Марк 10 - Библия удмурт кылын

10-тӥ ЛЮКЕТ

¹ Иисус отысь кошкиз, Иордан шур сьӧрысь Иудея музъеме вуиз. Нош ик Со доры калык люкаськиз; огдышем сяменыз соосты Со нош ик дышетыса улӥз.

² Со доры фарисейёс лыктӥзы но визьзэ сынаса юазы: «Яра-а пиосмуртлы кышноеныз люкиськыны?»

³ Ответ сётыса, Со вераз: «Мар лэсьтыны тӥледлы Моисей косӥз?»

⁴ Соос шуизы: «Моисей люкиськон сярысь гожтэт гожтыса люкиськыны лэзиз».

⁵ Иисус соослэн пумитазы шуиз: «Сюлэмды чурыт луэмен, со та курон-косонэз тӥледлы гожтӥз.

⁶ Дуннеез кылдытонлэн кутсконаз ик Инмар пиосмуртэн кышномуртэз кылдытӥз.

⁷ Соин ик пиосмурт аслэсьтыз атайзэ, анайзэ кельтоз но

⁸ аслаз кышноез борды лякиськоз, кыкназы одӥг лулмугор луозы; табере соос кык ӧвӧл, одӥг лулмугор ини.

⁹ Озьыен, мае Инмар огазеяз, сое адями медаз люкы».

¹⁰ Коркасен дышетскисьёсыз Солэсь нош ик со сярысь ик юазы.

¹¹ Соослы Со шуиз: «Кин, кышноеныз люкиськыса, мукетсэ кышно басьтэ ке, со пыр со азон-калгон сьӧлыке пыре.

¹² Кышномурт, картэзлэсь люкиськыса, мукетызлы бызе ке, со азон-калгон сьӧлыке пыре».

¹³ Со доры нылпиосты вайылӥзы, соос борды киыныз мед йӧтӥськоз вал шуыса; нош дышетскисьёсыз вайылӥсьёсты пырыны лэзьытэк улӥзы.

¹⁴ Тае адӟыса, Иисуслэн туж вожез потӥз но соослы шуиз: «Мон доры нылпиосты ветлыны лэзе, эн люкетэ соослы, таӵеослэн Инмар Эксэйлыксы вань уго.

¹⁵ Зэм ик тӥледлы верасько: кин Инмар Эксэйлыкез пичи пинал кадь кабыл ӧз ке басьты, со отчы уз пыры».

¹⁶ Соосты ваньзэс ӟыгыртӥз, вылазы кизэ поныса, бакель кариз.

¹⁷ Сюрес вылэ потыку, Со доры кыӵе ке но мурт бызьыса лыктӥз но, Солэн азяз пыдесъяськыса, Солэсь юаз: «Ӟеч Дышетӥсь! Быронтэм улонэз басьтон понна мон мар карыны кулэ?»

¹⁸ Иисус солы шуиз: «Малы тон Монэ ”ӟеч” шуиськод? Одӥг Инмар сяна, нокин но ӟеч ӧвӧл.

¹⁹ Таӵе курон-косонъёсты тодӥськод: азон-калгон сьӧлыке эн пыры; эн виы; эн лушкаськы; ӧрекчаськыса ӧвӧлтэмзэ эн вера; эн ултӥя; атайдэ но, анайдэ но сӥлы кар».

²⁰ Нош со ответ сётыса шуиз: «Дышетӥсь, ваньзэ тае мон пинал дырысеным ик быдэсъяй».

²¹ Иисус со шоры учкиз, сюлмаз кельшиз, собере солы шуиз: «Одӥгез тыныд уг тырмы: мын, маид вань, ваньзэ вуза но кураськисьёслы сётъя, со понна тынад узырлыкед Инмын луоз; лыкты но, киростэ басьтыса, Мон сьӧры мын».

²² Та кылэз кылыса, солэн мылкыдыз лапказ, ӝоже усьыса кошкиз, солэн бадӟым юртъерез вал уго.

²³ Иисус, котырак учкыса, дышетскисьёсызлы шуиз: «Макем секыт трос узырлыксы ванё муртъёслы Инмар Эксэйлыке пырыны».

²⁴ Солэсь кылъёссэ кылыса, дышетскисьёсыз куалектӥзы. Соослэн пумитазы Иисус нош ик вераз: «Пиналъёс! Кыӵе секыт ваньбурлы оскиськыса улӥсь муртъёслы Инмар Эксэйлыке пырыны!

²⁵ Узыр муртлы Инмар Эксэйлыке пырон сярысь, верблюдлы капчигес вень пась пыр потыны».

²⁶ Соос нош туж-туж паймизы но асьсэ куспын вераськизы: «Кин бен утиськыны быгатоз?»

²⁷ Иисус соос шоры учкыса шуиз: «Адямиослы со луонтэм, нош Инмарлы луоно; Инмарлы номыр но луонтэмез ӧвӧл уго».

²⁸ Петр Солы вераны кутскиз: «Тани ми ваньзэ кельтӥмы но Тон сьӧры мыныны потӥмы».

