналысен, вань дауръёс ӵоже, нокин но, ноку но тынэсьтыд емыштэ медаз ни сиы». Тае дышетскисьёсыз кылӥзы.

¹⁵ Иерусалиме лыктӥзы. Иисус храме пыриз но отын вузкарисьёсты, басьяськисьёсты улляса поттаны кутскиз; вошъяськыса улӥсьёслэсь ӝӧкъёссэс, дыдыкъёсын вузкарисьёслэсь ӟусъёссэс кымалляз;

¹⁶ храм пыр нокинэ но, нокыӵе но тӥрлык нуллыны ӧз лэзьы.

¹⁷ Соосыз дышетыса вераз: «Гожтэмын ӧвӧл-а – ”Мынам коркае вань калыкъёс понна вӧсяськон корка шуыса нимаськоз”? Нош тӥ сое лушкаськисьёслы люкаськон интылы пӧрмытӥды».

¹⁸ Тае книга тодӥсьёс но архиерейёс кылӥзы, кызьы ке но Сое виыны муг утчазы. Солэсь кышкаса улӥзы, уго адӟо вал, кызьы калык Солэсь дышетонзэ паймыса кылзӥське.

¹⁹ Бер ӝыт Со город сьӧры потӥз.

²⁰ Ӵукна, смоквапу вӧзтӥ ортчыкузы, адӟизы: со выжыозяз куасьмемын.

²¹ Петрлэн тодаз лыктыса шуиз: «Дышетӥсь! Учкы ай, каргам смоквапу куасьмем».

²² Иисус соослы шуиз:

²³ «Инмарлы осконэн улэ. Зэм ик тӥледлы верасько: кин сюлмыныз шекланытэк, оскыса та гурезьлы ”ӝутӥськы но зарезе гылӟы” шуиз ке, солэн верам кылызъя луоз, мар гинэ уз вера – ваньмыз быдэсмоз.

²⁴ Соин ик тӥледлы шуисько: вӧсяськыса мар гинэ уд куре, басьто шуыса оскелэ, – ваньмыз тӥледлы луоз.

²⁵ Вӧсяськыса сылыкуды, Инмысь Атайды сьӧлыкамдэс мед куштоз шуиськоды ке, нырысь ик асьтэос, вожпотон муртты вань ке, солэсь сьӧлыкамъёссэ куштэлэ.

²⁶ Ӧд ке куштэ, Инмысь Атайды но тӥлесьтыд сьӧлыкамдэс уз кушты».

²⁷ Нош ик Иерусалиме лыктӥзы. Храм пушкытӥ ветлыкуз, Со доры архиерейёс, книга тодӥсьёс, тӧроос лыктӥзы

²⁸ но Солы шуизы: «Кыӵе кужымен Тон тае лэсьтӥськод? Тае лэсьтыны кин Тыныд кужым сётӥз?»

²⁹ Соослэн пумитазы Иисус шуиз: «Мон но тӥледлы одӥг юан сёто, вералэ Мыным, соку Мон но тӥледлы верало, кыӵе кужымен Мон тае лэсьтӥсько.

³⁰ Иоаннлэн пылатонэз Инмысен вал-а, адямиос бордысен-а? Вералэ Мыным».

³¹ Соку соос куспазы вераськизы: «”Инмысен” ке шуимы, Со шуоз: ”Малы нош тӥ солы ӧд оске?”»

³² «Адямиос бордысь» ке шуоно – калыклэсь кышкаллям, малы ке шуоно ваньмыз малпало вал, Иоанн зэмзэ но пророк вал шуыса.

³³ Иисуслы ответ сётыса шуизы: «Ум тодӥське». Соку Иисус соослы шуиз: «Мон но тӥледлы уг вера, кыӵе кужымен Мон тае лэсьтӥсько».