²⁹ Иисус солы ответ сётыса шуиз: «Зэм ик тӥледлы верасько: кин Мон понна, Евангелие понна корказэ, я агай-вынъёссэ, я сузэр-апайёссэ, я атайзэ, я анайзэ, я кышнозэ, я нылпиоссэ, я музъемзэ кельтӥз ке,

³⁰ али, таӵе дыре, уллянъёс пӧлын улыса, сю пол тросгес коркаос, агай-вынъёс, сузэр-апайёс, атайёс, анайёс, нылпиос, музъем басьтытэк одӥгез но уз кыльы, вуоно даурын но быронтэм улон басьтытэк уз кыльы.

³¹ Азьпалаз мынӥсьёс тросэз пумаз кылёзы, но пумаз мынӥсьёс азьпала потозы».

³² Сюрес вылын дыръязы, Иерусалиме тубыкузы, Иисус соослэн азьпалазы мынӥз, соос туж куалектэмын вал, Со бӧрсьы кышкаса мынӥзы. Дас кыксэс ик дораз ӧтьыса, нош ик Асэныз мар луоно сярысь вераны кутскиз:

³³ «Тани асьмеос Иерусалиме тубиськомы, Адями Пиез архиерейёс, книга тодӥсьёс кие сётозы, Сое виыны судить карозы, Сое язычникъёс кие сётозы,

³⁴ сантэмалозы Сое, жугозы Сое, Со вылэ сялалозы, виёзы Сое; куинетӥ нуналаз Со улӟыса султоз».

³⁵ Соку Иисус доры Зеведей пиос, Иаковен Иоанн, лыктыса шуизы: «Дышетӥсь! Милям потэ, Тон мед лэсьтод милемлы сое, мае ми курим».

³⁶ Соослы Со шуиз: «Мар лэсьтэмме тӥ кулэ кариськоды?»

³⁷ Соос Солы шуизы: «Лэзь вал милемыз Тынад данлыкад, огмес бурпалад пуксьыны, мукетмес – паллян палад».

³⁸ Нош Иисус соослы шуиз: «Мар куремдэс асьтэос уд тодӥське. Луоз-а тӥляд Мынэсьтым юоно чашаме юэмды, пылатонэн, кудӥныз Мон пылатӥськисько, пылатӥськемды?»

³⁹ Соос ответ сётӥзы: «Быгатӥськом». Нош Иисус соослы шуиз: «Мынэсьтым юоно чашаме юоды, пылатонэн, кудӥныз Мон пылатӥськисько, пылатӥськоды,

⁴⁰ нош бурпалам, я паллян палам пуктыны – Мынам эрике ӧвӧл; отчы пуксёзы соос, кинъёслы со дасямын».

⁴¹ Тае кылыса, дасназы ик Иаковен Иоаннлы йыркуръяськыны кутскизы.

⁴² Иисус соосты ӧтьыса вераз: «Тодӥськоды ук, калыкъёслэн кивалтӥсьёссы шуыса лыдӟиськисьёс соосын кузёясько, кузёйыръёссы соосты киулазы возё.

⁴³ Нош тӥ куспын озьы медаз луы: тӥ куспын кинлэн ассэ бадӟым каремез потэ, тӥледлы со ляльчи мед луоз;

⁴⁴ тӥ куспын кинлэн ваньмызлэсь вылӥын луэмез потэ, со ваньмызлы ляльчи мед луоз.

⁴⁵ Адями Пи но уго Ас вылаз ужатыны ӧз лыкты, Со Ачиз адямиослы ужаны-тыршыны, Аслэсьтыз лулзэ сётыса, троссэ сьӧлыкъёслэсь мозмытыны лыктӥз».

⁴⁶ Иерихонэ лыктӥзы. Иисус Аслаз дышетскисьёсыныз, трос калыкен ӵош Иерихонысь потон дыръяз сюрес дурын кураськыса пуке вал Тимейлэн Вартимей нимо синтэм пиез.

⁴⁷ Та Иисус Назорей шуыса кылӥз но кесяськыны кутскиз: «Давидлэн Пиез Иисус! Жаля монэ».

⁴⁸ Тросэз сое чус кариськыны косӥзы, нош со эшшо но юнгес кесяськыны кутскиз: «Эй, Давидлэн Пиез! Жаля монэ».

⁴⁹ Иисус дугдӥз но сое дораз ӧтьыны косӥз. Синтэм муртэ ӧтьыса шуизы: «Эн кышка, султы, тонэ ӧте».

⁵⁰ Вылысьтыз дӥсьсэ куштӥз, султӥз но Иисус доры лыктӥз.

⁵¹ Ответ сётыса, Иисус солэсь юаз: «Мар тыныд Мынэсьтым кулэ?» Синтэм мурт Солы шуиз: «Дышетӥсь! Синмы мед усьтӥськысал».

⁵² Иисус солы шуиз: «Мын, тынад осконэд тонэ утиз». Со соку ик адӟыны кутскиз, собере со Иисус сьӧры сюрес кузя кошкиз.